މާލޭގައި މީހަކަށް ތޫނު އެއްޗަކުން ހަމަލދީގެން ހޮސްޕިޓަލުގައި ފަރުވާދޭން ފަށައިފިއެވެ.
ފުލުހުން ބުނީ، ތޫނު އެއްޗަކުން ހަމަލާދިފައިވާ މީހަކަށް އޭޑީކޭ ހޮސްޕިޓަލުގައި ފަރުވާދެމުންދާކަމަށް 11:02 ހާއިރު ރިޕޯޓްކޮށްފައިވާކަމަށެވެ. މި މައްސަލައާއި ގުޅިގެން 29 އަހަރުގެ ދިވެހި އަންހެނަކު ހައްޔަރުކޮށްފައިވާކަމަށްވެސް ފުލުހުން ބުންނެވެ.
އއަންހެނަކު ފިހާރައަކަށްވަދެ މީހަކަށް ވަޅިން ހަމަލާދޭ ވީޑިއޯއެއް ސޯޝަަލް މީޑިއާގައި އަންނަނީ ދައުރުވަމުންނެވެ. އެ ވީޑިއޯއިން ފެންނަ ގޮތުގައި މާލޭގެ ފިހާރައެއްގެ ސޭޓަކަށް ހުރި ފިރިހެނެއްގެ ކަރުގައި އަންހެނަކު ވަނީ ވަޅިން ހަމަލާދީފައެވެ.
ވީޑިޔޯއިން ފެންނަ ގޮތުގައި ޒުވާން އުމުރުފުރައިގެ އަންހެނަކު ފޯނު ފިހާރައަށް ވަނުމަށްފަހު ފޯނު ދައްކާލުމަށް އެދެއެވެ. އަދި ސޭޓަކަށް ހުރި ބިދޭސީ މީހާ ފޯނެއް ނަގާފައި ދެއްކުމުން ކޮންމެވެސް ކަމަކާ ހިތްހަމަނުޖެހިގެން އަންހެންމީހާ ވަނީ ސޭޓާއި ޒުވާބުކޮށްފައެވެ.
އެ ޒުވާބަށްފަހު އެ އަންހެންމީހާ ގެންގުޅު ވަޅިން ހަމަލާދެނީ ސޭޓަކަށް ހުރި މީހާގެ ކަރަށެވެ. އަދި އެއަށްފަހު އެ އަންހެން މީހާ ފިހާރައިން ނިކުމެގެން ދެއެވެ.
