ޓިކްޓޮކް ލައިވްއެއްގައި ރާއްޖެ ޓީވީގެ ނޫސްވެރިޔާ ލައިޝާ އަހުމަދު ޒަކީ އާ ދިމާލަށް އަވަގުރާނަ ގޮވައި އަބުރު ކަތިލި މީހުންނަށް މާފުދީ މައްސަލަ އަނބުރާ ނަގައިފިއެވެ.
ލައިޝާ އަށް ފާޑު ކިޔުން އަމާޒުވީ "ދިވެހި ފިރިހެނަކު އަނެއްކާވެސް ޓިކްޓޮކްގައި އެއް ޖިންސުން ގުޅުން ހިންގުން ޕްރޮމޯޓު ކުރަނީ" މި ސުރުހީގެ ދަށުން ލިޔުނު ހަބަރަކާ ގުޅިގެންނެވެ. އެ ލައިވްގައި ދިވެހިންތަކެއް ވަނީ ލައިޝާ އާއި އޭނާގެ އާއިލާއަށް ހަޑި ހުތުރު އެއްޗެހި ގޮވާ އެ މީހުންގެ ބޮލުގައި ގިނަ ތުހުމަތުތަކެއް އަޅުވައިފައެވެ. އެގޮތުން ލައިވްގައި ވާހަކަ ދެއްކި މީހުން ވަނީ ލައިޝާއަކީ "ހަށިވިއްކާ" ނޫސްވެރިއެއް ކަމަށް ބުނެ ވެސް ފާޑު ކިޔައިފައެވެ.
ނަމަވެސް ލައިވްގައި އެ ވާހަކަ ދެއްކި މީހުން ފަހުން ވަނީ ލައިޝާގެ ކިބައިން މައާފަށް އެދިފައެވެ.
ލައިޝާ "އެކްސް" ގައި ކުރި ޕޯސްޓެއްގައި ބުނީ ޖިނާއީ ތަހުގީގު ކޮށްދިނުން އެދި ދިވެހި ފުލުހުންގެ ހިދުމަތަށް ހުށަހެޅި މައްސަލަ އާއި އަބުރުގެ ދައުވާކޮށް ދިނުމަށް އެދި ވަކީލުންގެ ފަރާތުން ހުށަހެޅި ދައުވާ އާ ގުޅިގެން އެމީހުން މާފަށް އެދިފައިވާ ކަމަށެވެ. އަދި މަންމަ އާއި ބައްޕަގެ ލަފާގެ މަތިން ޖިނާއީ ތަހުގީގު ކޮށްދިނުން އެދި ހުށަހަޅާފައިވާ މައްސަލަ ފައިލްކޮށްދިނުމަށް އެދުމަށާއި، އަބުރުގެ ދައުވާގެ މަދަނީ މައްސަލަ އަނބުރާ ނެގުމަށް ނިންމާފައިވާ ކަމަށެވެ.
"އަނެއް ކަމަކީ އެމީހުން މާފަށް އެދުމުން ސައިޒްވީކަމަށް ފަދަ އިބާރަތްތަކުން ކުރާ ކޮމެންޓުތައް ނުކުރުމަށް އަޅުގަނޑު ވަރަށް ބޮޑަށް އެދެން އަދި މި މައްސަލައާ ގުޅުވައި އެމީހުންނަށްވެސް އިތުރު އެއްވެސް ފުރައްސާރައެއް ނުވަތަ މަލާމާތެއް ނުކުރުމަށް އަޅުގަނޑު އެދެން. އެމީހުންނަށް ބަޔަކު އިންޒާރުދީ ބިރު ދެއްކުން ފަދަ އެއްވެސް އިންޒާރެއް ނުވަތަ ކުޑަވެސް އެފަދަ އަމަލެއް އަޅުގަނޑާއި، އަޅުގަނޑާ ގުޅުން ހުރި މީހެއްގެ ފަރާތުންވެސް މި ވަގުތާ ހިސާބަށްވެސް ހިނގާފައި ނުވާނެ އަދި ނުވެސް ހިނގާނެ." ލައިޝާ ބުންޏެވެ.
ލައިޝާއަށް ޓިކްޓޮކް ލައިވްއެއްގައި އަވަގުރާނަ ގޮވައި އަބުރު ކަތިލި މައްސަލަ މޯލްޑިވްސް ޖާނަލިސްޓު އެސޯސިއޭޝަން (އެމްޖޭއޭ) އިން ވެސް ވަނީ ކުށްވެރިކޮށްފައެވެ. އެމްޖޭއޭއިން ނެރުނު ބަޔާނެއްގައި ބުނެފައިވަނީ ލައިޝާއަށް ޖިންސީ ފުރައްސާރަކުރި މައްސަލަ އެ ޖަމިއްޔާއިން ކުށްވެރިކުރާ ކަމަށާއި އެމައްސަލަ ވީ އެންމެ އަވަހަކަށް ތަހުގީގުކޮށް އެކަމުގައި ބައިވެރިވި މީހުންނަށް ފިޔަވަޅު އަޅަން ޖެހޭ ކަމަށެވެ.
އެމްޖޭއޭއިން ބުނީ މިފަދަ އަމަލުތަކަކީ އަންހެން ނޫސްވެރިން މި ދާއިރާގައި ކުރިއަށް ދިޔުމަށް އެޅޭ ހުރަހެއްގެ ގޮތުގައި ދެކޭ ކަމަށެވެ. އަދި ނޫސްވެރިންނަށް ބިރު ދައްކައި ފުރައްސާރަ ކުރުމަށް ހިންގޭ މިފަދަ އެންމެހާ އަމަލުތައް ހުއްޓާލައި، އުފެއްދުންތެރި ބިނާކުރަނިވި ގޮތުގައި ނޫސްވެރިންނަށް ފާޑުކިޔުމަށް ވެސް އެ ޖަމިއްޔާއިން ވަނީ ގޮވާލައިފައެވެ.
ހަމައެއާއެކު މިފަދަ ކަންކަން ދައުލަތުގެ އެންމެހާ އިދާރާތަކުން ސީރިއަސްކޮށް ނަގައި، ނޫސްވެރިންނަށް ރައްކާތެރި މާހައުލެއް ކަށަވަރުކޮށްދޭން އަޅަން ޖެހޭ އެކަށީގެންވާ ފިޔަވަޅުތައް އެޅުމަށްވެސް އެމްޖޭއޭ އިން ވަނީ ގޮވާލައިފައެވެ.
