މާލޭގައި ގަވައިދާ ހިލާފަށް އުޅެމުން ދިޔަ ދެ ބިދޭސީއަކު އަތުލައިގެންފިއެވެ.
އިމިގްރޭޝަނުން ބުނީ އާންމު ސަލާމަތާއި ރައްކާތެރިކަމަށް ނުރައްކާވާފަދަ ތަންތަނުގައި ގަވާއިދާ ހިލާފަށް އުޅެމުންދާ ބިދޭސީން ބަލައި ފާސްކުރުމަށް ޓާސްކު ފޯސް އިން ކުރަމުންދާ މަސައްކަތުގައި އެމީހުން އަތުލައިގެންފައިވަނީ މާފަންނު ދެ ގެއަކުން ކަމަށެވެ.
އެ ދެބިދޭސީން ވެސް އެއިދާރާގެ ބެލުމުގެ ދަށަށް ގެންގޮސްފައިވާ ކަމަށް އިމިގްރޭޝަނުން ބުނެއެވެ.
ރައީސް ޑރ. މުހައްމަދު މުއިއްޒު، ވެރިކަމަށް ވަޑައިގެންނެވި ފަހުން އިމިގްރޭޝަން އިސްވެ އޮވެ، ފުލުހުންނާ ވެސް ގުޅިގެން ގަވައިދާ ހިލާފަށް އުޅޭ ބިދޭސީން އަތުލައިގަތުމަށް ތަފާތު އޮޕަރޭޝަންތައް ދަނީ ހިންގަމުންނެވެ. މި އޮޕަރޭޝަންގެ ދަށުން 4،000 އަށް ވުރެ ގިނަ ބިދޭސީން މިހާރު ވަނީ ޑީޕޯޓްކޮށްފައެވެ.
އިމިގްރޭޝަނުން ބުނި ގޮތުގައި މި އެންމެންނަކީ ގަވައިދާ ހިލާފަށް ރާއްޖޭގައި އުޅޭ މީހުންނެވެ.
