މޫސުން ގޯސްވެދާނެކަމުގެ އިންޒާރު ދެމުން، މޫސުމާބެހޭ ޤައުމީ އިދާރާއިން ރީނދޫ ސަމާލު ނެރެފިއެވެ.
މި ސަމާލު ނެރެފައިވަނީ ތިލަދުންމަތީ އުތުރުބުރިން ފެށިގެން މާޅޮސްމަޑުލު ދެކުނުބުރިއާ ހަމައަށް ހިމެނޭ ސަރަޙައްދަށެވެ. އިދާރާއިން މަޢުލޫމާތު ދޭގޮތުގައި މި ސަމާލުގެ މުއްދަތަކީ މިއަދު ހެނދުނު 6:45 އިން ފެށިގެން ހެނދުނު 10:45 އާ ހަމައަށެވެ.
މި މުއްދަތުގެ ތެރޭގައި އެ ސަރަޙައްދުތަކަށް ބޯކޮށް ވާރޭވެހި، ގަދަފަދަ ގުގުރުމާއެކު މޫސުން ގޯސްވެދާނެކަމަށް މޫސުމާބެހޭ ޤައުމީ އިދާރާއިން ވަނީ އަންގާފައެވެ. އަދި މީގެއިތުރުން، ވިއްސާރައިގެ ތެރޭގައި ވައިގެ ބާރުމިން ގަޑިއަކު 45 މޭލަށް އަރައި، ވައިގަދަވެދާނެކަމަށްވެސް އިދާރާއިން ލަފާކޮށްފައިވެއެވެ. މި އިންޒާރާއެކު، އެ ސަރަޙައްދުތަކުގައި ދަތުރުފަތުރުކުރާ އަދި އުޅޭ ފަރާތްތަކުން ސަމާލުކަން ބެހެއްޓުމަށް އިރުޝާދު ދީފައިވާކަން ފާހަގަކުރެވެއެވެ.
