އިސްލާމީ މަރުކަޒާއި ބޮޑުތަކުރުފާނު މިސްކިތް ހުޅުވުނުތާ 40 އަހަރު ފުރުން ފާހަގަކުރުމަށް ޚާއްޞަ ހަފްލާއެއް ބޭއްވުމަށް އިސްލާމިކް މިނިސްޓްރީން ނިންމައިފިއެވެ. މި އިމާރާތް ހުޅުވުނީ 1984 ވަނަ އަހަރު، ކުރީގެ ރައީސް މައުމޫނުގެ ވެރިކަމުގެ ކުރީކޮޅުގައެވެ. އިސްލާމީ ބައެއް ޤައުމުތަކުގެ އެހީތެރިކަމާއެކު ބިނާކުރެވުނު މި އިމާރާތަށް މިއަހަރު 40 އަހަރު ފުރޭނެއެވެ.
އިސްލާމިކް މިނިސްޓަރު ޑރ. މުޙައްމަދު ޝަހީމް ޢަލީ ސަޢީދު ވިދާޅުވެފައިވަނީ އިސްލާމީ މަރުކަޒު ހުޅުވުނުތާ 40 އަހަރު ފުރޭނީ މިއަހަރުގެ ނޮވެމްބަރު 11 ވަނަ ދުވަހު ކަމަށެވެ. މި މުނާސަބަތު ފާހަގަކުރުމަށް ޚާއްޞަ ހަފްލާއެއް ބޭއްވުމަށް ރައީސް ޑރ. މުޙައްމަދު މުޢިއްޒު އިރުޝާދު ދެއްވާފައިވާ ކަމަށްވެސް މިނިސްޓަރު ފާހަގަކުރެއްވިއެވެ.
އިސްލާމީ މަރުކަޒުގެ ޚާއްޞަ ބިނާއަކީ ރާއްޖޭގައި އިސްލާމީ ޝަޚްޞިއްޔަތާއި އިސްލާމީ އަގީދާ އެންމެ ވަރުގަދައަށް ފާޅުކޮށްދޭ ރަމްޒެއްގެ ގޮތުގައި ބެލެވެއެވެ. މި މިސްކިތުގައި އެއްފަހަރާ 4500 މީހުންނަށް އަޅުކަން ކުރެވޭނެ ޖާގަ ހުރެއެވެ. އަދި އިސްލާމިކް މިނިސްޓްރީގެ މަސައްކަތްތައްވެސް ހިންގަމުން ގެންދަނީ މި އިމާރާތުގައެވެ.
