ރައްޔިތުންގެ މަޖިލިހުގެ މެމްބަރުންގެ ތެރެއިން ޖުޑީޝަލް ސާވިސް ކޮމިޝަން (ޖޭއެސްސީ) އަށް ކަނޑައަޅާ މެމްބަރަކަށް މާފުށީ ދާއިރާގެ ޕީއެންސީގެ މެމްބަރު ހުސައިން ރިޒާ އައްޔަން ކުރުމަށް މަޖިލިހުން މިއަދު ފާސްކޮށްފިއެވެ.
މަޖިލިހުގެ ޖަލްސާގައި ރިޒާގެ ނަން ފާސްކޮށްފައި ވަނީ ވޯޓުގައި ބައިވެރިވެވަޑައިގެންނެވި 83 މެމްބަރުންގެ އިއްތިފާގުންނެވެ.
ރިޒާގެ ނަން މަޖިލިހުގެ ތަޅުމަށް ހުށަހެޅުއްވީ މަނަދޫ ދާއިރާގެ ޕީއެންސީގެ މެމްބަރު ހުސްނީ މުބާރަކެވެ. އަދި އެ ނަމަށް ތާއީދު ކުރެއްވީ މާފަންނު ދެކުނު ދާއިރާގެ ޕީއެންސީގެ މެމްބަރު އަބްދުﷲ ރިފާއު (ބޮޗޭ)އެވެ.
ރިޒާއަކީ ރައްޔިތުންގެ މަޖިލިހުގައި ގުރައިދޫ ދާއިރާ ތަމްސީލް ކުރެއްވި އިބްރާހިމް ރިޒާގެ ކޮއްކޮއެވެ.
ކްރިމިނަލް ކޯޓުގެ ރަޖިސްޓްރާގެ މަގާމު ވެސް ފުރުއްވި ރިޒާ ވަނީ ގާނޫނީ ދާއިރާއިން ތައުލީމު ހާސިލް ކުރައްވައި ޝަރީއާއިން މާސްޓާސް ހާސިލް ކުރައްވައިފައެވެ. ކެންސަރުގެ އާލާސްކަންފުޅުގައި ހުސައިން ރިޒާގެ ބޭބެ އިބްރާހިމް ރިޒާ 2022 ގައި އަވަހާރަ ވެފައިވާއިރު އިބްރާހިމް ރިޒާ ވެސް ޖޭއެސްސީގެ މެމްބަރުކަން ކުރެއްވިއެވެ.
އެންމެ ފަހުން ރައްޔިތުންގެ މަޖިލިހުން ޖޭއެސްސީ އަށް ކަނޑައަޅާފައި ވަނީ ތުޅާދޫ ދާއިރާގެ ކުރީގެ މެމްބަރު ހިސާން ހުސައިނެވެ. އޭނާ ވަނީ ޖޭއެސްސީގެ ރައީސްކަން ވެސް ކުރައްވައިފައެވެ.
