ބަންގްލަދޭޝްގެ ވެރިރަށް ޑާކާގައި ބޭއްވޭ އޭޝިއަން ޓޫރިޒަމް ފެއާ (އޭޓީއެފް) ގައި ބައިވެރިވެ، އެ ގައުމުގައި ފުރަތަމަ ފަހަރަށް ރާއްޖެ އިޝްތިހާރުކޮށްފިއެވެ.
މި ފެއާގައި އެމްއެމްޕީއާރްސީ އާއި އެކު ނެޝަނަލް ހޮޓެލް އެންޑް ގެސްޓްހައުސް އެސޯސިއޭޝަން އޮފްދަ މޯލްޑިވްސް (އެންއެޗްޖީއޭއެމް) އަދި މޯލްޑިވްސް އެސޯސިއޭޝަން އޮފް ޓްރެވަލް އެޖެންޓްސް އެންޑް ޓުއާ އޮޕަރޭޓާސް (މަޓާޓޯ) އިން ބައިވެރިވެފައިވެއެވެ.
އެމްއެމްޕީއާރްސީ އިން ބުނެފައިވާ ގޮތުގައި މި ފެއާގައި ބައިވެރިވުމުގެ މަޤްޞަދަކީ ދެކުނު އޭޝިއާގެ ގައުމުތަކުގައި ރާއްޖޭގެ ފަތުރުވެރިކަން އިޝްތިހާރުކުރުމަށް ކުރަމުންދާ މަސައްކަތުގެ ބައެއްގެ ގޮތުންނެވެ. މި ފުރުސަތު ވަނީ ރަނުގެ ފުރުސަތެއްގެ ގޮތުގައި ސިފަކޮށްފައެވެ. އެންއެޗްޖީއޭއެމް އިން ފާހަގަކޮށްފައިވާ ގޮތުގައި ބަންގްލަދޭޝްއަކީ ރާއްޖޭގެ ފަތުރުވެރިކަމުގައި މުހިންމު މާކެޓަކަށް ހެދުމުގެ ފުރުސަތު އޮތް ގައުމެކެވެ. އަދި ރަނގަޅަށް އިޝްތިހާރުކުރެވިއްޖެނަމަ ބަންގްލަދޭޝްއިން ރާއްޖެ އަންނަ ފަތުރުވެރިންގެ އަދަދު އިތުރުކުރެވޭނެ ކަމަށް އެ އެސޯސިއޭޝަނުން ދެކެއެވެ.
މިއަހަރުގެ ޖުލައި މަހުގެ ނިޔަލަށް ހާމަކޮށްފައިވާ ތަފާސްހިސާބުތަކަށް ބަލާއިރު، އެ މުއްދަތުގައި ބަންގްލަދޭޝްއިން 18،843 ފަތުރުވެރިން ރާއްޖެއަށް ޒިޔާރަތްކޮށްފައިވެއެވެ. މިއީ އެންމެ ގިނަ ފަތުރުވެރިން ރާއްޖެ އައި ގައުމުތަކުގެ ތެރެއިން 14 ވަނަ ގައުމެވެ. މި ފެއާގައި ބައިވެރިވުމަކީ ރާއްޖޭގެ ފަތުރުވެރިކަމުގެ ދާއިރާއަށް އިތުރު ކުރިއެރުމެއް ލިބި، ބަންގްލަދޭޝްއިން ރާއްޖެއަށް އަންނަ ފަތުރުވެރިންގެ އަދަދު އިތުރުވެގެންދާނެ ކަމެއްކަމަށް އުންމީދުކުރެވެއެވެ.
