ވެލާނާ އިންޓަނޭޝަނަލް އެއާޕޯޓުން ބަންގްލަދޭޝްއަށް ފުރަން އުޅުނުއިރު 81,000 އަށްވުރެ ގިނަ ޑޮލަރާއެކު ހައްޔަރުކުރެވުނު ފަރާތަށް ކްރިމިނަލް ކޯޓުން ވަނީ 12,000 ރުފިޔާގެ ޖޫރިމަނާއެއް ކަނޑައަޅާފައެވެ.
މި މައްސަލައިގައި ހައްޔަރުކުރެވުނީ ބަންގްލަދޭޝްގެ 32 އަހަރުގެ ޝަހުމިން އިސްލާމްއެވެ. އޭނާ މިދިޔަ އޮގަސްޓް 25 ވަނަ ދުވަހުގެ މެންދުރުފަހު ޔޫއެސް ބަންގްލާ އެއާލައިންސްގެ ފްލައިޓަކުން ޑާކާއަށް ފުރަން އުޅެނިކޮށް، އޭވިއޭޝަން ސެކިއުރިޓީން ބަލައި ފާސްކުރިއިރު، އޭނާގެ ބެކްޕެކްގައި އޮތް ކޯންފްލެކްސް ޕެކެޓެއްގައި ފޮރުވާފައި އޮތް 81,130 ޑޮލަރު (1.2 މިލިއަން ރުފިޔާ) ވަނީ ފެނިފައެވެ.
އިއުތިރާފް އެއްބަސްވުމެއްގެ ދަށުން ކޯޓަށް ހުށަހެޅުނު މި މައްސަލައިގައި، ޝަހުމިން ވަނީ ދަޢުވާއަށް އިޢުތިރާފުވެފައެވެ. އޭނާގެ އަމިއްލަ ފައިސާގެ ގޮތުގައި ހިފެހެއްޓިފައިވާ 4,500 ޑޮލަރު (69,390 ރުފިޔާ) އާއި 350 ޔޫރޯ (5,885 ރުފިޔާ) ފަސް ދުވަހުގެ ތެރޭގައި އޭނާއާ ހަވާލުކުރުމަށްފަހު، އެ ފައިސާއިން ޖޫރިމަނާގެ 12,000 ރުފިޔާ ދައްކާގޮތަށް ވަނީ އެއްބަސްވެފައެވެ.
ކްރިމިނަލް ކޯޓުން މިދިޔަ އާދީއްތަ ދުވަހު ކުރި ހުކުމުގައި، 15 ދުވަހުގެ ތެރޭގައި ޖޫރިމަނާ ފައިސާ މީރާއަށް ދެއްކުމަށާއި، އޭނާގެ އަތުން ފެނުނު 81,130 ޑޮލަރު ކަސްޓަމްސްއަށް ނެގުމަށް ވަނީ އަމުރުކޮށްފައެވެ. އިޝާރާތްކޮށްލަންޖެހޭ ކަމަކީ، ރާއްޖެއަށް ސިއްރުން މުދާ އެތެރެކުރުމާއި ރާއްޖެއިން ބޭރުކުރުމުގެ ކުށަށް ޤާނޫނުގައި ކަނޑައެޅިފައިވާ އަދަބަކީ ދެ އަހަރާ ހައެއް އަހަރާ ދެމެދުގެ މުއްދަތަކަށް ޖަލަށްލުން ނުވަތަ 10,000 ރުފިޔާއާއި 240,000 ރުފިޔާއާ ދެމެދުގެ އަދަދަކުން ޖޫރިމަނާކުރުން ކަމެވެ.
