ގދ. ތިނަދޫއަށް ސިޓީއެއްގެ ދަރަޖަ ދިނުމުގައި މަކަރާއި ހީލަތާއި، ބޮޑެތި އޮޅުވާލުންތައް ހިމެނޭތީ ފިޔަވަޅު އަޅުއްވާ ދެއްވުމަށް އެދި އެ ދާއިރާގެ ޕާލަމެންޓް މެމްބަރު ސައުދުﷲ ހިލްމީ އެލްޖީއޭ (ލޯކަލް ގަވަރމެންޓް އޮތޯރިޓީ) އަށް ހުށަހަޅުއްވައިފިއެވެ.
ތިނަދޫއަށް ސިޓީގެ ދަރަޖަ ދީފައިވަނީ މިދިޔަ އަހަރުގެ އޮގަސްޓް 30 ވަނަ ދުވަހު، އޭރުގެ ރައީސް އިބްރާހިމް މުހައްމަދު ސޯލިހްގެ ސަރުކާރުންނެވެ. މި ނިންމެވުމަކީ ރިޔާސީ އިންތިހާބުގެ ދުވަސްވަރު ނިންމަވާފައިވާ ނިންމެވުމެކެވެ. ޑރ. މުއިއްޒުގެ އައު ސަރުކާރުން މި ނިންމެވުން ބަދަލުނުކުރައްވައި، މިކަމާ ގުޅޭ ގާނޫނީ އިޖުރާއަތްތައް ފުރިހަމަކުރައްވާފައިވެއެވެ.
ސައުދުﷲ ހިލްމީ ކުރައްވާފައިވާ ތުހުމަތުތަކުގެ ތެރޭގައި، ތިނަދޫ ކައުންސިލުން 2022 އިން ފެށިގެން އާބާދީގެ ތަފާސްހިސާބުތައް އޮޅުވާލައި، އެރަށަށް ސިޓީގެ ދަރަޖަ ދީފައިވަނީ ލާމަރުކަޒީ ގާނޫނާ ހިލާފަށް ކަމަށް ފާހަގަކުރައްވައެވެ. އެލްޖީއޭ އަދި ޑީއެންއާރުގެ ތަފާސްހިސާބުތަކުން ދައްކާގޮތުގައި ތިނަދޫގެ އާބާދީ އަކީ 8,000 އަށްވުރެ މަދު އަދަދެކެވެ. މީގެ އިތުރުން، އެހެން ރަށްރަށުގެ މީހުންނާއި މަރުވެފައިވާ މީހުންގެ ނަންތައް ރަޖިސްޓްރީގައި ހިމަނައި، އެއްބައި ނަންތައް ތަކުރާރުކޮށް ލިޔެފައިވާކަމަށްވެސް އޭނާ ތުހުމަތު ކުރައްވައެވެ.
ސައުދުﷲ ހިލްމީ އެލްޖީއޭއަށް ފޮނުއްވި ސިޓީގައި ވިދާޅުވެފައިވަނީ، ތިނަދޫއަށް ސިޓީއެއްގެ ދަރަޖަ ދިނުމުގައި ތިނަދޫ ކައުންސިލުން މަކަރާ ހީލަތް ހަދާ އޮޅުވާލާފައިވާނަމަ އެކަންއެންމެ ބޮޑަށް އެނގޭނެ ފަރާތަކީ، ކައުންސިލްތަކުގެ ބެލެނެވެރި ފަރާތްކަމަށްވާ އެލްޖީއޭކަމަށް ދެކޭތީ އެ މައްސަލަ އެލްޖީއޭއަށް ހުށަހެޅުއްވީ ކަމުގައެވެ.
އަދި މުސްތަގުބަލުގައި މިފަދަ ކަމެއް ތަކުރާރުވެދާނެތީ، މިމައްސަލަ ތަހުގީގު ކޮށްދިނުމަށް ކަމާއި ގުޅުންހުރި ފަރާތްތަކަށް ހުށަހަޅާދީ، މިމައްސަލާގައި ބޮޑެތި ގޯސްތަކެއް ހަދާފައިވާކަމަށް އެލްޖީއޭއަށް ފެންނަނަމަ ތިނަދޫ ކައުންސިލާމެދު ފިޔަވަޅު އަޅާދިނުމަށްވެސް ސައުދުﷲ އެދިފައި ވެއެވެ.
މި މައްސަލައާ ގުޅިގެން ކުރިން ވަނީ ތިމާވެށްޓާބެހޭ މިނިސްޓްރީގެ ކުރީގެ ޑެޕިއުޓީ މިނިސްޓަރު އަދި ގާނޫނީ ވަކީލު މުހައްމަދު ރާގިބު އަހުމަދު ވަނީ ހައިކޯޓަށް ދުސްތޫރީ މައްސަލައެއް ހުށަހަޅުއްވާފައެވެ. ނަމަވެސް މި މައްސަލަ ހުށަހެޅުއްވުމަށްފަހު ރާގިބު ވަނީ މަގާމުން ވަކިކުރެވިފައެވެ.
އެއަށްފަހު މިމައްސަލަ ތަހުގީގު ކުރުމަށް އޭނާވަނީ ދައުލަތުގެ ތަހުގީގީ މުވައްސަސާތަކަށްވެސް ހުށަހަޅުއްވާފައެވެ.
