ޑރ. މުހައްމަދު މުއިއްޒު، ރައީސުލްޖުމްހޫރިއްޔާގެ މަގާމުގެ ހުވާކުރެއްވުމުން އެމަނިކުފާނުގެ އަނބިކަނބަލުން ސާޖިދާ މުހައްމަދު ސިވިލް ސާވިސްގެ ވަޒީފާގައި ހުންނެވުމަށް ގާނޫނީ ހުރަހެއް ނެތް ކަމަށް ސިވިލް ސާވިސް ކޮމިޝަން (ސީއެސްސީ) އިން ބުނެފިއެވެ.
ސާޖިދާ އަކީ މޯލްޑިވްސް ފުޑް އެންޑް ޑްރަގް އޮތޯރިޓީ (އެމްއެފްޑީއޭ)ގެ ސީނިއާ ސައިންޓިފިކް އޮފިސަރެވެ. ޓެކްނިކަލް މުހިއްމު މަސައްކަތްތަކެއް އެތަނުގައި ކުރައްވަމުން ގެންދަވާއިރު، ސާޖިދާއަކީ އެ ދާއިރާ އިން ކިޔަވާ ވިދާޅުވެ ހުންނެވި ހަމައެކަނި ބޭފުޅާއެވެ.
ސީއެސްސީގެ ރައީސް މުހައްމަދު ނާސިހް ވިދާޅުވީ ރައީސުލްޖުމްހޫރިއްޔާގެ އަނބިކަނބަލުން ނުވަތަ ފަސްޓްލޭޑީ އަކީ ދައުލަތުގެ މަގާމަކަށް ނުވާތީ ސާޖިދާއަށް ސިވިލް ސާވިސްގެ ވަޒީފާގައި ކުރިއަށް ވަޑައިގެންނެވޭނެ ކަމަށެވެ. އޭނާ ވިދާޅުވީ އެކަމަނާ މަގާމުގައި ދެމިހުންނެވުމަށް ބޭނުންވާނަމަ އެކަމުގައި ގާނޫނީ ހުރަހެއް ނެތް ކަމަށެވެ.
ރައީސުލްޖުމްހޫރިއްޔާގެ އަނބިކަނބަލުން ސިވިލް ސާވިސްގެ މަގާމެއްގައި ހުންނަވާއިރު މަގާމުގެ ނުފޫޒު ބޭނުންކުރުމުގެ ފުރުސަތު އޮންނާނެ ނޫންތޯ ދެންނެވުމުން ނާސިހް ވިދާޅުވީ އެފަދަ ފުރުސަތެއް އޮވެދާނެ ކަމަށް ބަލައި އެއްވެސް ބޭފުޅަކު ކުށެއް ނުކުރައްވަނީސް ފިޔަވަޅެއް އެޅުމުގެ ބާރު ކޮމިޝަނަށް ނެތް ކަމަށެވެ.
މިއީ ސިވިލް ސާވިސްގެ ވަޒީފާއެއްގައި ހުންނެވި ބޭފުޅަކު ފަސްޓްލޭޑީއަކަށް ވެވަޑައިގަންނަވާ ފުރަތަމަ ފަހަރުވީމަ ކަންނޭނގޭ ސާޖިދާއާ ގުޅޭގޮތުން ސުވާލުތަކެއް މިއުޅެނީ. ބައެއް އާންމުންނަށްވެސް ހީވަނީ ރައީސުލްޖުމްހޫރިއްޔާގެ އަނބިކަނބަލުން ވީމާ ބާރު އޮންނާނެއޭ ކޮންމެ ކަމެއް ކުރަން. އެކަމަކު އެފަދަ ހީތަކުގެ މައްޗަށް ބަލައި މީހަކު ގޯސްކޮށް ކަމެއް ނުކުރަނީސް އަޅުގަނޑުމެންނަށް ނޯންނާނެ އެކަން ހުއްޓުވޭކަށް.
– ނާސިހް ވިދާޅުވިއެވެ.
ފަސްޓް ލޭޑީ އަކީ ގާނޫނީ ވަކި ހައިސިއްޔަތެއް އޮންނަ މަގާމެއް ނޫނެވެ. ރައީސުލްޖުމްހޫރިއްޔާ އާއި ނައިބު ރައީސްގެ މުސާރަ އާއި އިނާޔަތް ކަނޑައެޅުމުގެ ގާނޫނުގައި ބަޔާންކޮށްފައިވާ ގޮތުން ރައީސުލްޖުމްހޫރިއްޔާގެ އަނބިމީހާ ނުވަތަ ފިރިމީހާ އަށް ދައުލަތުން އެލަވަންސެއް ދޭން ޖެހެއެވެ. އެ އެލަވަންސްގެ މިންވަރަކީ ރައީސުލްޖުމްހޫރިއްޔާގެ މުސާރައިގެ ތިންބައިކުޅަ އެއްބައެވެ.
