ގެދޮރުވެރިކަމާއި ބިމާއި ޢުމްރާނީ ތަރައްޤީއާބެހޭ ވަޒީރު ޑރ. ޢަލީ ޙައިދަރު އަޙްމަދު ވިދާޅުވެފައިވަނީ ގެދޮރު އަޅަން ލުއި ލޯނުދިނުމަށް ސަރުކާރުން އިފްތިތާޙުކޮށްފައިވާ "ހިޔާވަހި ފައިނެންސް ސްކީމް" އަށް އެދެވޭނެ ފުރުޞަތު ކުރިއަށް އޮތް ހަފްތާއެއްހާ ދުވަހުގެ ތެރޭގައި ހުޅުވާލެވޭނެ ކަމަށެވެ.
ބޭންކް އޮފް މޯލްޑިވްސް، ބީއެމްއެލްއާއެކު ގެދޮރުވެރިކަމާބެހޭ ވުޒާރާއިން ސޮއިކުރި ފަހުމުނާމާގައި ވަޒީރު ވިދާޅުވެފައިވަނީ މިއީ ބޯހިޔާވަހިކަމަށް ދޫކުރެވޭ ލުއި ލޯނު ސްކީމްގެ މަސައްކަތުގައި ފަންޑު މެނޭޖްކުރުމުގައި އެ ބޭންކުގެ އެހީތެރިކަން ހޯދުމަށް ކަމަށެވެ. އަދި މި ބޭނުމަށް މޯލްޑިވްސް އިސްލާމިކް ބޭންކާއެކުވެސް ސޮއިކޮށްފައިވާކަން ފާހަގަކުރެއްވިއެވެ.
ވަޒީރު އިތުރަށް ވިދާޅުވެފައިވަނީ މި ލޯނު ދޫކުރެވޭނީ ފުރަތަމަ ފަހަރަށް ގެ އަޅާ ފަރާތްތަކަށް އެކަނި ކަމަށާއި، މިއީ ރާއްޖޭގެ ބޯހިޔާވަހިކަމުގެ މައްސަލައަށް ލިބޭނެ ބޮޑު ޙައްލަކަށް ވާނެ ކަމަށެވެ.
ހިޔާވަހި ފައިނެންސް ސްކީމްގެ ދަށުން މާލެ ސަރަހައްދުގައި ގެދޮރު އެޅުމަށް 6 މިލިޔަން ރުފިޔާއާ ހަމައަށް، އަރބަން ސެންޓަރުތަކުގައި 3 މިލިޔަން ރުފިޔާއާ ހަމައަށް، އަދި އެހެނިހެން ސަރަހައްދުތަކުގައި 1 މިލިޔަން ރުފިޔާއާ ހަމައަށް ލޯނު ދޫކުރެވޭނެއެވެ. މި ލޯނުތަކުގެ މުއްދަތަކީ 25 އަހަރު ދުވަސް ކަމަށްވާއިރު، އިންޓަރެސްޓް ރޭޓަކީ 5 އިންސައްތައެވެ.
ފަހުމުނާމާގައި ސޮއިކުރެއްވީ ގެދޮރުވެރިކަމާބެހޭ ވުޒާރާގެ ފަރާތުން ވަޒީރު ޑރ. ޢަލީ ޙައިދަރު އަޙްމަދާއި، ބީއެމްއެލްގެ ފަރާތުން ޗީފް އެގްޒެކެޓިވް އޮފިސަރ މުޙައްމަދު ޝަރީފެވެ.
