މޯލްޑިވްސް މީޑިއާ ކައުންސިލް އެމްއެމްސީގެ ކުރިއަށް އޮތް ދައުރަށް އެކައުންސިލްގެ ރައީސް ކަމަށް ސަންގުގެ ޝަހުބާން ފަހުމީ އަދި ނައިބު ރައީސަކަށް ތިލަދުންގެ ޙުސައިން ޘަޤީފް އިންތިޚާބުކޮށްފިއެވެ.
މީޑިއާ ކައުންސިލްގެ ކުރިއަށް އޮތް ދައުރަށް ރައީސާއި ނައިބުރައީސް އިންތިޚާބުކުރީ ދާދި ދެންމެއަކު ބޭއްވި، އަލަށް އިންތިޚާބުވީ ކައުންސިލްގެ ފުރަތަމަ ބައްދަލުވުމުގައެވެ. ރައީސް ކަމުގެ މަޤާމަށް ވާދަކުރި 3 ކެންޑިޑޭޓުންގެ ތެރެއިން ޝަހުބާން ރައީސް ކަމަށް އިންތިޚާބްވީ 6 ވޯޓު ލިބިގެންނެވެ. އޭނާ އާއި ވާދަކުރި ޕީއެސްއެމްގެ އަލީ ހުސެއިންއަށް ލިބުނީ 5 ވޯޓެެވެ. އަދި ޢާންމުންގެ ތެރެއިން ރައީސް ކަމަށް ވާދަކުރި މުހައްމަދު ޝަފާއު ހަސަން ލިބުނީ 3 ވޯޓެވެ. ނައިބް ރައީސްގެ މަޤާމަށް ވާދަކުރީ ތިލަދުންގެ ތިލަދުންގެ ޙުސައިން ޘަޤީފްއެވެ. އޭނާ އިންތިޚާބުވީ 14 ވޯޓުންނެވެ.
އެމްއެމްސީގައި މީޑިއާތައް ތަމްސީލްކުރާ 8 މެންބަރުން ތިއްބަވާއިރު މިފަހަރު އިންތިޚާބު ކޮށްފައިވަނީ 7 މެންބަރުންނެވެ. އެއީ އެއް މެންބަރުގެ ދައުރު އަދި ހަމަނުވާތީއެވެ. ކައުންސިލަށް މެމްބަރުން އިންތިޚާބުކުރުމަށް މިފަހަރު ބޭއްވި އިންތިޚާބު ފާހަގަވެގެން ދިޔައީ ވަރަށް ވާދަވެރި އިންތިޚާބެއްގެ ގޮތުގައެވެ.
މީޑިއާގެ ފަރާތުން ވާދަކުރި 15 ކެނޑިޑޭޓުންގެ ތެރެއިން ކައުންސިލަށް ހޮވުނު 7 މެމްބަރުންނަކީ:
1- އަލީ ހުސައިން – ޕީއެސްއެމް
2- މުއިއްޒު އިބްރާހީމް – މިހާރު އޮންލައިން
3- ހުސައިން ޘަޤީފް – ތިލަދުން
4- އާދަމް ނަޒީރު – ހަތާވީސް އޮންލައިން
5- ޝަހުބާން ފަހުމީ – ސަންގު
6- އާދަމް ނަވާޒު – ވަގުތު އޮންލައިން
7- ހަސަން ޝާކިރު މުހައްމަދު – މޯލްޑިވްސް ފިޝަމެން އެސޯސިއޭޝަން
އެމްއެމްސީގެ އިންތިޚާބުގައި ޢާންމުންގެ ތެރެއިން އިންތިޚާބުކުރާ 6 މެންބަރު ކަމަށް 14 ކެނޑިޑޭޓަކު ވާދަކުރިއެވެ.
ޢާންމުންގެ ތެރެއިން މީޑިއާކައުންސިލަށް ހޮވުނު 6 މެމްބަރުންނަކީ:
1- ފާތިމަތު އަހްމަދު، ޝަހީމީ މަންޒިލް / ގއ. ވިލިނގިލި
2- އަންވަރު އިބްރާހިމް، މަންޒިލް / ބ. ތުޅާދޫ
3- އިބްރާހީމް ފައުޒީ، ބާޑްވިލާ/ ބ.ތުޅާދޫ
4- އަހްމަދު މޫސާ، / ހ. އަމްސާވިލާ
5- ޝަފާއަތު ހަބީބް، ފޭދޫ / ގދ. ހޯޑެއްދޫ
6- މުހައްމަދު ޝަފާއު ހަސަން / މ. ރިވެލިގެ/ މާލެ
މީޑިއާ ކައުންސިލް އެކުލެވިގެންވަނީ މީޑިއާގެ އިދާރާތައް ތަމްސީލުކުރާ 8 މެންބަރުންނާއި، ޢާންމުންގެ ތެރެއިން އިންތިޚާބު ކުރެވޭ 7 މެންބަރުންނާއެކު ޖުމްލަ 15 މެންބަރުންގެ މައްޗަށެވެ. ކައުންސިލުގެ މެންބަރުން އިންތިޚާބު ކުރެވެނީ މީޑިއާގެ ކަންތައްތައް ހިންގެވުމަށް ސަރުކާރުން ހަވާލުކުރައްވާފައިވާ އިދާރާއިން އިންތިޒާމުކޮށްގެން ބާއްވާ އިންތިޚާބެއްގައި ވޯޓުދީގެންނެވެ. އެގޮތުން ކައުންސިލުގެ ފުރަތަމަ އިންތިޚާބު ބާއްވާފައިވަނީ 28 އޭޕްރީލް 2010 ގައެވެ.
