ވެރިކަން ކުރާ މައި ޕާޓީ އެމްޑީޕީއަކީ ބަހުގެ އިތުބާރު އޮތް ޕާޓީއެއްކަން ދަންނަވަން މިވަގުތު ދަތި ކަމުގައި އެމްޑީޕީގެ ކުރީގެ ރައީސް އަދި ރައްޔިތުންގެ މަޖިލީހުގެ ރައީސް މުހައްމަދު ނަޝީދު ވިދާޅުވެއްޖެއެވެ.
ރައްޔިތުންގެ މަޖިލީހުގެ މިއަދުގެ ޖަލްސާއަށް އޮތީ، ނިޒާމާ ގުޅޭ ވޯޓާ ގުޅިގެން އިލެކްޝަންސް ކޮމިޝަން (އީސީ)ން މަޖިލީހަށް ފޮނުވާފައި އޮތް ސިޓީގެ މައްސަލަ އެޖެންޑާ ކޮށްފައެވެ. އެ ކޮމިޝަންގެ ސިޓީގައި ވަނީ ނިޒާމާ ބެހޭ ވޯޓުގައި އޮންނަން ވާނެ ސުވާލު ސާފުކޮށްދޭން އެދިފައެވެ. އަދި، އިންތިޒާމުތައް ހަމަޖައްސައި، ވޯޓު ނެގޭނެ ސީދާ ތާރީޚެއް ފަހުން މަޖިލީހުގެ އިދާރާއަށް އަންގާނެ ކަމަށް އެ ސިޓީގައި ވަނީ ބުނެފައެވެ.
މަޖިލީޙުގެ މިއަދުގެ ޖަލްސާގައި ވާހަކަ ދެއްކެވި މެމްބަރުންގެ ތެރެއިން އެމްޑީޕީއަށް ނިސްބަތްވާ މެމްބަރުން ވަނީ މަވަގުތު ނިޒާމު ބަދަލު ކުރުމަށް ނުފެންނަ ކަމަށް ވިދާޅުވެފައެވެ. އަދި އެމްޑީޕީގެ ޕީޖީ ލީޑަރު އަސްލަމް ވަނީ މިކަމުގައި އަދި އެމްޑީޕީންވެސް އެއްވެސް ގޮތެއް ނިންމާފައި ނުވާކަމަށެވެ.
މިވާހަތަކާއި ގުޅިގެން މަޖިލިސް ރައީސް ވިދާޅުވީ އެމްޑީޕީން ރިޔާސީ އިންތިޚާބުގެ ދެވަނަ ބުރުގައި ޑިމޮކްރެޓްސްގެ ތާއީދު ހޯދުމަށް މަސައްކަތް ކުއިއިރު އެމްޑީޕީން ފެންނަ ނުފެންނަ ވޯޓަށް ފުރިހަމައަށް ތާއީދު ކުރެއްވި ކަމަށެވެ. ނަމަވެސް މިއަދު އެމްޑީޕީގެ ބަސް މަގު ކުއްލިއަކަށް ބަދަލުވުމަކީ ހައިރާންވާ ކަމެއް ނޫންކަމަށް ރައީސް ނަޝީދު ވިދާޅުވިއެވެ.
ދެވަނަ ބުރަށް އެމްޑީޕީ ރިޔާސީ އިންތިޚާބުގައި ދިޔައިރުގައި އަޅުގަނޑަށް އެނގިފަ އޮތް ގޮތުގައި ޑިމޮކްރެޓްސް ކައިރީގައި އެދިފަ އޮތީ އެޕާޓީން ވަކި ބަޔަކަށް ތާއީދު ނުކޮށް ތިބެއްޖެނަމަ އެމްޑީޕީން ފެންނަ ނުފެންނަ ވޯޓަށް ފުރިހަމައަށް ތާއީދު ކުރައްވާނެކަމަށް. އަދި އެމްޑީޕީން ވަނީ ޑިމޮކްރެޓްސް އަތުން އަޅުގަނޑަށް މައުލޫމާތު ލިބިފައި އޮތް ގޮތުގައި ސިޓީއެއް މިމަގަށް ހޯއްދަވާފަ. އެހެން ނަމަވެސް އެބޭފުޅުން އެމްޑީޕީން މިސިޓީގެ ޖަވާބު ނުދެއްވާ އޮތީ. އަޅުގަނޑު ނުދަންނަވަން އެމްޑީޕީއަކީ ބަހުގެ އިތުބާރު މިވަގުތު ހިފޭ ބާވަތުގެ ޕާތީއެއް ކަމަކަށް. އެހެން ނަމަވެސް ކަންކަން ހިނގާފައި އޮތް ގޮތް ހަމަ ދަންނަވާލީ.
– ރައީސް ނަޝީދު ވިދާޅުވިއެވެ.
ނިޒާމީ ވޯޓެއް ނަގަން މަޖިލީހަށް ގަރާރެއް ހުށަހެޅުއްވީ ހުޅުދޫ ދާއިރާގެ މެންބަރު އިލްޔާސް ލަބީބެވެ. އަދި، އިސްލާހަކާ އެކު 30 އޮކްޓޫބަރުގެ ކުރިން އެ ވޯޓު ނަގަން އެމްޑީޕީ މެންބަރުންގެ ތާއީދާ ވެސް އެކު ވަނީ ފާސްކޮށްފައެވެ. އެ ގަރާރަށް ކޮމިޓީގައި ވޯޓަށް އެހިއިރު ހާޒިރުވެތިބި 34 މެންބަރުންގެ ތެރެއިން 31 މެންބަރުން ވަނީ އިލްޔާސްގެ އިސްލާހާއެކު ގަރާރު ފާސްކުރަން ތާއިދުކޮށްފައެވެ.
ނިޒާމީ ވޯޓެއް ނަގަން އެމްޑީޕީން އޭރު ވޯޓު ދިން ނަމަވެސް، އެ ޕާޓީގެ އެންމެ އިސް ލީޑަރު، ރައީސް އިބްރާހިމް މުހައްމަދު ޞާލިޙް އިއްޔެ ވިދާޅުވީ، އެ ޕާޓީގެ 99 އިންސައްތަ ބޭފުޅުން ބަރުލަމާނީ ނިޒާމާ ދެކޮޅު ކަމަށެވެ. އަދި، އިދިކޮޅު ޕީޕީއެމް/ޕީއެންސީން ވެސް ވަނީ އެ ޕާޓީން ބަރުލަމާނީ ނިޒާމަކަށް ތާއީދު ނުކުރާނެ ކަމަށް ވިދާޅުވެފައެވެ. ބަރުލަމާނީ ނިޒާމަކަށް މިހާރު ތާއީދު ކުރައްވައި، މަސައްކަތް ކުރައްވަނީ ރައީސް ނަޝީދެވެ.
