ރިޔާސީ އިންތިޚާބުގެ ވޯޓުލުން ހޮނިހިރު ދުވަހު އޮންނަ އިރު މިހާރުވެސް އިންތިޚާބުގެ 56 ޕަސެންޓުގެ ވޯޓު ކަށަވަރު ވެފައިވާކަމަށާއި، އަމާޒަކީ 59 ޕަސެންޓު ހޯދުން ކަމަށް އެމްޑީޕީގެ ޗެއާޕާސަން ފައްޔާޒު އިސްމާއިލް ވިދާޅުވެއްޖެއެވެ.
ފައްޔާޒު މިހެން ވިދާޅުވީ އެމްޑީޕީއާ އެކު ކޯލިޝަން ހަދާފައިވާ އަދާލަތު ޕާޓީގެ "އަދާލަތު ފެންޑާ" ޖަގަހަ ހުޅުއްވައި ދެއްވުމަށް ފަހު ދެއްކެވި ވާހަކައިގައެވެ. ހުކުރު ދުވަހުގެ ރޭ މާލޭގައި ބޭއްވި ބޮޑު ޖަލްސާގައި ފައްޔާޒު ވިދާޅުވީ، ރައީސް އިބްރާހިމް މުހައްމަދު ސޯލިހު ދެވަނަ ދައުރަކަށް މި އިންތިހާބު ކާމިޔާބު ކުރައްވާނީ 56 ޕަސެންޓަށް ވުރެ މަތިން ކަމަށެވެ.
ރައީސް ސޯލިހަށް 56 ޕަސަންޓް ވޯޓު ލިބިވަޑައިގަންނަވާނެ ކަމަށް ފައްޔާޒު ވަނީ އެމްޑީޕީން ހުކުރު ދުވަހުގެ ރޭ ކާނިވާގައި ބޭއްވި ޖަލްސާގައިވެސް ވިދާޅުވެފައެވެ. އަދާލަތު ޕާޓީގެ ޖަގަހަ ހުޅުވުމުގެ ހަފުލާގައި ފައްޔާޒު ވަނީ އިންތިހާބަށް ބާކީ އޮތް ދުވަސްތަކުގައި އިތުރަށް މަސައްކަތްކޮށް އެ އަދަދު 59 ޕަސަންޓަށް އިތުރުކުރުމަށް އެދިވަޑައިގެންނެވިއެވެ.
މި ކެމްޕޭނުގައި އެ ބުނާ ޑޭޓާ ބަލަހައްޓާ ކުއްޖަކީ އަޅުގަނޑު. ތި ބޭފުޅުންނަށް ޔަގީންކަމާއި ކަށަވަރުކަމާ އެކީގައި މި ދަންނަވަނީ 56 ޕަސެންޓަށް ވުރެ އެންމެ ވޯޓަކުން ވެސް އަޅުގަނޑުމެން ތިރިއެއް ނުވާނެކަން.
– ފައްޔާޒު ވިދާޅުވިއެވެ.
އޭނާ ވިދާޅުވި ގޮތުގައި 2018 ވަނަ އަހަރު ކޯލިޝަންގައި ހިމެނުނު ނަމަވެސް މިފަހަރުގެ އިންތިހާބުގައި ކޯލިޝަންގައި ނުހިމެނޭ ބޭފުޅުންނާއެކު އެ އިންތިހާބަށްވުރެ ބޮޑު ނަތީޖާއެއް ހޯދުމަކީ އަމާޒެކެވެ. ބޭނުމަކީ ބޮޑު އަގުލަބިއްޔަތެއް ހޯދުން ކަމަށްވެސް ވިދާޅުވިއެވެ. ފައްޔާޒު ވިދާޅުވީ މިވެރިކަން ކުރިއަށް އޮތް ފަސް އަހަރުވެސް ދިއުމަކީ މުސްތަގުބަލަށް އެންމެ ރަނގަޅު ގޮތް ކަމަށާއި ކުރީގެ އަނިޔާވެރިކަމަށް ދާން އެކަކުވެސް ނޭދޭ ކަމަށެވެ.
އަދާލަތު ޕާޓީގެ ރައީސް އަދި ހޯމް މިނިސްޓަރު އިމްރާން އިއްޔެގެ ހަފުލާގައި ވިދާޅުވީ، ރައީސް އިބްރާހިމް މުހައްމަދު ސޯލިހަށް ރިޔާސީ ދެވަނަ ދައުރެއް ހޯދައި ދިނުމަށް އެ ޕާޓީ ނުކުތީ ދިވެހިންނަށް ހިދުމަތްތަކެއް ކޮށްދީ އަދި އެކަން ދިވެހިން ބަލައިގަނެފައިވާ ކަން ގަބޫލު ކުރެވޭތީ ކަމަށެވެ. ނަމަވެސް އިމްރާން ވިދާޅުވީ، މި އިންތިހާބުން މޮޅުވާނެ ކަމަށް އިދިކޮޅުގެ ޓީމުގެ އެއްވެސް ބޭފުޅަކު ހިތުގެ އަޑިން ގަބޫލު ނުކުރައްވާ ކަމަށެވެ.
