އަންނަ މަހުގެ 6 ވަނަ ދުވަހު އޮލިމްޕަހަށް ގެންނަން ތާވަލް ކޮށްފައިވާ އައިފިލްސް ގެ ދެވަނަ ފީޗާ ފިލްމު "ނީނާ" ގެ ރަސްމީ ޓްރެއިލާ މިއަދި ދައްކާލައިފި އެވެ.
1 މިނެޓާއި 28 ސިކުންތުގެ މި ޓްރެއިލާގައި ފިލްމުގައި ފެންނާނެ ވަރުގަދަ މަންޒަރުތައް ހިމަނާފައިވެ އެވެ. ވަރަށް ތަފާތު ރޯލެއް އަދި އާންމުކޮށް ދިބެހި ސިނަމާއިން ބަތަލާއިން ނުފެންނަ ކަހަލަ ވަރުގަދަ ޖެހިލުން ކުޑަ، ބާރުގަދަ އަންހެންގެ ވާހަކަ ކިޔައިދޭ މި ފިލްމް އަކީ މިއަހަރުގެ ދިވެހިި ސިނަމާގެ އެންމެ އުންމީދީ އެއް ފިލްމް ވެސް މެއެވެ.
އާސިމް ޢަލީ އަދި އަޙްމަދު ވަހީދު ޕްރޮޑިއުސްކޮށް، 'އައި ފިލްމްސް' އިން ގެނެސްދޭ ނީނާ އަކީ 2019 ގެ ސައިކޮލިޖިކަލް ތުރިލާ "ބަވަތި" އަށް ފަހު އިއްލެ ގެނެސްދޭ ދެވަނަ ފީޗާ ފިލްމެވެ. މިފިލްމަކީ އިލްޔާސް ވަހީދު (އިއްލެ) ލިޔެ، ޑައިރެކްޓްކޮށްފައިވާ ކްރައިމް ތުރިލާއެކެވެ.
ނީނާގެ ލީޑުން ފެނިގެން ދާނީ އިއްލެ ގެނެސްދިން ފިލްމް "ބަވަތީ"ގެ ވެސް ލީޑުން ފެނިގެން ދިއަ ހުނަރުވެރި އެކްޓިންއެއް ދެއްކި ނުޒުހަތު ޝުޢައިބް އެވެ. ފިލްމްގެ ކާސްޓުގައި ފިލްމީ ދާއިރާއަށް އަލަށް ތަޢާރަފުވާ ޝަރަފް ޢަބްދުﷲ، ހަމްދޫން ފާރޫގް، ޖުމައްޔިލް ނިމާލް، މަރިޔަމް ރަޝީދާ އަދި މަރިޔަމް ޝަކީލާ ހިމެނެއެވެ.
މީގެ އިތުރުން ވެސް މި ފިލްމް އިން އާދަމް ރިޒްވީ (ރެކްސް)، ނަތާޝާ ޖަލީލް، ޢަލީ އިނާޒް، ފީޗާ ފިލްމަކަށް އަލަށް ތަޢާރަފްވާ ޓިކްޓޮކްގެ މަޝްހޫރު ތަރި އިބްރާހިމް ޝާއިފް (ޑެވިލް ޝާއިފް)، އަލަށް ތަޢާރަފްވާ ޙަސަން ސާމިހް މުޙައްމަދު، ހަސަން ޝިނާން (ޝިންޓޭ) އަދި އައިޝާ އަލީ ވެސް ހިމެނެއެވެ.
