ރޭ ފަތިހު ހުޅުލެއަށް 58 މޭލަށް ވައިގަދަވި ކަމަށް މޫސުމާ ބެހޭ ގައުމީ އިދާރާ އިން ހާމަކޮށްފިއެވެ.
މެޓް އޮފީހު ބުނީ ފަތިހު 5:40 ގައި ހުޅުލެއަށް 58 މޭލަށް ވައިބާރުވި ކަމަށް ރެކޯޑް ކުރެވިފައިވާ ކަމަށެވެ. ހުޅުލެއަށް އެންމެ ވައިބާރުވި ކަމަށް ރެކޯޑް ކުރެވިފައި ވަނީ ނޮވެމްބަރު 3، 1978 ގައެވެ. އެއީ 71.3 މޭލުގެ ބާރުމިނުގައި ކަމަށް ރިކޯޑުތަކުން ދައްކައެވެ.
ރާއްޖޭގައި މިހާތަނަށް އެންމެ ވައި ބާރުވީ ސ. ގަމަށެވެ. މެއި 29، 1991 ގައި ގަމަށް 103.5 މޭލުގެ ބާރުމިނުގައި ވައިޖެހިފައިވެއެވެ.
މި ދުވަސްވަރު ހުޅަނގު މޫސުމުގެ ބާރު ގަދަވެފައިވާ އިރު، ރާއްޖޭގެ ބޮޑު ސަރަހައްދަކަށް ވައިބާރުވެ، ކަނޑުތައް ގަދަވެ އަދި ވިއްސާރަކުރާނެ ކަމަށް މެޓް އޮފީހުން ވަނީ ލަފާކޮށްފައެވެ.
ރާއްޖޭގެ ބޮޑު ބަޔަކަށް މޫސުން ގޯސްވާނެ ކަމަށް ލަފާކޮށް، މިހާރު ވެސް އޮތީ ރީނދޫ ސަމާލު ނެރެފައެވެ. ރީނދޫ ސަމާލުގައި ބުނެފައި ވަނީ ގަޑިއަކު 25 މޭލާއި 30 މޭލާ ދެމެދުގެ ބާރުމިނުގައި ވައި ޖެހި، ވިލާގަނޑުގައި ގަޑިއަކު 50 މޭލަށް ވައިގަދަވެ ކަނޑުތައް ވަރަށް ގަދަވާނެ ކަމަށް ލަފާ ކުރެވޭ ކަމަށެވެ.
