އާންމު ރައްޔިތުންނަށް ކެނޑިޑޭޓުންނާއި ސުވާލު ކުރެވޭގޮތަށް، ޕީއެސްއެމް މަޖިލިސް ބަހުސް މިފަހަރު ބާއްވާގޮތަށް ދައުލަތުގެ މީޑިއާ ޕީއެސްއެމްއިން ނިންމައިފިއެވެ.

ޕީއެސްއެމްގެ 'މަޖިލިސް 2024′ ބަހުސް ބޭއްވުމަށް ހަމަޖެހިފައިވަނީ މި މަހުގެ 20 ވަނަ ދުވަހުއެވެ.

ޕީއެސްއެމްއިން ނިންމާފައިވަނީ،  އެ ދުވަހުން ފެށިގެން ކޮންމެ ދުވަހަކު ފަސް ދާއިރާއެއްގެ ކެނޑިޑޭޓުން ބަހުސް ކުރަން ފުރުސަތު ދޭ ގޮތަށެވެ. މި ބަހުސް ފޮނުވުމަށް ހަމަޖެހިފައިވަނީ، ޕީއެސްއެމްގެ އެއް ޗެނަލް ކަމަށްވާ 'ޔެސް ޓީވީ’ންނެވެ.

މި ބަހުސް އިފުތިތާހު ކުރުމުގެ ރަސްމިއްޔާތުގައި ޕީއެސްއެމްގެ މެނޭޖިން ޑިރެކްޓަރު ޒީނާ ޒާހިރު ވިދާޅުވީ މިފަދަ ބަހުސެއްގައި އެންމެ ރަނގަޅު ގޮތަކީ، ދާއިރާގެ ރައްޔިތުން ބޭނުންވާ ސުވާލުތައް ކެނޑިޑޭޓުންނަށް ކުރެވޭނެ ގޮތް ފަހިވުން ކަމަށެވެ.

އެގޮތުން އަޅުގަނޑުމެން އެސްއެމްއެސް މެދުވެރިކޮށް ފުރުސަތު ހުޅުވާލައިނަން އެ ކެނޑިޑޭޓުންނަށް ބޭނުންވާ ސުވާލުތަކަކީ ކޮބައިކަން ބަލާލަން. މިގޮތަށް ލިބޭ ސުވާލުތަކުގެ ތެރެއިން ރަނގަޅު ސުވާލުތައް އަޅުގަނޑުމެން ކެނޑިޑޭޓުންނާ ކުރިމަތި ކުރުވާނީ ބަހުސްގެ ތެރެއިން.

އޭނާ ވިދާޅުވިއެވެ.

ޒީނާ ވިދާޅުވީ މި ބަހުސް މިފަހަރު ކުރިޔަށް ގެންދިއުމަށް ހަމަޖައްސާފައިވަނީ ސިޓީ ކައުންސިލްތަކާވެސް ގުޅިގެން ކަމަށާއި، ބޭނުމަކީ ރައްޔިތުންނާ ވީހާވެސް ގާތުން ބަހުސް ބޭއްވުން ކަމުގައެވެ.

ރައްޔިތުންގެ މަޖިލިހުގެ އިންތިޚާބުގެ ބަހުސްއަކީ މުޅި ރާއްޖޭގެ ވަރަށް ގިނަ އަދަދެއްގެ ކެނޑިޑޭޓުން ބައިވެރިވާ ބަހުސް އެއް. އެހެންވީމަ އަޅުގަނޑުމެން ވިސްނާލީ ސިޓީތަކުގައި ސިޓީގެ ބަހުސް ކުރިއަށް ގެންދާގޮތަށް. މި ދެންނެވީ ކުޅުދުއްފުށީ ސިޓީ ފުވަމުލަށް ސިޓީ މީގެ އިތުރުން އައްޑޫ ސިޓީގެ އެ ދާއިރާތަކުގެ ބަހުސް ކުރިއަށް ގެންދާ ގޮތަށް.

ޒީނާ ވިދާޅުވިއެވެ.

މި ބަހުސް މިފަހަރު ފެށުމަށް ހަމަޖެހިފައިވަނީ މާލޭގެ ދާއިރާ ތަކުންނެވެ. އެއަށް ފަހު ހއ.އިން ފެށިގެން އައްޑުއާ ހަމައަށް ތަރުތީބުން ބަހުސް ބޭއްވުމަށް ވަނީ ހަމަޖެހިފައެވެ.