ޤަވާޢިދާ ޚިލާފަށް އުޅޭ ބިދޭސީންގެ މައްސަލަ ރިޕޯޓުކުރުމަށް ތަޢާރަފުކުރި "އިމިގްރޭޝަން ވޮޗް" އަށް މިހާތަނަށް 1,000 އަށްވުރެ ގިނަ މައްސަލަ ހުށަހެޅިފައިވާކަމަށް މޯލްޑިވްސް އިމިގްރޭޝަނުން ބުނެފިއެވެ.
ޖުލައި 17 ގައި ތަޢާރަފުކުރެވުނު މި ޚިދުމަތަށް މިހާތަނަށް ޖުމްލަ 1,017 މައްސަލަ ހުށަހެޅިފައިވެއެވެ. މީގެ ތެރެއިން އެންމެ ގިނައިން ހުށަހެޅިފައިވަނީ ބިދޭސީން ގަވާއިދާ ޚިލާފަށް ވިޔަފާރިކުރާ މައްސަލަތަކާއި ވޯކް ވިސާގެ ގަވާއިދާ ޚިލާފުވެފައިވާ މައްސަލަތަކެވެ. މި ދެ ބާވަތުގެ މައްސަލަތަކުގެ އަދަދު ވަނީ 239 ގައެވެ.
އިމިގްރޭޝަނުން އިތުރަށް ހާމަކުރެއްވި ގޮތުގައި، މި ޕްލެޓްފޯމަކީ 24 ގަޑިއިރު މެދުނުކެނޑި މަޢުލޫމާތު ހުށަހެޅޭނެ ނިޒާމެކެވެ. އަދި މަޢުލޫމާތު ހުށަހަޅާ ފަރާތްތަކުގެ ސިއްރު ހިފެހެއްޓޭނެކަމާއި، އަދި ބޭނުންވާ ނަމަ ނަން ހާމަނުކޮށްވެސް މަޢުލޫމާތު ހުށަހެޅޭނެއެވެ.
މީގެ އިތުރުން، އިމިގްރޭޝަނާއި ގުޅުންހުރި އެހެނިހެން އިދާރާތަކާ ގުޅިގެން ހިންގާ އޮޕަރޭޝަންތަކުގައި މިހާތަނަށް 5,012 ބިދޭސީން ވަނީ ރާއްޖެއިން ފުރުވާލާފައެވެ. އަދި 1,300 އަށްވުރެ ގިނަ ތަންތަން ވަނީ ބަލައި ފާސްކޮށްފައެވެ.
