މެލޭޝިއާގައި 22 އަހަރުގެ ދިވެހި އަންހެނަކު ހައްޔަރުކޮށްފައިވާ ކަމަށް އެ ގައުމުގެ މީޑިއާތަކުން ރިޕޯޓުކޮށްފިއެވެ. މި ހައްޔަރުކުރުން ހިނގީ އިންސާނީ ވަގުފާރީގެ ޝިކާރައަކަށްވެފައިވާ މީހުން ހޯދުމަށް މެލޭޝިއާގެ ކަމާބެހޭ އިދާރާތަކުން މިދިޔަ ހުކުރު ދުވަހު ހިންގި އޮޕަރޭޝަނެއްގައެވެ.
މެލޭޝިއާގެ ނޫސްތަކުން ރިޕޯޓުކުރާ ގޮތުގައި، މި ދިވެހި އަންހެން މީހާ ހައްޔަރުކޮށްފައިވަނީ މެލޭޝިއާގެ އިމިގްރޭޝަން ގާނޫނުގެ 55 ވަނަ މާއްދާގެ (ޑީ) އާ ޚިލާފުވުމުގެ ތުހުމަތުގައެވެ. މި މާއްދާގައި ބަޔާންކޮށްފައިވަނީ، އިމިގްރޭޝަން ގާނޫނުގެ ދަށުން ވިސާ، ހުއްދަ، ފާސް ނުވަތަ ސެޓްފިކެޓެއް ހެއްދުމަށް ދޮގު ލިޔުމެއް ތައްޔާރުކުރުން، ފޯޖުކުރުން ނުވަތަ ބަދަލުކުރުމަކީ ކުށެއް ކަމަށެވެ.
މި ކުށުގެ އަދަބުގެ ގޮތުގައި، 30,000 ރިންގިޓަށްވުރެ މަދުނޫން އަދި 100,000 ރިންގިޓަށްވުރެ ގިނަ ނުވާ އަދަދަކުން ޖޫރިމަނާކުރުމާއި، 5 އަހަރަށްވުރެ މަދުނޫން އަދި 10 އަހަރަށްވުރެ ގިނަ ނުވާ މުއްދަތަކަށް ޖަލަށްލުން ހިމެނެއެވެ. މީގެ އިތުރުން، 6 ފަހަރު ހައްދުޖެހުންވެސް އަދަބުގެ ތެރޭގައި ހިމެނެއެވެ.
ފެޑެރަލް ކްރިމިނަލް އިންވެސްޓިގޭޝަން ޑިޕާޓްމަންޓުގެ ޑިރެކްޓަރގެ ބަހާ ހަވާލާދީ ނޫސްތަކުން ރިޕޯޓުކޮށްފައިވާ ގޮތުގައި، ޖަލަން އަމްޕަންގައި ހުންނަ ކޮންޑޯމިނިއަމް ކޮމްޕްލެކްސްއެއްގައި ހިންގުނު މި އޮޕަރޭޝަންގައި ތަންޒޭނިއާގެ އަންހެނަކު ސަލާމަތްކުރެވުނެވެ. އަދި އެފްރިކާއަށް ނިސްބަތްވާ 20 މީހަކު ވެސް ވަނީ ހައްޔަރުކޮށްފައެވެ.
