ރައްޔިތުންގެ މަޖިލީހުގެ ނައިބު ރައީސް ކަމާއި ހުޅުހެންވޭރު ދާއިރާގެ މެމްބަރު ކަން ކުރެއްވެވި ރީކޯ މޫސާ މަނިކު، އަންނަ އަހަރު ބާއްވާ ރައްޔިތުންގެ މަޖިލިސް އިންތިހާބުގައި ވާދަކުރެއްވުމަށް އިދިކޮޅު އެންމެ ބޮޑު ޕާޓީ، އެމްޑީޕީގެ ޓިކެޓު ހޯއްދެވުމަށް ނިންމަވައިފިއެވެ.
ރީކޯ މޫސަ ވާދަކުރެއްވުމަށް ނިންމަވާފައި ވަނީ މާވަށު ދާއިރާއަށެވެ.
ރީކޯ މޫސަ "އެކްސް" ގައި ކުރެއްވި ޕޯސްޓެއްގައި ވިދާޅުވީ މާވަށު ދާއިރާގެ ރައްޔަތުންގެ މަޖްލިސް ގޮނޑިއަށް އެމްޑީޕީ ޕްރައިމަރީގައި އޭނާ މިފަހަރު ވާދަ ކުރައްވަން ނިނަމަވާފައިވާ ކަމަށެވެ.
"ހައްދުންމަތީ މާވަށު ދާއިރާގެ ރައްޔަތުންގެ މަޖިލިސް ގޮނޑިއަށް އެމްޑީޕީ ޕްރައިމަރީގަ މިފަހަރު ވާދަ ކުރަން ނިންމާ، 20 ވަނަ ރައްޔިތުންގެ މަޖިލީހުގައި މަސައްކަތް ކުރުމުގެ އުއްމީދުގައި ﷲ ގެ ވާގިފުޅާއެކު މަސައްކަތް މި ކުރަނީ" ރީކޯ މޫސަ ވިދާޅުވިއެވެ.
އެމްޑީޕީގެ ޗެއާޕާސަން ކަން ވެސް ކުރެއްވެވި މޫސާ މަނިކަކީ ކުރިން ވެސް ލ. އަތުގެ މެންބަރުކަން ކުރެއްވެވި ބޭފުޅެކެވެ. ލ. އަތޮޅުގެ މެންބަރެއްގެ ގޮތުގައި ރައްޔިތުންގެ މަޖިލީހާއި ރައްޔިތުންގެ ހާއްސަ މަޖިލީހުގައި އޭނާ މަސައްކަތް ކުރެއްވެވި އެވެ. އޭގެ ފަހުން އޭނާ ހުންނެވީ ހުޅުހެންވޭރު ދާއިރާގެ މެމްބަރަކަށެވެ.
މޫސަ މަނިކު އެމްޑީޕީން 2016 ވަނަ އަހަރުގެ ނޮވެމްބަރު މަހުގެ ތެރޭގައި ވަކިކުރީ ސުޕްރީމް ކޯޓުގެ ފަނޑިޔާރުންގެ އަދަދު މަދުކުރަން ރައްޔިތުންގެ މަޖިލީހުގައި ނެގި ވޯޓުގައި އެ ޕާޓީގެ ތްރީ ލައިން ވިޕާ ހިލާފުވެ ވަޑައިގަތް ކަމަށް ބުނާ މައްސަލައިގައެވެ.
އެއަށްފަހު 2017 ވަނަ އަހަރުގެ ޖުލައި މަހުގެ ތެރޭގައި މޫސާ ގުޅިވަޑައިގެންނެވީ އޭރު ވެރިކަންކުރި ޕާޓީ ޕީޕީއެމްއާ އެވެ. އޭނާ އަލުން އެމްޑީޕީއާ ގުޅިވަޑައިގެންފައިވަނީ 2022 ވަނަ އަހަރުގެ ނޮވެންބަރު މަހުގެ ތެރޭގައެވެ.
