ވިލިމާލޭގައި ގާއިމްކުރުމަށް މިސަރުކާރުން ނިންމާފައިވާ 100 އނެދުގެ ޓާޝަރީ ހޮސްޕިޓަލްގެ މަސައްކަތް ވަރަށް އަވަހަށް ފެށިގެންދާނެ ކަމުގައި ރައީސް މުއިއްޒު ވިދާޅުވެއްޖެއެވެ.
އެމަނިކުފާނު މިހެން ވިދާޅުވީ ރައީސް އޮފީހުން ކުރިޔަށް ގެންދާ "ރައީސްގެ ޖަވާބު" ސިލްސިލާގެ މިއަދުގެ ސެގްމަންޓުގައި މާލެ ސިޓީ، ވ.ފަޒީލާމަންޒިލް، އަޙުމަދު ޝިފާން ކުރި ސުވާލަށް ޖަވާބު ދެއްވަމުންނެވެ.
ޝިފާން ސުވާލު ކޮށްފައިވަނީ ވިލިމާލެއިން އަދިވެސް ރަގަޅު ފެންވަރުގެ ސިއްޙީ ޚިދުމަތް ލިބެމުން ނުދާތީ އެ އަވަށުގެ ހަސްފަތާލުގައި ދޭ ޞިއްޙީ ޚިދުމަތުގެ ފެންވަރު ރަނގަޅުކޮށްދެއްވާނީ ކޮންއިރަކުންތޯއެވެ.
އޭނާ ސުވާލުގެ ޖަވާބުގައި ރައީސް މުއިއްޒު ވިދާޅުވީ ސިއްޙީ ޚިދުމަތް ރަގަޅު ކުރުމަކީ މި ސަރުކާރުގެ ވަރަށް މުހިންމު ސިޔާސަތެއް ކަމުގައެވެ.
ރައީސް ވިދާޅުވީ ޗައިނާގެ ހިލޭ އެހީގެ ދަށުން، ވިލިމާލޭގައި 100 އެނދުގެ ޓާޝަރީ ހޮސްޕިޓަލެއް އެޅުމަށް ނިންމާފައިވާ ކަމަށާއި، މިހާރު ކުރިޔަށް ދަނީ ޗައިނާގެ ކަމާބެހޭ އިދާރާގެ ބޭފުޅުންނާއި ރާއްޖޭގެ ކޮންސްޓްރަކްޝަން މިނިސްޓްރީއާއި އަދި ހެލްތު މިނިސްޓްރީއާއި ގުޅިގެން ކުރާންޖެހޭ ޓެކްނިކަލް މަސައްކަތްތައް ކަމުގައެވެ.
އެމަސައްކަތް މިހާރު އެބަ ހިނގާ. ޗައިނާގެ ހިލޭ އެހީގެ ދަށުން އެމަސައްކަތް ކުރިޔަށް ގެންދަން ނިންމާފަ އޮތީ. މިހާރު ކުރިޔަށް ދަނީ ޗައިނާގެ ކަމާބެހޭ އިދާރާގެ ބޭފުޅުންނާ އަޅުގަޑުމެންގެ ކޮންސްޓްރަކްޝަން މިނިސްޓްރީއާއި ހެލްތު މިނިސްޓްރީއާއި ގުޅިގެން ޓެކްނިކަލް މަސައްކަތްތައް. ޑިޒައިންނިންއާއި ޓެކްނިކަލް މަސައްކަތް. އެކަމަށް ބިންވެސް ކަނޑައަޅާ ނިންމާފަ މިހާރު އެއޮތީ. އެހެންވީމަ އެމަސައްކަތް ނިމުނުހާ އަވަހަކަށް ދެން ފެންނާނީ އަމަލީގޮތުން ކަންކަރަން ބަޔަކު މަސައްކަތް ފަށާތަން.
ރައީސް ވިދާޅުވިއެވެ.
ރައީސް ވިދާޅުވީ އެ ޓާޝަރީ ހޮސްޕިޓަލުގެ މަސައްކަތް ފެށިގެން ދިއުމުން ވިލިމާލެއަށް ކުރިމަތިވެފައިވާ ސިއްޙީ ޚިދުމަތުގެ މައްސަލަތައް ހައްލުވެގެންދާނެ ކަމުގައެވެ.
