މި އަހަރުގެ އެންމެ އުންމީދީ އެއް ފިލްމު ކަމަށްވާ "ނީނާ" އޮލިމްޕަސް ސިނަމާ ގައި މިރޭ ޕްރީމިއާކުރަން ތައްޔާރުވެއްޖެ އެވެ.
ވަރަށް ތަފާތު ރޯލެއް އަދި އާންމުކޮށް ދިބެހި ސިނަމާއިން ބަތަލާއިން ނުފެންނަ ކަހަލަ ވަރުގަދަ ޖެހިލުން ކުޑަ، ބާރުގަދަ އަންހެންގެ ވާހަކަ ކިޔައިދޭ މި ފިލްމް އަކީ މިއަހަރުގެ ދިވެހިި ސިނަމާގައި އަޅުވާ ފަސް ވަނަ ފިލްމުއެވެ.
މި ކްރައިން ތުރިލާ އަކީ އައި ފިލްމްސް އަށް އިލްޔާސް ވަހީދު (އިއްލެ) ލިޔެ، ޑައިރެކްޓްކޮށްފައިވާ އެއްޗެކެވެ. މިއީ އޭނަ 2019 ގައި ގެނެސްދިން ކާމިޔާބު ސައިކޮލޮޖިކަލް ތުރިލާ "ބަވަތި" އަށް ފަހު، ބެލުންތެރިންނަށް ގެނެސްދޭ ދެވަނަ ފީޗާ ފިލްމެވެ.
ނީނާގެ ލީޑުން ފެނިގެން ދާނީ އިއްލެ ގެނެސްދިން ފިލްމް "ބަވަތީ"ގެ ވެސް ލީޑުން ފެނިގެން ދިއަ ހުނަރުވެރި އެކްޓިންއެއް ދެއްކި ނުޒުހަތު ޝުޢައިބް އެވެ. ފިލްމްގެ ކާސްޓުގައި ފިލްމީ ދާއިރާއަށް އަލަށް ތަޢާރަފުވާ ޝަރަފް ޢަބްދުﷲ، ހަމްދޫން ފާރޫގް، ޖުމައްޔިލް ނިމާލް، މަރިޔަމް ރަޝީދާ އަދި މަރިޔަމް ޝަކީލާ ހިމެނެއެވެ.
މީގެ އިތުރުން ވެސް މި ފިލްމް އިން އާދަމް ރިޒްވީ (ރެކްސް)، ނަތާޝާ ޖަލީލް، ޢަލީ އިނާޒް، ފީޗާ ފިލްމަކަށް އަލަށް ތަޢާރަފްވާ ޓިކްޓޮކްގެ މަޝްހޫރު ތަރި އިބްރާހިމް ޝާއިފް (ޑެވިލް ޝާއިފް)، އަލަށް ތަޢާރަފްވާ ޙަސަން ސާމިހް މުޙައްމަދު، ހަސަން ޝިނާން (ޝިންޓޭ) އަދި އައިޝާ އަލީ ވެސް ހިމެނެއެވެ.
