އަންނަ މަހު އޮލިމްޕަހަށް ގެންނަން ނިންމާފައިވާ ފިލްމު "ނީނާ" ގެ ޕްރޮމޯޝަނަލް ލަވަ ބެލުންތެރިންނަށް ދޫކޮށްލައިފި އެވެ.
އާސިމް ޢަލީ އަދި އަޙްމަދު ވަހީދު ޕްރޮޑިއުސްކޮށް، 'އައި ފިލްމްސް' އިން ގެނެސްދޭ ނީނާ އަކީ 2019 ގެ ސައިކޮލިޖިކަލް ތުރިލާ "ބަވަތި" އަށް ފަހު އިއްލެ ގެނެސްދޭ ދެވަނަ ފީޗާ ފިލްމެވެ. މިފިލްމަކީ އިލްޔާސް ވަހީދު (އިއްލެ) ލިޔެ، ޑައިރެކްޓްކޮށްފައިވާ ކްރައިމް ތުރިލާއެކެވެ.
އޯގަސްޓް 6 ގައި އައި ފިލްމްސް އިން އޮލިމްޕަހަށް ގެންނަން ނިންމާފައިވާ މި ކްރައިމް ތުރިލާގެ ޕްރޮމޯޝަނަލް ލަވަ ގެނެސްދީފައި ވަނީ "އަލިފާން" ގެ ނަމުގަ އެވެ. މިސްޓީގެ މިއުޒިކަށް ހަދާފައިވާ ލަވަ ކިޔާފައި ވަނީ އަންދަލާ ހަލީމެވެ.
ނީނާގެ ލީޑުން ފެނިގެން ދާނީ އިއްލެ ގެނެސްދިން ފިލްމް "ބަވަތީ"ގެ ވެސް ލީޑުން ފެނިގެން ދިއަ ހުނަރުވެރި އެކްޓިންއެއް ދެއްކި ނުޒުހަތު ޝުޢައިބް އެވެ. ފިލްމްގެ ކާސްޓުގައި ފިލްމީ ދާއިރާއަށް އަލަށް ތަޢާރަފުވާ ޝަރަފް ޢަބްދުﷲ، ހަމްދޫން ފާރޫގް، ޖުމައްޔިލް ނިމާލް، މަރިޔަމް ރަޝީދާ އަދި މަރިޔަމް ޝަކީލާ ހިމެނެއެވެ.
މީގެ އިތުރުން ވެސް މި ފިލްމް އިން އާދަމް ރިޒްވީ (ރެކްސް)، ނަތާޝާ ޖަލީލް، ޢަލީ އިނާޒް، ފީޗާ ފިލްމަކަށް އަލަށް ތަޢާރަފްވާ ޓިކްޓޮކްގެ މަޝްހޫރު ތަރި އިބްރާހިމް ޝާއިފް (ޑެވިލް ޝާއިފް)، އަލަށް ތަޢާރަފްވާ ޙަސަން ސާމިހް މުޙައްމަދު، ހަސަން ޝިނާން (ޝިންޓޭ) އަދި އައިޝާ އަލީ ވެސް ހިމެނެއެވެ.
