ރަމަޟާން މަސް އަލްވަދާޢު ކީ ކަމުގައި ވިނަމަވެސް، ފުރިހަމަ މުއުމިނަކު ދުވަހަކުވެސް ހެޔޮ އަމަލު ކުރުމަށް އަލްވަދާޢެއް ނުކިޔާނެ ކަމުގައި މިއަދުގެ ހުކުރު ޚުޡުބާގައި ވިދާޅުވެއްޖެއެވެ.
"ރަމަޟާން މަހަށްފަހު ހެޔޮ ޢަމަލުކުރުންމަތީ ދެމި ތިބޭށެވެ!" މި މައުޟޫއަށް ޚާއްސަ ކުރެވިގެންދިޔަ މިއަދުގެ ހުކުރު ޚުޡުބާގައި ވިދާޅުވީ އެހެންކަމުން މުސްލިމުންނަށް އޮތީ ރަމަޟާންމަސް ނިމުނު ކަމުގައިވި ނަމަވެސް، ހެޔޮ އަމަލުކުރުންމަތީ ދެމި ތިބުން ކަމުގައެވެ.
ޔަގީން ވެގެންވާ މަރު އަހަރެމެންނާ ބައްދަލު ކޮށްފުމަށް ދާންދެނެވެ. އަޅުކަން ކުރުމަކީ، އަހަރެމެން ޚަލްޤު ކުރެއްވުމުގެ މަޤްސަދެވެ.
މިއަދުގެ ޚުޡުބާގައި ވިދާޅުވެފައި ވެއެވެ.
މިއަދުގެ ހުކުރު ޚުޡުބާގައި ވިދާޅުވީ މުސްލިމަކު ހެޔޮ އަމަލު ކުރުމަށްފަހު އެންމެ މުހިންމު ކަމަކީ އެ ޢަމަލު ގަބޫލުކުރައްވާތޯ ދެންނެވުމާއި، އެ ޢަމަލު ކުރުންމަތީ ދެމިހުރުމުގެ ތައުފީގަށް އެދި ދުއާ ދެންނެވުން ކަމުގައެވެ. އެގޮތުން ރަމަޟާންމަސް މުސްލިމުންނާއި ވަކިވެގެން ދަނީ ޝައްވާލްމަހުގެ 6 ރޯދައިގެ ނިއުމަތަށް މަގުފަހި ކޮށްދެމުންކަން ބަޔާން ކޮށްދެމުން ޚުޡުބާގައި ވަނީ ކޮންމެ މީހަކީވެސް ހެޔޮކަމަށް އެދޭ މީހަކަށް ވުމަށް ނަސޭހަތްތެރި ވެފައެވެ.
އަދި ދީލަތިވަންތަ މި ނިއުމަތުގެ ބޭނުން ހިފާ، މުޅި އަހަރުދުވަހުގެ ރޯދަ ހިފުމުގެ ސަވާބު ލިބިގަތުމަށް ޚުޡުބާގައި ނަސޭހަތްތެރި ވެފައިވެއެވެ. އަދި ކުރިން ކުރެވިފައިވާ ހެޔޮ ޢަމަލުތަކަކީ ގިނަގުނަ އަމަލުތަކެއް ކަމުގައި ދެކިގެން ނުވާނެކަން ބަޔާން ކުރައްވަމުން ޚުޡުބާގައި ވިދާޅުވީ ކުރެވުނު ހެޔޮ ޢަމަލުތަކަށްޓަކާ ބޮޑާވެ އެއީ މާގިނަ ހެޔޮ ޢަމަލުތައް ކަމުގައި ދެކޭނަމަ އެއަމަލުތައް ބާޡިލްވެގެން ހިގައިދާނެ ކަމުގައެވެ.
