މޯލްޑިވްސް މީޑިއާ ކައުންސިލް (އެމްއެމްސީ) އަދި ބްރޯޑްކާސްޓިން ކޮމިޝަން ކޮމިޓީއަށް ރައްޔިތުންގެ މަޖިލީހުގެ މިނިވަން މުއައްސަސާތަކާބެހޭ ކޮމިޓީއަށް ހާޒިރުކުރުމަށް ނިންމައިފިއެވެ. މިއީ ރައީސުލްޖުމްހޫރިއްޔާ އާއި ސަރުކާރުގެ އިސް ވެރިންނާއި ސަރުކާރުގެ އިދާރާތަކާ ގުޅޭގޮތުން ދޮގު ޚަބަރު ފަތުރާ މީޑިއާތަކަށް ފިޔަވަޅު ނާޅާ މައްސަލައާ ގުޅިގެންނެވެ.

މި ނިންމުން ނިންމީ ރައީސުލްޖުމްހޫރިއްޔާ އޮފީހުގެ ސްޓްރެޓެޖިކް ކޮމިއުނިކޭޝަން މިނިސްޓަރު އިބްރާހިމް ހަލީލު މައްސަލަ ބަލައިދިނުމަށް އެދި ފޮނުއްވި ސިޓީއަކާ ގުޅިގެންނެވެ. ހަލީލްގެ ސިޓީގައި ބަޔާންކޮށްފައިވަނީ ރައީސް މުޙައްމަދު މުޢިއްޒު އަދި ސަރުކާރުގެ ތަޞައްވުރަށް އަސަރުކުރާ ގޮތަށް ސޯޝަލް މީޑިއާގައި ދޮގު ޚަބަރުތައް ފަތުރަމުންދާ ކަމަށެވެ. އޭނާ ވިދާޅުވެފައިވަނީ މި ކަންކަން މީޑިއާ ކައުންސިލަށް ރިޕޯޓުކުރަމުން ގެންދިޔަ ނަމަވެސް، އެކަށީގެންވާ ފިޔަވަޅެއް އަޅާފައިނުވާ ކަމަށެވެ.

ހަލީލް ފާހަގަކޮށްފައިވަނީ މިދިޔަ ޖަނަވަރީ މަހުން ފެށިގެން 78 މައްސަލައެއް އެމްއެމްސީއަށް ހުށަހަޅާފައިވާ ކަމަށާއި، މި މައްސަލަތައް ބެލުމަށް އެދި އެމްއެމްސީގެ މެންބަރުންނާ ބައްދަލުކޮށް މަޝްވަރާކޮށްފައިވާ ކަމަށެވެ. އޭނާ އެދިފައިވަނީ މި މައްސަލަ ސީރިއަސް މައްސަލައެއްގެ ގޮތުގައި ބަލައި، އެމްއެމްސީން ފިޔަވަޅު ނާޅާ ސަބަބު އޮޅުންފިލުވައިދިނުމަށެވެ.

ސިޓީގައި ދިޔަވަރު ޑޮޓްކޮމް، ކުރުސީ ޑޮޓް ކޮމް އަދި ދޮން އަމާ ޑޮޓްކޮމް ފަދަ މީޑިއާތައް ވަނީ ފާހަގަކޮށްފައެވެ. މި މައްސަލައާ ގުޅިގެން ސުވާލުކުރުމަށް އެމްއެމްސީ އާއި ބްރޯޑްކާސްޓިން ކޮމިޝަން ކޮމިޓީއަށް ހާޒިރުކުރުމަށް ވަނީ ފާސްކޮށްފައެވެ.