އާންމުކޮށް ބޭނުންކުރާ ގޭހުގެ ބޮޑު ޝޯޓޭޖެއް މިވަގުތު ނެތް ކަމަށް މޯލްޑިވް ގޭސް ކުންފުނިން މިއަދު ހާމަކޮށްފިއެވެ. ކުންފުނީގެ މެނޭޖިންގ ޑިރެކްޓަރ އަބްދުﷲ މުހައްމަދު ބައެއް މީޑިއާތަކަށް މައުލޫމާތު ދެއްވި ގޮތުގައި މިހާރު ދިމާވެފައިވާ ހަމައެކަނި މައްސަލައަކީ ބޯޓު ޑިލޭވުމާ ގުޅިގެން 45 ކިލޯގެ ފުޅި ނުލިބި ހުރުމެވެ. ނަމަވެސް އާންމު ގޭބިސީތަކުގައި ބޭނުންކުރާ ދެ ކިލޯ، ފަސް ކިލޯ އަދި 10 ކިލޯގެ ފުޅިތައް މިހާރުވެސް އެއްވެސް މައްސަލައެއްނެތި ފޯރުކޮށްދެމުން ގެންދާކަމަށް އޭނާ ވިދާޅުވެފައި ވެއެވެ.
މިއަދު ބޯޓު ރާއްޖެ އައިސްފައިވާތީ، މާދަމާއިން ފެށިގެން 45 ކިލޯގެ ފުޅިތައްވެސް އާންމު އުސޫލުން ފޯރުކޮށްދެވޭނެ ކަމަށް އަބްދުﷲ ވިދާޅުވެފައި ވެއެވެ.
އެސްޓީއޯގެ ސަބްސިޑަރީއެއްގެ ގޮތުގައި ހިންގާ މި ކުންފުނީގެ މާލީ ހާލަތު ވަރަށް ރަނގަޅު ކަމަށާއި، ފައިސާގެ އެއްވެސް ދަތިކަމެއް ނެތް ކަމަށްވެސް އޭނާ ފާހަގަކުރައްވާފައި ވެއެވެ. އަދި މި މައްސަލަ ދިމާވެފައިވަނީ ޑޮލަރުގެ ދަތިކަމާ ގުޅިގެން ނޫންކަމަށާއި، ހަމައެކަނި ބޯޓުގެ ޑިލޭގެ ސަބަބުން ކުރިމަތިވި ވަގުތީ މައްސަލައެއްކަން އަބްދުﷲ ސާފުކޮށްދެއްވިއެވެ.
