މިދިއަ އޯގަސްޓް މަހު ގެނެސްދިން ކާމިޔާބު ފިލްމު "ނީނާ" ގައި ހިމެނޭ މަޝްހޫރު ބަތަލާ މަރިޔަމް އައްޒަގެ 'އައިޓަމް ސޯންގ' މިއަދު ޔޫޓިއުބަށް ދޫކޮށްލައިފި އެވެ.
ބެކް ޑާންސަރުންތަކަކާ އެކީ ވަރުގަދަ ނެށުންތަކެއް ފެނިގެންދާ މި ލަވަ އަކީ މަރިޔަމް އަޝްފާ އާއި އޭނަގެ ފިރިމީހާ މުހައްމަދު އަބްދުކް ޢަނީ (ތޭރަވާ) ގެ އިތުރުން އެކްޓަރު އިފްނާޒް ފިރާގު ކިޔާފައިވާ ލަވައެކެވެ. ލަވައިގެ ޅެމާއި މެލޮޑީ ވެސް ތޭރަވާ ހަދާފައިވާ އިރު، ލަވައިގެ މިއުޒިކް ހެދީ ހުސައިން ތައުފީގެވެ.
އާސިމް ޢަލީ އަދި އަޙްމަދު ވަހީދު ޕްރޮޑިއުސްކޮށް، 'އައި ފިލްމްސް' އިން ގެނެސްދޭ ނީނާ އަކީ 2019 ގެ ސައިކޮލިޖިކަލް ތުރިލާ "ބަވަތި" އަށް ފަހު އިއްލެ ގެނެސްދޭ ދެވަނަ ފީޗާ ފިލްމެވެ. މިފިލްމަކީ އިލްޔާސް ވަހީދު (އިއްލެ) ލިޔެ، ޑައިރެކްޓްކޮށްފައިވާ ކްރައިމް ތުރިލާއެކެވެ.
ނީނާގެ ލީޑުން ފެނިގެން ދާނީ އިއްލެ ގެނެސްދިން ފިލްމް "ބަވަތީ"ގެ ވެސް ލީޑުން ފެނިގެން ދިއަ ހުނަރުވެރި އެކްޓިންއެއް ދެއްކި ނުޒުހަތު ޝުޢައިބް އެވެ. ފިލްމްގެ ކާސްޓުގައި ފިލްމީ ދާއިރާއަށް އަލަށް ތަޢާރަފުވާ ޝަރަފް ޢަބްދުﷲ، ހަމްދޫން ފާރޫގް، ޖުމައްޔިލް ނިމާލް، މަރިޔަމް ރަޝީދާ އަދި މަރިޔަމް ޝަކީލާ ހިމެނެއެވެ.
މީގެ އިތުރުން ވެސް މި ފިލްމް އިން އާދަމް ރިޒްވީ (ރެކްސް)، ނަތާޝާ ޖަލީލް، ޢަލީ އިނާޒް، ފީޗާ ފިލްމަކަށް އަލަށް ތަޢާރަފްވާ ޓިކްޓޮކްގެ މަޝްހޫރު ތަރި އިބްރާހިމް ޝާއިފް (ޑެވިލް ޝާއިފް)، އަލަށް ތަޢާރަފްވާ ޙަސަން ސާމިހް މުޙައްމަދު، ހަސަން ޝިނާން (ޝިންޓޭ) އަދި އައިޝާ އަލީ ވެސް ހިމެނެއެވެ.
