ރާއްޖޭގެ ފަތުރުވެރިކަން ކުރިއެރުވުމަށް ކުރެވިދާނެ ކަންކަމާ ގުޅޭ ގޮތުން ގުޅުން ބަދަހިކުރަން އިންޑިއާގެ ސަފީރު މުނޫ މަހާވަރާ، ޓޫރިޒަމް މިނިސްޓަރު އިބްރާހިމް ފައިސަލް އާ އިއްޔެ ބައްދަލު ކުރައްވައިފިއެވެ.
ޓޫރިޒަމް މިނިސްޓްރީގައި އޮތް މި ބައްދަލުވުމުގައި އެއްބާރުލުން ދޭނެ ދާއިރާތަކާ ގުޅޭ ގޮތުން މަޝްވަރާކޮށް، މުސްތަގްބަލްގައި އެހީތެރިވެވޭނެ ގޮތްތަކާ ގުޅޭ ގޮތުން މަޝްވަރާ ކުރިއެވެ.
އިންޑިއާގެ ސަފީރާ، މިނިސްޓަރު ބައްދަލުކުރެއްވިއިރު، އެ ގައުމުން އަންނަ ފަތުރުވެރިން އިތުރު ކުރުމަށް ހާއްސަ ހަރަކާތްތަކެއް ހިންގަން ވަނީ ފަށައިފައެވެ.
ރާއްޖެއަށް މިދިޔަ އަހަރު އެންމެ ގިނަ ފަތުރުވެރިން އައީ އިންޑިއާ އިންނެވެ. އެ ގައުމުން އެކަނި ވެސް 200،000 އަށް ވުރެ ގިނަ ފަތުރުވެރިން ރާއްޖެ ޒިޔާރަތް ކުރިއެވެ. އެކަމަކު، މި އަހަރު އެ ގައުމުން އަންނަ ފަތުރުވެރިންގެ އަދަދު ދަށަށް ގޮސް އިންޑިއާ އޮތީ ލިސްޓުގެ ހަ ވަނައިގައެވެ.
