ޚިޔާލުފާޅު ކުރުމުގެ މިނިވަންކަން އޮންނަން ޖެހޭނީ އިސްލާމީ ޝަރީއަތް ހުއްދަކުރާ މިންގަޑުގެ ތެރޭގައި ކަމުގައި މިއަދުގެ ހުކުރު ޚުޡުބާގައި ވިދާޅުވެއްޖެއެވެ.

"މުޢާމަލާތް ކުރުމުގެ އަޚުލާގު" މިމައުޟޫޢުގެ މައްޗަށް ޚާއްސަ ކުރެވިގެންދިޔަ މިއަދު ހުކުރު ޚުޡުބާގައި ވިދާޅުވީ އިސްލާމްދީން ގޮވާލާ މަތިވެރި އަގުތަކުގެ ތެރޭގައި، އެހެން މީހުންނާ މުޢާމަލާތު ކުރާއިރު، އެހެން މީހުންގެ ރައުޔަށާއި، ޚިޔާލަށް އިޙުތިރާމްކުރުން ހިމެނޭ ކަމުގައެވެ.

އޮފީހެއްގެ ވެރިއެއް ކަމުގައި ވިޔަސް، މުއައްސަސާއެއްގެ ވެރިއެއް ކަމުގައި ވިޔަސް، މެނޭޖަރަކަށް ވިޔަސް، އޭނާގެ ދަށުގައި މަސައްކަތްކުރާ މީހުންގެ ޚިޔާލަށާއި، ރައުޔަށް އިޙުތިރާމް ކުރާންޖެހޭނެއެވެ. ތަނެއް ކުރިއަރާނީ، އެ ތަނެއްގެ އެންމެންގެ ލަފަޔާއި، މަޝްވަރާ ހޯދައިގެން، ގުޅިގެން މަސައްކަތް ކޮށްގެންނެވެ.

މިއަދުގެ ޚުޡުބާގައި ވިދާޅުވެފައި ވެއެވެ.

މިއަދުގެ ހުކުރު ޚުޡުބާގައި އިތުރަށް ވިދާޅުވީ މީހުންލައްވާ މަސައްކަތް ކުރުވާ މީހުންވެސް އެމީހުންނާމެދު މުއާމަލާތް ކުރާންޖެހޭނީ އިސްލާމީ އުސޫލުތަކާ އެއްގޮތަށް ކަމަށެވެ. އެގޮތުން މަސައްކަތުގެ ވެރިފަރާތުން މަސައްކަތު މީހާގެ ހައްގުތައް ހިފަހައްޓައިގެން ނުވާނެކަން ބަޔާން ކުރައްވަމުން ހުކުރު ޚުޡުބާގައި ވިދާޅުވީ މުޅި އިސްލާމް ދީން ބިނާވަނީ މުއާމަލާތުގެ ރިވެތިކަމުގެ މައްޗަށް ކަމަށެވެ.

އެގޮތުން އަޅުކަންތައް އަދާކުރުމުގެ އިތުރަށް ދޭދޭ އަފްރާދުންގެ މެދުގައި ކުރެވޭ މުއާމަލާތުތަކުގެ ތެރޭގައި ހިމެނެނީ ހަމައެކަނި ސީދާސީދާ ކުރެވޭ މުއާމަލާތު އެކަނި ނޫންކަމަށާއި، ނުސީދާކޮށް އެކިއެކި މީޑިއާތަކުގައި ފަތުރާ ވާހަކަތައްވެސް ހިމެނެނީ މުއާމަލާތުތަކުގެ ތެރޭގައި ކަމަށް ޚުޡުބާގައި ބަޔާން ކޮށްފައި ވެއެވެ.

ހޮޅުއަށިތަކާއި، މައިޒާންތަކުގައި ދައްކާ ވާހަކަވެސް މެއެވެ. އެހުރިހާ ވާހަކަތަކާއި، މުއާމަލާތެއް ވާންޖެހޭނީ އިސްލާމީ ޝަރީއަތް ހުއްދަކުރާ މިންގަޑަށް، ފުރިހަމައަށް ފެތޭ އެއްޗަކަށެވެ. ތަޤުވާވެރިކަމާއި، ވަރަޢަ ކިތަންމެ ބޮޑު މީހަކު ކަމުގައި ވިޔަސް، ހެއްކެއް ގަރީނާއެއް ނެތި، ބަޔަކު ބަދުނާމު ކުރުމުގެ ނުބައި ނިޔަތުގައި، ކުރާ ކަންކަމާއި، ދައްކާ ވާހަކަތަކަކީ، މީހާ ނަރަކަވަންތަވެރިޔަކަށް ވުމަށް ފުދި އިތުރުވާ ޢަމަލުތަކެއްކަން ތިޔަބައި މީހުން ދަންނާށެވެ!

މިއަދުގެ ޚުޡުބާގައި ވިދާޅުވެފައި ވެއެވެ.