ރާއްޖެއަށް މިއަހަރު އައި ފަތުރުވެރިންގެ އަދަދު 1.5 މިލިއަނަށް އަރައިފިއެވެ.
މި އަދަދު 1.5 މިލިއަނަށް އަރާފައި މިވަނީ ފާއިތުވެދިޔަ އަހަރު މި ލަނޑުދަނޑިއާއި ހަމައަށް ވާސިލް ވެވުނު މުއްދަތަށްވުރެ މަހެއްހާ ދުވަސް ކުރިންނެވެ. މިއީ 13 އިންސައްތައިގެ ކުރިއެރުމެކެވެ. ފާއިތުވެދިޔަ އަހަރު ރާއްޖެއަށް ޒިޔާރަތްކުރި ފަތުރުވެރިންގެ އަދަދު 1.5 މިލިއަނަށް އަރާފައިވަނީ އެއަހަރުގެ ޑިސެމްބަރުމަހުއެވެ.
އެހެންނަމަވެސް ސަރުކާރުގެ މިއަހަރުގެ ލަނޑުދަޑިއަކީ 1.9 މިލިއަން ފަތުރުވެރިން ރާއްޖެއަށް ޒިޔާރަތް ކުރުމެވެ. މިގޮތުން މި އަދަދަށް ރާއްޖެއަށް މިއަހަރު ފަތުރުވެރިން ޒިޔާރަތް ކުރުމަށް ކުރިޔަށް އޮތް 2 މަސްދުވަހުގެ ތެރޭގައި ޖުމްލަ 4 ލައްކަ ފަތުރުވެރިން ރާއްޖެއަށް ޒިޔާރަތް ކުރާން ޖެހޭނެއެވެ.
ޓޫރިޒަމް މިނިސްޓްރީގެ ތަފާސް ހިސާބުތައް ދައްކާގޮތުން މިއަހަރު މިހާތަނަށް ރާއްޖެއަށް ދުވާލަކަށް 5،000 ފަތުރުވެރިން ޒިޔާރަތް ކޮށްފައި ވެއެވެ.
މިއަހަރު އެންމެ ގިނައިން ޓޫރިސްޓުން އައީ ރަޝިއާއިންނެވެ. އެއީ 172،000 ޓޫރިސްޓުންނެވެ. އިންޑިއާ އާއި ޗައިނާ އިން 163،000 ޓޫރިސްޓުން އައިސްފައި ވެއެވެ. ލިސްޓުގެ ހަތަރު ވަނައިގައި އޮތް އިނގިރޭސިވިލާތުން ރާއްޖެއަށް 121،000 ޓޫރިސްޓުން އައިސްފައިވެ އެވެ.
ޓުއަރިޒަމް މިނިސްޓްރީން ބުނެފައިވަނީ، ރާއްޖެއަށް މިހާރު ފަތުރުވެރިން އަންނަ ނިސްބަތަށް ބަލާއިރު، 1.9 މިލިއަން ފަތުރުވެސިންގެ އަމާޒަށް ކުރިޔަށް ދެމަސްދުވަހުގެ ތެރޭގައި ވާސިލް ވެވުމަކީ ދަތިކަމަކަށް ނުވާނެ ކަމުގައެވެ.
މިއަހަރުގެ ފާއިތުވި ތަނުގައި މަހަކު އެވްރެޖްކޮށް 150،000 ފަތުރުވެރިން ރާއްޖެ ޒިޔާރަތް ކޮށްފައި ވެއެވެ.
