ރާއްޖޭގައި ހިންގާ ބިންހިއްކުމާއި ބޯހިޔާވަހިކަމުގެ އެންމެބޮޑު މަޝްރޫޢު "ރަސްމާލެ" ބިން ހިއްކުމުގެ މަޝްރޫޢު ހަލުއި ދުވެލިގައި ކުރިޔަށް ގެންގޮސް ނިންމަވާނެ ކަމުގައި މަޝްރޫއު ކުރިޔަށް ގެންދާ އާބަންކޯގެ މެނޭޖިން ޑިރެކްޓަރ ފަޒުލް ރަޝީދު ވިދާޅުވެއްޖެއެވެ.

ފުށިދިއްގަރުފަޅު ހިއްކުމުގެ އަމަލީ މަސައްކަތް ފެށުމަށް މިއަދު އެ ފަޅުގައި ބޭއްވި ހާއްސަ ރަސްމިއްޔާތުގައި ވާހަކަަފުޅު ދައްކަވަމުން ފަޒުލް ވިދާޅުވީ، އާބަންކޯގެ ޓީމުން ގާބިލްކަން ތަންދިން އެންމެ ފުޅާ ދާއިރާއެއްގައި ދިވެހީންގެ މެނިފެސްޓޯ ތަންފީޒު ކުރުމަށްޓަކާ ރެއާދުވަލު ކެނޑިނޭޅި މަސައްކަތް ކޮށްދޭނެ ކަމުގައެވެ.

އަޅުގަނޑުމެންގެ ޓީމުން، އަޅުގަނޑުމެންގެ ލަޔާގަތާއި ގާބިލްކަން ދިން އެންމެ ފުޅާ ދާއިރާއެއްގައި ދިވެހިންގެ މެނިފެސްޓޯ ތަންފީޒު ކުރުމަށްޓަކައި، ރައީސްގެ މުޅި މެނިފެސްޓޯ ތަންފީޒުކުރުމަށްޓަކައި ކެނޑިނޭޅި ރެއާ ދުވާލު މަސައްކަތް ކުރާނެ ކަމުގެ ފުރިހަމަ ޔަގީންކަން އަރުވަން.

މިއަދުގެ ރަސްމިއްޔާތުގައި ވާހަކަ ދައްކަވަމުން ފަޒުލް ވިދާޅުވިއެވެ.

މިއަދުގެ ރަސްމިއްޔާތުގައި އިތުރަށް ވާހަކަ ދައްކަވަމުން ފަޒުލް ވިދާޅުވީ، ފުށިދިއްގަރު ހިއްކުމުގެ މަޝްރޫއުގެ މަސައްކަތް ހަވާލުކޮށްފައިވާ ސްރީ ލަންކާގެ ކެޕިޓަލް މެރިން އެންޑް ސިވިލް ކޮންސްޓްރަކްޝަން (ސީއެމްސީ)އާއި ސީއެމްސީގެ ޕާޓްނަރުން ކަމަށްވާ ބޮސްކާލިސް އާއި ޗައިނާގެ ސްޓޭޓް ގުޅިގެން މަސައްކަތްތަކެއް ކުރެވޭނެ ކަމަށެވެ.

އެހެންވީމަ ކުރިއަށް އޮތްތަނުގައި ރައީސް އެދިވަޑައިގަންނަވާ ގޮތަށް ދިވެހިންގެ ދިވެހި ރާއްޖޭ، އަދި ގްރޭޓާ މާލެ އޭރިއާގެ ބޯހިޔާވަހިކަން ތަނަވަސް ކޮށްދިނުމުގެ މައި އަޒުމުގައި އަޅުގަނޑުމެން އެންމެން ސާބިތުވެ ތިބޭނެ ކަމުގެ ފުރިހަމަ ޔަގީންކަން އަދިވެސް އެއްފަހަރު އަރުވަން.

ފަޒުލް ވިދާޅުވިއެވެ.