މިހާރު ސިނަމާގައި އަޅިވައިފައި އޮތް ފިލްމް "ގަދަރް 2″ އަށް ލިބެމުން އަންނަ ބޮޑު ކާމިޔާބާއި އެކުގައި އެސިލްސިލާގެ ތިން ވަނަ ފިލްމް އެއް ވެސް ގެނެސްދޭނެ ކަމަށް ޑައިރެކްޓަރު އަނިލް ޝަރުމާ ބުނެފި އެވެ.
މިކަމާ ބެހޭ ގޮތުން މީޑިއާތަކުން އަނިލްއާ ސުވާލުކުރުމުން ތިން ވަނަ ބައެއް ޕްލޭންކޮށްފައި އޮތް ކަމަށާއި ނަމަވެސް އަދި އެ ފިލްމް ގެނެސްދިނުމަށް ވަގުތު ނާގާނެ ކަމަށް ވެސް އަނިލް ވަނީ ބުނެފައިއެވެ. މި މަހުގެ 11 ގައި ރިލީޒްކުރި މި ފިލްމު އެންޑް ކްރެޑިޓްގައި ވެސް "ޓު ބީ ކޮންޓިނިއުޑް" ހިމަނާފައިވާތީ ފިލްމުގެ ވާހަކަ އަދިވެސް ކުރިއަށް އޮތީކަން ޔަގީންކޮށްދެ އެވެ.
22 އަަހަރު ފަހުން "ގަދަރް" ގެ ދެވަނަ ބައެއް ގެނެސްދިން އިރުގައި އެ ފިލްމް ވެގެން ގޮސްފައިވަނީ ބެލުންތެރިންގެ ތަރުހީބު ވަރަށް ބޮޑަށް ލިބިގެން ދިއަ ފިލްމްއެއްގެ ގޮތުގައިއެވެ.
ފުރަތަމަ ބަޔާއި ގުޅުވައިގެން ދެވަނަ ބައި ގެނެސްދީފައިވާ އިރުގައި ލީޑުން ފެނިގެން ގޮސްފައިވަނީ ފުރަތަމަ ފިލްމްގެ ލީޑުންވެސް ފެނިގެންދިއަ ތަރިންނެވެ. އެއީ ސަނީ ޑިއޯލް އާއި އަމީޝާ ޕަޓޭލް އެވެ.
"ގަދަރު" އަކީ އިންޑިއާގެ ފިރިހެނަކާއި ޕާކިސްތާންގެ އަންހެނެއްގެ ލޯބީގެ ވާހަކައެކެވެ. ފުރަތަމަ ބައިގައި ސަނީ އާއި އަމީޝާގެ ދަރިފުޅުގެ ރޯލު ކުޅުނު އުތުކާޝް ޝަރުމާ ވެސް "ގަދަރު 2″ ގައި މުހިއްމު ރޯލެއް ކުޅެފައިވެ އެވެ. އޭނަ އަކީ ޑައިރެކްޓަރު އަނިލްގެ ދަރިއެކެވެ. އުތުކާޝް އަށް މިހާރު 29 އަހަރެވެ.
ކޮމެންޓު ފޮނުވާ