މިހާރު ހިނގަމުންދާ 20 ވަނަ ރައްޔިތުންގެ މަޖިލީހުގެ ގަވާއިދު އެކުލަވާލަން އިތުރު އެއް މަސް ދުވަސް ދިނުމަށް މަޖިލީހުން ފާސްކޮށްފިއެވެ.
މިއަދު ކުރިޔަށްދިޔަ ޖަލްސާ ފައްޓަވަމުން ރިޔާސަތުގައި އިންނެވި މަޖިލީހުގެ ރައީސް އަބްދުއްރަހީމް އަބްދުﷲ ވިދަޅުވީ މަޖިލީހުގެ ގަވާއިދު އެކުލަވާލުމުގެ މަސައްކަތްކުރަމުން އަންނަ އާންމު ކޮމިޓީން އެމަސައްކަތަށް އިތުރު ވަގުތު ބޭނުންވާކަން ސިޓީއަކުން އަންގާފައިވާކަމަށެވެ. އެގޮތުން އެސިޓީގައި މަޖިލީހުގެ ގަވާއިދު އެކުލަވާލުމަށް ރައްޔިތުންގެ މަޖިލީހުން ކަނޑައަޅާފައިވާ ސުންގަޑި ހަމަވާން ކައިރިވެފައިވާތީ އެމަސައްކަތް ނިންމުމަށް އިތުރު އެއް މަސް ދުވަސް ދިނުމަށް ކޮމިޓީން އެދިފައިވާކަމަށް އަބްދުއްރަހީމް ވިދާޅުވިއެވެ.
މިކަމަށް މިއަދުގެ ޖަލްސާގައި ވޯޓަށް އަހާފައިވާއިރު ވޯޓުގައި ބައިވެރިވެވަޑައިގެންނެވި 83 މެމްބަރުންގެ އިއްތިފާގުން ވަނީ އިތުރު އެއް މަސް ދުވަސް ދިނުމަށް ފާސްކޮށްފައެވެ.
މަޖިލީހުގެ ގަވާއިދު އެކުލަވާލުމުގެ މަސައްކަތް އާންމު ކޮމިޓީއާ ހަވާލުކޮށްފައިވަނީ މިދިޔަ މެއި މަހުގެ 28 ވަނަ ދުވަހު ބޭއްވި 20 ވަނަ ރައްޔިތުންގެ މަޖިލީހުގެ ފުރަތަމަ ޖަލްސާގައެވެ. އެދުވަހު ނިންމާފައިވަނީ މިމަހުގެ 26 ވަނަ ދުވަހުގެ ނިޔަލަށް ގަވާއިދުގެ މަސައްކަތް ނިންމާ ތަޅުމަށް ހުށަހެޅުމަށެވެ.
