އާބާދީ އިތުރު ވަމުންދާ ހުޅުމާލޭގެ ފޭސް 2ގައި އަދި 4 ސްކޫލް ބޭނުންވާ ކަމަށާއި ފޭސް 1އަށް އިތުރު 2 ސްކޫލް ބޭނުންވާ ކަމަށް އެޑިއުކޭޝަން މިނިސްޓަރޑރ. އިސްމާއިލް ޝަފީއު ވިދާޅުވެއްޖެއެވެ.
އޭނާ މިހެން ވިދާޅުވީ ރައްޔިތުންގެ މަޖިލިސް މިއަދުގެ ޖަލްސާގައި ހުޅުމާލޭ ދާއިރާގެ މެންބަރު އަލީ ނިޔާޒް ކުރެއްވި ސުވާލަކަށް ޖަވާބު ދެއްވަމުންނެވެ.
ޝަަފީއު ވިދާޅުވީ ހުޅުމާލޭގައި އާބާދީ އިތުރުވަމުންދާއިރު ހުޅުމާލޭ ދެވަނަ ފިޔަވަހީގައި މިހާރު ހުންނަނީ އެންމެ ސްކޫލެއް ކަމަށެވެ. އެއީ ސަލާހުއްދީން ސްކޫލް އެކަންޏެވެ.
ޝަފީޢު ވިދާޅުވީ ހުޅުމާލެއިން ސްކޫލްތަކަށް ކުދިން ވެއްދުމަށް ރިކުއެސްޓްތައް ލިބެމުންދާ މިންވަރު ދަނީ އިތުރު ވަމުން ކަމަށާއި، އެގޮތުން މިދިޔަ ހަފްތާގައި އެކަނިވެސް 800 އަށްވުރެ ގިނަ ރިކުއެސްޓް ލިބިފައިވާކަމަށެވެ.
މިނިސްޓަރ ޝަފީޢު ވިދާޅުވީ ހުޅުމާލެ ދެވަނަ ފިޔަވަހީގައި ހުންނަ ސަލާހުއްދީން ސްކޫލް ދެ ދަންފަޅިއަށް ބަދަލުކުރަން ނިންމި ނިންމުމަކީ ފަސޭހަ ނިންމުމެއް ނޫން ކަމަށެވެ. އެހެންނަމަވެސް އެއީ އެ ސްކޫލުގައި ކިޔަވާ ކުދިން ގިނަވުމުގެ ސަބަބުން އެކުދިންނަށް ތައުލީމުގެ ޔަޤީންކަން ކަށަވަރުކުރުމަށް ނިންމަން ޖެހުން ނިންމިމެއްކަމަށްވެސް އޭނާ ވިދާޅުވިއެވެ.
މިނިސްޓަރ ވަނީ ވިދާޅުވީ އޭގެ ނަތީޖާއެއްގެ ގޮތުން ތައުލީމީ ފެންވަރު ރަނގަޅުވެ، ވަށާޖެހޭ ތައުލީމެއް ފޯރުކޮށްދޭން ފަސޭހަވެގެން ދާނެ ކަމުގައެވެ.
