ފްރާންސްގައި ފުލުހަކު ބަޑިޖަހާ ކުޑަކުއްޖަކު މަރާލުމާއި ގުޅިގެން އެގައުމުގައި ބޮޑެތި ހަމަނުޖެހުންތަކެއް ހިނގާން ފަށައިފިއެވެ.
ފްރާންސްގެ އެކި ސިޓީތަކުގެ ހަމަނުޖެހުން ހިގާންފަށާފައިވަނީ، ޓްރެފިކް ބަލަހައްޓާ ފުލުހަކު އުމުރުން 17 އަހަރުގެ ކުޑަ ކުއްޖަކު ހުއްޓުވާ، ބަޑިޖަހާ އޭނާ މަރާލުމާއި ގުޅިގެންނެވެ. ފުލުހަކު މަރާލާފައިވަނީ ފްރާންސްގެ އަލްޖީރިއާ އަދި މޮރޮކޯ ދަރިކޮޅުގެ ނަހެލް އެމް ނަމަކަށް ކިޔާ ކުއްޖެކެވެ.
ފްރާންސްގައި ހިނގާންފެށި ހަމަނުޖެހުންތަކުގައި ފިހާރަތައް ލޫޓުވާ، ތަންތަނާއި އަދި އެއްގަމު އުޅަނދުތަކުގައި ރޯ ކުރަމުންދާއިރު، ފްރާންސްގެ ރައީސް އެމްނޫލް މެކްރޮން ވަނީ މިހާރު ބްރަސަލްސްގައި ކުރިޔަށްދާ ޔޫރަޕިއަން ޔޫނިއަންގެ ސަމިޓް މެދުކަނޑުއްވާލެއްވުމަށްފަހު، ކެބިނެޓާއި ބައްދަލުކުރެއްވުމަށް އެނބުރި ގައުމަށް ވަޑައިގެންފައެވެ. އަދި ހުކުރު ދުވަހު ދެވަނަ ފަހަރަށް މެކްރޮން ކެބިނެޓާއި ބައްދަކު ކުރެއްވުމަށް ވަނީ ހަމަޖެހިފައެވެ.
މުޅި ފްރާންސްގައި ހިނގަމުންދާ ހަމަނުޖެހުންތަކުގައި މިހާތަނަށް 249 ފުލުސް އޮފިސަރުންނަށް އަނިޔާވެފައިވާއިރު، އެގައުމުގެ އިންޓީރިއަ މިނިސްޓަރ ގެރާލްޑް ޑާމަނިން ވިދާޅުވެފައިވަނީ، ފާއިތުވި ބުރާސްފަތި ދުވަހުން ފެށިގެން 40،000 ފުލުހުން މިހާރު މަގުތަކަށް ނެރެފައިވާކަމުގައެވެ. އަދި ހަމަނުޖެހުން ހިންގި 667 މީހަކު މިހާތަނަށް ހައްޔަރު ކޮށްފައިވާކަމަށްވެސް އޭނާ ވިދާޅުވެފައި ވެއެވެ.
މިހަމަނުޖެހުންތައް އެންމެ ފުރަތަމަ ފެށިފައިވަނީ ފްރާންސްގެ މާސީއްލޭ، ލިޔޮން، ޕައު، ޓޫލޫސް އަދި ލީއްލޭގެ އިތުރުން އެގައުމުގެ ވެރިރަށް ޕެރިހުގެ ބައެއް ހިސާބުތަކުންނެވެ. އޭގެ ތެރޭގައި 17 އަހަރުގެ ނަހެލް އެމް މަރާލި ސަރަހައްދު ކަމަށްވާ ޕެރިހުގެ، މަސައްކަތްތެރިންގެ އަވަށެއް ކަމުގައިވާ ނަންޓެރޭވެސް ހިމެނެއެވެ.
މުޅި ފްރާންސްގައި ހަމަނުޖެހުން ހިނގަމުންދިޔަ ނަމަވެސް، އެގައުމުގައި ކުއްލިހާލަތު އިއުލާން ނުކުރައްވާނެކަމަށްވެސް މެކްރޮން ވަނީ ވިދާޅުވެފައެވެ.
ކުޑަ ކުއްޖާގެ ގަޔަށް ބަޑިޖެހި ފުލުސްމީހާގެ މައްސަލަ ފްރާންސްގެ މުވައްސާތަކުން މިހާރުވަނީ ތަހުގީގު ކުރާން ފަށާފައެވެ. އަދި އޭނާ ކުށަށް މިހާރު އެއްބަސް ވެފައިވާކަމަށްވެސް ޕްރޮސެކިއުޓަރުން ވަނީ ވިދާޅުވެފައެވެ. އޭނާ މިހާރުވަނީ ހައްޔަރުވެސް ކޮށްފައެވެ.
ހައްޔަރު ކޮށްފައިވާ ފުލުސް މީހާގެ ގާނޫނީ ވަކީލު ވިދާޅުވެފައިވަނީ އޭނާ ފުރަތަމަ ބަޑި ޖަހާފައިވަނީ ކާރު ދުއްވަން އިން ޑްރައިވަރުގެ ފަޔަށް ކަމަށެވެ. އެހެންނަމަވެސް ޑްރައިވަރު ފުލުސް މީހާއަށް ހަމަލާ ދިނުމާއި ގުޅިގެން މެޔަށް ބަޑިޖަހަން ޖެހުނީކަމަށެވެ. އެހެންނަމަވެސް 17 އަހަރުގެ ނަހެލް އެމް މަރާލުމަކީ ފުލުސް މީހާގެ މަގަސަދު ނޫންކަމަށްވެސް އޭނާގެ ގާނޫނީ ވަކީލު ވިދާޅުވެފައި ވެއެވެ.
