ރައްޔިތުންގެ މަޖިލީހުގެ ރައީސްކަމުގެ މަގާމުން ރައީސް މުހައްމަދު ނަޝީދު ވަކިކުރުމުގެ ގަރާރު މިއަދަށް އެޖެންޑާ ކުރުމަށް ފަހު ޖަލްސާ ކުރިއަށް ނުގެންދަން ނިންމުމުން އެމްޑީޕީގެ ބައެއް މެންބަރުން މަޖިލީހުގެ ތަޅުމުގައި އިހުތިޖާޖު ކުރައްވައި މަޖިލީހުގެ ރިޔާސަތު މޭޒުގައި ހުރި ބައެއް ތަކެއްޗަށް ގެއްލުން ދިން މައްސަލަ ޑިމޮކްރެޓްސް އިން ކުށްވެރިކޮށްފިއެވެ.
ޑިމޮކްރެޓްސްގެ ބަޔާނުގައި ބުނީ އެކަން އަމީން އާާއްމު އިއުލާނު ކުރެއްވުމާ އެކު އެމްޑީޕީގެ މެމްބަރުން އިދާރީ މޭޒު ކައިރިއަށް އެއްވެ، އެ މުވައްޒަފުންނާ ދިމާކޮށް ހަޑިހުތުރު އެއްޗެހި ގޮވައި އެ ބޭފުޅުންގެ ތަކެއްޗަށް ގެއްލުން ދީފައިވާ ކަމަށެވެ.
އެގޮތުން މަރަދޫ ދާއިރާގެ އެމްޑީޕީ މެމްބަރު އިބްރާހީމް ޝަރީފް ރިޔާސަތުގެ ސަރަހައްދަށް ވަންނަވައި ރިޔާސަތުގެ ގޮނޑިކޮޅުގައި އިށީންނަވައި ގަވާއިދާ ހިލާފުވެވަޑައިގެންނެވި ކަމަށާއި ކައުންސެލް ޖެނެރަލް ފިލްޒާ ބޭނުންކުރައްވާ ކޮމްޕިއުޓާ ސިސްޓަމް ވައްޓާލައި މޯބައިލް ފޯނަށާއި އަތް ދަބަހަށް އަމާޒުކޮށް ފެން ޖަހައި އެތަކެއްޗަށް ގެއްލުން ކަމަށް ވެސް ޑިމޮކްރެޓްސްގެ ބަޔާނުގައިވެއެވެ.
"އެމްޑީޕީގެ މެމްބަރުން މަޖިލީހުގެ އިދާރީ މުވައްޒަފުންނާ ދިމާކޮށް އެބޭފުޅުންގެ ތަކެއްޗަށް ގެއްލުންދިނުމާއި މަޖިލީހުގެ ރިޔާސަތުގެ ސަރަހައްދަށް ވަދެ، ރިޔާސަތުގެ ގޮނޑިކޮޅުގައި ގަވާއިދާ ހިލާފަށް އިށީނުން ފަދަ ނާތަހުޒީބީ އަމަލުތައް ނުހިންގުމަށް މި ޕާޓީން ގޮވާލަމެވެ. އަދި އެ އަމަލުތަކުގައި ޖިނާއީ ކުށެއް އެކުލެވޭ ނަމަ، އެކަން ބައްލަވައިދެއްވުމަށް ކަމާބެހޭ މުއައްސަސާތަކަށް ގޮވާލަމެވެ." ޑިމޮކްރެޓްސް އިން ބުނެފައި ވެއެވެ.
މަޖިލީހުގެ މިއަދުގެ ޖަލްސާއަށް އެޖެންޑާކުރި ނަޝީދުގެ އިތުބާރު ނެތްކަމުގެ މައްސަލަ ކުރިއަށް ނުގެންދެވޭނެ ކަމަށް އެންގީ މަޖިލީހުގެ ނައިބު ރައީސް އީވާ އަބްދުﷲ އާލާސްކަންފުޅާ އުޅުއްވާތީ މިއަދުގެ ޖަލްސާއަށް ސަލާމް ފޮނުއްވުމުމުންނެވެ. މަޖިލީހުގެ ރައީސް މަގާމުން ވަކިކުރުމުގެ މައްސަލަ ކުރިއަށްދާ ޖަލްސާއެއްގެ ރިޔާސަތު ބެލެހެއްޓުމުގެ މަސްއޫލިއްޔަތު މަޖިލީހުގެ ގަވާއިދުގައި ހަވާލުކޮށްފައިވަނީ މަޖިލީހުގެ ނައިބު ރައީސަށެވެ. އެ މައްސަލަ މަޖިލިހުގެ ރައީސަކަށް ކުރިއަށް ނުގެންދެވޭނެއެވެ.
ޖަލްސާ ނުބޭއްވޭނެކަން އަމީންއާއްމު ފާތިމަތު ނިއުޝާ އިއުލާނުކުރެއްވުމާ އެކު، އެމްޑީޕީގެ މެންބަރުން ވަނީ މަޖިލިސް ރިޔާސަތު ހުންނަ މޭޒު ކުރިމައްޗަށް ވަޑައިގެން އިހުތިޖާޖް ކުރައްވައިފައެވެ. މަޖިލީހުގައި އެމްޑީޕީ މެންބަރުން ކުރި އިހުތިޖާޖުގެ ތެރެއިން މަޖިލީހުގެ ރިޔާސަތު މޭޒުގައި ހުރި ބައެއް ތަކެއްޗަށް ވަނީ ގެއްލުން ލިބިފައެވެ. އަދި މަޖިލިހުގެ ކައުންސިލް ޖެނެރަލް ފާތުމަތު ފިލްޒާގެ ފޯނު ވެސް ވަނީ ތަޅައިގެން ގޮސްފައެވެ.
ދައުރުވަމުންދާ ވީޑިއޯގައި ފެންނަ ގޮތުގައި، އަޑުގަދަ ކުރައްވަމުން އަތް އުއްކަވައި މޮނިޓަރަށް ގެއްލުންދެއްވީ ކަނޑިތީމު ދާއިރާގެ މެންބަރު އަބްދުﷲ ޝަހީމް އަބްދުލްހަކީމެވެ. މޮނިޓަރުގައި ހިފުމާއެކު އެ ތަނުގައި ހުރި ފެންތަށި ބަންޑުންވާ ތަން ވީޑިއޯއިން ފެނެއެވެ.
އެމްޑީޕީގެ މެމްބަރުން ގަބޫލު ކުރައްވާ ގޮތުގައި މަޖިލިހުގެ ނައިބު ރައީސް ނެތަސް، އެ މައްސަލަ މަޖިލިހުގައި ކުރިއަށް ގެންދެވޭނެއެވެ. މަޖިލިހުގެ ނައިބު ރައީސް ނެތް ހާލަތެއްގައި ދެން އަމަލު ކުރަންވީ ގޮތް ގަވައިދުގައި އޮންނަ ކަމަށާއި އެންމެ ގިނަ ދުވަސްވީ މެމްބަރުން މަޖިިލިހުގެ ރިޔާސަތު މީގެކުރިން ބަލަހައްޓަވާފައިވާ ކަމަށް ވިދާޅުވިއެވެ.
ނަޝީދު ވަކިކުރުމުގެ ގަރާރުގެ މަސައްކަތް ކުރިއަށް ނުގެންގޮސް، މަޖިލީހުގެ އެއްވެސް މަސައްކަތަކަށް އެއްބާރުލުން ނުދޭނެ ކަމަށް މަޖިލީހުގެ އަޣުލަބިއްޔަތު އޮންނަ އެމްޑީޕީން ވަނީ ބުނެފައެވެ.
