މޯލްޑިވްސް މީޓިއޮރޮލޮޖިކަލް ސާވިސް (މެޓް) އިން ރާއްޖޭގެ ގިނަ ސަރަހައްދުތަކަށް ވައިޓް އެލާޓް ނެރެފައިވެއެވެ. މި އެލާޓް ނެރެފައިވަނީ ހއ އަތޮޅުން ފެށިގެން ވ އަތޮޅާ ހަމައަށް އަދި އދ އަތޮޅުން ފެށިގެން ލ އަތޮޅާ ހަމައަށެވެ.
ހއ އިން ވ އަތޮޅަށް މިއަދު ހެނދުނު 7 އިން މެންދުރު 1 އާ ހަމައަށް ގަޑިއަކު 19-24 މޭލުގެ ބާރުމިނުގައި ވައިޖެހޭނެކަމަށް ބެލެވެއެވެ. ވިލާގަނޑުން ވައިޖެހޭނެކަމަށް ލަފާކުރެވެނީ ގަޑިއަކު 45 މޭލުގެ ބާރުމިނުގައެވެ. އަދި ކަނޑުތައް ގަދަވާނެކަމަށްވެސް މެޓް އޮފީހުން ބުނެފައިވެއެވެ.
އދ އިން ލ އަތޮޅާ ހަމައަށް ނެރެފައިވާ ވައިޓް އެލާޓްގެ މުއްދަތަކީ މިއަދު ހެނދުނު 7 އިން މެންދުރު 12 އާ ހަމައަށެވެ. މި ސަރަހައްދުގައި ބޯކޮށް ވާރޭވެހި، ގުގުރުމާއެކު ވިލާގަނޑުގައި ގަޑިއަކު 45 މޭލުގެ ބާރުމިނުގައި ވައިޖެހޭނެކަމަށް ބެލެވެއެވެ.
މާދަމާގެ މޫސުމަށް ބަލާއިރު، ހުޅުލެ އާއި ހަނިމާދޫއަށް އާދައިގެ ވަރަކަށް ވާރޭވެހޭނެކަމަށް ލަފާކުރެވޭއިރު، ކައްދޫ، ކާޑެއްދޫ އަދި ގަމަށް ތުނިކޮށް ވާރޭވެހޭނެކަމަށް މެޓް އޮފީހުން ލަފާކޮށްފައިވެއެވެ.
މިދިޔަ ހަފްތާއިން ފެށިގެން ރާއްޖޭގެ ގިނަ ސަރަހައްދުތަކަށް ބޯކޮށް ވާރޭވެހި، އިންތިހާއަށް ވައިގަދަވުމުގެ ސަބަބުން ނޭޝަނަލް ޑިޒާސްޓާ މެނޭޖްމަންޓް އޮތޯރިޓީ (އެންޑީއެމްއޭ) އާއި އެހެނިހެން މުއައްސަސާތައް ގުޅިގެން މާލެ އާއި އަތޮޅުތެރޭގައި ފެންބޮޑުވުމުގެ މައްސަލަ ހައްލުކުރުމާއި، ގެދޮރަށް ލިބޭ ގެއްލުންތަކުގައި ހާލުގައި ޖެހޭ ފަރާތްތަކަށް އެހީތެރިވުމުގެ މަސައްކަތް ކުރަމުން ގެންދެއެވެ.
