އެމްޑީޕީ ފުނޑައެއް ނުލެވޭނެ ކަމަށާއި، އަދި އެޕާޓީ ފުނޑާލިޔަކަ ނުދޭނެ ކަމަށް އެމްޑިޕީގެ ޗެއަރޕާސަން ފައްޔާޒު އިސްމާއިލް ވިދާޅުވެއްޖެއެވެ.
އޭނާ މިހެން ވިދާޅުވީ، އެމްޑީޕީ "ދަ ޑިމޮކްރެޓްސް"އަށް، އެމްޑީޕީގެ ކުރީގެ ރައީސް ނަޝީދު ސޮއިކުރެއްވުމަށްފަހު، އެމްޑީޕީ ރޫޅާނެކަމަށް ވިދާޅުވެ ދެއްކެވި ވާހަކަތަކަށް ރައްދު ދެމުންނެވެ.
ރޭ "ދަ ޑިމޮކްރެޓްސް" ޕާޓީން ބޭއްވި ޖަލްސާގައި ވާހަކަ ދައްކަވަމުން ނަޝީދު ވިދާޅުވީ އެމްޑީޕީ އުފެއްދި މަޤުސަދު މިއަދު އޮތީ މުޅިން ގެއްލިފައިކަމަށާއި، އެޕާޓީ ރޫޅާލާނެ ކަމުގައެވެ.
އަޅުގަނޑުގެ ރަހުމަތްތެރިން އެމްޑީޕީގައި ތިބި. އަޅުގަނޑު ދަންނަވަން އޮތީ ތިޔަ ތިބީ ގޯސް ތަނުގައޭ. ތިޔަބޭފުޅުންނަށް ލޯނެއް ލިބިދާނެ. އަޅުގަނޑު އެމްޑީޕީ ރޫޅާލަން. ރޫޅާލާނަން. ރޫޅާލަނަން. ރޫޅާލާނަން. ތިޕާޓީގެ ކެޔޮކަނޑު ވެއްޓިއްޖެ. ތި ޕާޓީ ރޫޅާލާނަން.
ރޭގެ ޖަލްސާގައި، ކޯފާ އިސކުރައްވާ، އެމްޑީޕީ ރޫޅާލާނެކަމަށް އިންޒާރު ދެއްވަމުން ނަޝީދު ވިދާޅުވިއެވެ.
ރޭގެ ޖަލްސާގައި ނަޝީދު ދެއްކެވި ވާހަކަތަކަށް ރައްދު ދެއްވަމުން އެމްޑީޕީގެ ވަޓްސްއަޕް ގުރޫޕަކަށް ފޮނުއްވި މެސެޖެއްގައި ފައްޔާޒު ވިދާޅުވެފައިވަނީ، އެމްޑީޕީ ރޫޅާލާނެކަމަށް ވިދާޅުވެ ނަޝީދު ބިރު ދެއްކެވުމަކީ ވަރަށް ނާތަހުޒީބީ އަމަލެއް ކަމުގައެވެ.
އެ ބޭފުޅުން އުފެއްދެވި ޕާޓީއާ ބައިވެރިވާ ކަމަށް ފާހަގަވަނީ ރައީސް ނަޝީދު ވިދާޅުވި ގޮތަށް ތިބޭނެ ބަޔަކާއި ސަރުކާރު ދެކެ ޒާތީ ކަންކަމުގައި ހިތުގައި ނަފްރަތު އުފައްދައިގެން ތިބި ބޭފުޅުން. އެއީ މައްސަލައެއް ނޫން.
ދަ ޑިމޮކްރެޓްސް ޕާޓީއަށް ވަދެތިބީ ސަރުކާރު ދެކެ ޒާތީ ވެފައިތިބި ބަޔަކާއި އަދި އޭގެ އިތުރުން ހިތުގައި ނަފްރަތު އުފައްދައިގެން ތިބި ބައެއްކަމަށް ސިފަ ކުރައްވަމުން ފައްޔާޒު ވިދާޅުވެފައި ވެއެވެ.
އިތުރަށް ފައްޔާޒު ވިދާޅުވީ އެމްޑީޕީއަކީ އެތައްބައެއްގެ ވިސްނުން ކަމަށާއި، އެޕާޓީން އުފެއްދި މީހުންގެ ވިސްނުމަކީ އެއީ ނަޝީދުގެ އާއިލާއާއި ނަޝީދަށް އުފައްދައިދޭ ޕާޓީއަކަށް ވުން ނޫން ކަމުގައެވެ.
މިއީ މި ޕާޓީ އުފެއްދުމުގައި ގުރުބާންވީ އެތައް ބައެއްގެ ވިސްނުމެއް ނޫން. އޭރު އުފެއްދި މީހުން ދެކެވަޑައިނުގަންނަވާ މިއީ ރައީސް ނަޝީދު އާއި އާއިލާއަށް އުފައްދައި ދޭ ޕާޓީއެއް ކަމަށް
ފައްޔާޒު ވިދާޅުވިއެވެ.
ފައްޔާޒު އިތުރަށް ވިދާޅުވީ އޭރު އެޕާޓީގެ ލީޑަރޝިޕަށް އައްޔަން ކުރެވުނީ ނަޝީދުކަމާއި، ޕާޓީތަކުގެ ލީޑަރޝިޕަކީ ބަދަލުވާ އެއްޗެއް ކަމުގައެވެ. އަދި ނަޝީދަށް އުޅުއްވަނީ އެކަން ހަޖަމް ނުވެގެންކަމުގައިވެސް ފައްޔާޒު ވިދާޅުވެފައި ވެއެވެ.
