ވޭތުވެދިޔަ 24 ގަޑިއިރުގެ ތެރޭގައި ރާއްޖޭގެ އެންމެ ބޯ ވާރޭ ވެހުނީ ހުޅުލެއަށް ކަމަށް، މޫސުމާބެހޭ ޤައުމީ މަރުކަޒު (މެޓް) އިން ބުނެފިއެވެ. މެޓް އޮފީހުން ހާމަކުރި ގޮތުގައި، މި މުއްދަތުގައި ހުޅުލެއަށް 118.3 މިލިމީޓަރުގެ ވާރޭ ވެހުނެވެ.
މެޓްގެ ތަފާސްހިސާބުތަކުން ދައްކާ ގޮތުގައި، އިއްޔެ ހެނދުނު 8:00 އިން މިއަދު ހެނދުނު 8:00 އާ ހަމައަށް، ދެވަނައަށް އެންމެ ގިނަ ވާރޭ ވެހުނީ އއ. ތޮއްޑޫއަށެވެ. އެރަށަށް 101.8 މިލިމީޓަރުގެ ވާރޭ ވެހުނެވެ. ތިންވަނައަށް އެންމެ ގިނަ ވާރޭ ވެހުނީ މާލެ އާއި ހުޅުމާލެއަށެވެ. މާލެއަށް 85.0 މިލިމީޓަރު އަދި ހުޅުމާލެއަށް 85.8 މިލިމީޓަރުގެ ވާރޭ ވެހުނެވެ.
މިއަދުގެ ހަވީރު 18:00 އަށް މެޓްއިން ނެރުނު މޫސުމުގެ ލަފާގައި ބުނެފައިވަނީ ރާއްޖޭގެ އެކި ސަރަހައްދުތަކަށް ވިއްސާރަވެ، ބައެއް ރަށްރަށަށް ބޯކޮށް ވާރޭވެހި، ގުގުރުމާއެކު ވާރޭވެހުން އެކަށީގެންވާ ކަމަށެވެ.
އަދި ހުޅަނގާއި ހުޅަނގު އުތުރުން ގަޑިއަކު 8 މޭލާއި 18 މޭލާ ދެމެދުގެ ބާރުމިނުގައި ވައިޖެހޭނެ ކަމަށާއި، ވިއްސާރައިގެ ތެރޭގައި ގަޑިއަކު 40 މޭލުގެ ބާރުމިނަށް ވައި ގަދަވެދާނެ ކަމަށް ބުނެފައިވެއެވެ. ކަނޑު އާންމު މިންވަރަކަށް ގަދަވެ، ވިއްސާރައިގެ ވަގުތުތަކުގައި އިތުރަށް ގަދަވެދާނެ ކަމަށާއި، ރާޅުގެ އުސްމިން 2 ފޫޓާއި 6 ފޫޓާ ދެމެދުގައި ހުންނާނެ ކަމަށްވެސް މެޓްއިން ލަފާކޮށްފައިވެއެވެ.
