ރައީސް އިބްރާހިމް މުހައްމަދު ސޯލިހުގެ ދެވަނަ ދައުރެއްގައި ރާއްޖޭގައި މުޒާހަރާ ކުރަން ފުރުސަތު ނުދޭނެ ކަމަށް އެމަނިކުފާނާއި އެކު ކޯލިޝަން ހަދާފައިވާ އަދާލަތު ޕާޓީގެ ރައީސް އިމްރާން ވިދާޅުވުމުން އިދިކޮޅު ފަރާތްތަކުން ރައްދު ދީފިއެވެ.
"ޑިމޮކްރެޓްސް ބޭފުޅުން ކަމަށް ވިޔަސް، ޕީޕީއެމް ބޭފުޅުން ކަމަށް ވިޔަސް އެނޫން ޕާޓީއެއްގެ ބޭފުޅުން ކަމަށް ވިޔަސް އަޅުގަނޑުމެން ރަށްރަށަށް އަރާއިރުގައި ތި ސަކަރާތް ޖަހަން ދެން ނުހަދާ." ރައީސް ކެމްޕެއިނަށް ރަށްރަށަށް ވަޑައިގަތުމުން އެހެން ޕާޓީތަކުގެ ސަޕޯޓަރުން މުޒާހަރާކުރާ ކުރުމާ ހިތްހަމަޖެހިވަޑައިނުގެން އިމްރާން ވިދާޅުވިއެވެ.
ޑިމޮކްރެޓްސް ޕާޓީ އުފެއްދެވުމުގައި އިސްކޮށް އުޅުއްވި، ހެންވޭރު ހުޅަނގު ދާއިރާގެ މެންބަރު ހަސަން ލަތީފް އެކަމާ ގުޅިގެން ކުރެއްވި ޓުވީޓެއްގައި ވަނީ، ސަރުކާރުގައި ކޮރަޕްޝަނާއި ވައްކަން އާންމު ކުރުމަށްފަހު ހިއުމަން ޓްރެފިކިންނާއި، ޑްރަގް ޓްރެފިކިންގެ މައްސަލަތަށް އޮއްބާލައި، ރައީސް އިބްރާހީމް މިހާރު މަސައްކަތް ކުރައްވަނީ ހިޔާލު ފާޅުކުރުމާއި އެއްވެ އުޅުމުގެ މިނިވަންކަން ހިފެހެއްޓުމަށްތޯ ސުވާލު ކުރައްވާފަ އެވެ.
ހަސަން ލަތީފްގެ އިތުރުން އުނގޫފާރު ދާއިރާގެ ޑިމޮކްރެޓްސްގެ މެންބަރު މުހައްމަދު ވަހީދު (ވައްޑެ) އިމްރާނަށް ރައްދު ދެއްވައި ކުރެއްވި ޓުވީޓެއްގައި ވިދާޅުވީ މުޒާހަރާ ކުރުމަކީ ހަމައެކަނި އިމްރާނު ވަޒީރުކަމަށް އައުމަށް ކުރެވެން އޮތް ކަމެއް ނޫން ކަމަށެވެ. އަދި އެއީ ގާނޫނުއަސާސީން ކޮންމެ މީހަކަށް ކަށަވަރުކޮށްދީފައިވާ ހައްގެއްކަން އޭނާ ފާހަގަކުރެއްވި އެވެ
ޕީޕީއެމްގެ ނައިބު ރައީސް އިބްރާހީމް ޝިޔާމް ކުރެއްވި ޓުވީޓެއްގައި ވިދާޅުވީ އިމްރާންގެ އަމިއްލަފުޅު އަދާލާތު ޕާޓީގައި "ހުކުރު ހަމަނުވާއިރު" ތޮށިގަނޑެއް ހިފައިގެން އެހެން ޕާޓީތަކުގެ ވާހަކަ ނުދެއްކިއްޔާ މާ ރަނގަޅުވާނެ ކަމަށެވެ.
އަމިއްލަފުޅު ޕާޓީގައި ހުކުރު ހަމަނުވޭ، ތޮށިގަނޑެއް ހިއްޕަވައިގެން އެހެން ޕާޓީތަކުގެ ވާގަކަ ނުދެއްކެވިއްޔާ މާ ރަނގަޅުވާނެ. ޓެރަރިޒަމް އަށް ހިތްވަރުދީ ޓެރަރިޒަމްގެ އަމަލު ހިންގުމުގެ ތާރީހެއް އޮތް ބޭފުޅެއް. ހައިރާން ނުވޭ. ސިޔާސީ މަންފާއަށް ކޮންމެފަދަ ކަމެއް ވެސް [އިމްރާން] ކުރައްވަފާނެ.
– ޝިޔާމް ވިދާޅުވިއެވެ.
ޑިމޮކްރެޓްސްއާއި ޕީޕީއެމްގެ އިތުރުން ވެސް ބައެއް ފަރާތްތަކުން ވަނީ ހިޔާލު ފާޅުކުރުމާއި އެއްވެ އުޅުމުގެ ހައްގަށް ހުރަސް އަޅާނެ ކަމަށް ދޭހަވާގޮތަށް އިމްރާން ދެއްކެވި އެ ވާހަކައާ ގުޅިގެން އޭނާއަށް ފާޑުކިޔާފައެވެ.
މަޖިލީހުގެ ކެންދޫ ދާއިރާގެ މެންބަރު އަދި ގާނޫނީ ވަކީލު އަލީ ހުސައިން ކުރެއްވި ޓުވީޓެއްގައި ވިދާޅުވީ އެއްވެ އުޅުމުގެ މިނިވަންކަމަކީ އެތަކެއް ރައްތިތުންގެ މިންނެތް މަސައްކަތާއި ގުރުބާނީން ހޯދާފައިވާ އަސާސީ ހައްގެއް ކަމަށެވެ.
މި ސަރުކާރުން ވެސް އެ ހައްގު މިދިޔަ ފަސް އަހަރު ދުވަހު ހިފަހައްޓާފައި ވަނީ ގާނޫނު އަސާސީއާ ހިލާފަށް. އިތުރަކަށް ނުހިފެހެއްޓޭނެ.
– އަލީ ހުސައިން ވިދާޅުވިއެވެ.
ރިޔާސީ ކެމްޕެއިނަށް ރައީސް އިބްރާހީމް ރަށްރަށަށް ވަޑައިގަންނަވާއިރު އެ ރަށުގައި ތިބޭ ސަރުކާރާ އިދިކޮޅު ސަޕޯޓަރުން މުޒާހަރާ ކުރުމަކީ އާންމު ކަމެކެވެ. މުޒާހަރާ ކުރަން ފުރުސަތު ނުދޭނެ ކަމަށް އިމްރާން ވިދާޅުވިއިރު އެއްވެ އުޅުމަކީ ގާނޫނު އަސާސީން ލިބިދީފައިވާ އަސާސީ ހައްގެކެވެ.
އިންޑިއާ އައުޓް ފަދަ ގަރާރުތަކުން ހިޔާލު ފާޅުކުރުމުގެ މިނިވަންކަން ހަނިވެފައިވާއިރު، މިހާރުވެސް ސަރުކާރުން އެއްވެ އުޅުމުގެ ހައްގަށް ވެސް ވަރަށް ބޮޑަށް ހުރަސް އަޅާ ކަމަށް އިދިކޮޅުން ބުނެއެވެ. އެހެން ނަމަވެސް ރައީސް އިބްރާހީމާއި، އިމްރާން އިދިކޮޅުގައި ތިއްބެވިއިރު މާލޭގައި މުޒާހަރާކޮށް ފުލުހުންނަށް އަނިޔާކޮށް ބޮޑެތި ހަމަނުޖެހުން ހިންގާފައިވެއެވެ.
