ސިޔާސީ ޕާޓީއެއް އުފެއްދުމަށްޓަކައި، އިލެކްޝަންސް ކޮމިޝަނުން ކުރަންޖެހޭ ހުރިހާ މަސައްކަތެއް ނިންމާފައިވާއިރު، ކޮމިޝަންގެ ބައްދަލުވުމަކުން އެޕާޓީ އުފައްދަން ހުއްދަ ނުދިނުމަކީ ކޮމިޝަންގެ ޒިންމާ އަދާކުރެވޭ ކަމާއިމެދު ސުވާލު އެފެދޭ އަދި ބޮޑު ލަދެއް ކަމުގައި އިލެކްޝަންސް ކޮމިޝަންގެ ރައީސް ފުއާދު ތައުފީގް ވިދާޅުވެއްޖެއެވެ.

ރައްޔިތުންގެ މަޖިލީހުގެ ރައީސް މުޙައްމަދު ނަޝީދާއި، އެމް.ޑީ.ޕީން ވަކިވެވަޑައިގެންނެވި ރައްޔިތުންގެ މަޖިލީހުގެ މެމްބަރުން އިސްކޮށް ތިއްބަވައިގެން އުފައްދަވަން މަސައްކަތްކުރައްވާ ދަ ޑިމޮކްރެޓިސް އުފެއްދުމުގެ ހުއްދަ ދިނުމާއި މެދު އިލެކްޝަނަށް ގޮތެއް ނިންމިފައި ނުވަނީ ކޮމިޝަންގެ ދެ މެމްބަރަކު އެކަމާއި ދެކޮޅު ހެދުމުންނެވެ.

"ދަ ޑިމޮކްރެޓްސް"ގެ ނަމުގައި ސިޔާސީ ޕާޓީއެއް އުފެއްދުމުގެ ހުއްދަ އިލެކްޝަންސް ކޮމިޝަނުން ދެއްވާފައިވަނީ މިދިޔަ މަހުގެ 24 ވަނަ ދުވަހު ހެންވޭރު ހުޅަނގު ދާއިރާގެ މެންބަރު ޙަސަން ލަތީފަށެވެ. ޕާޓީ އުފެއްދުމަށް 3،600 މީހުންގެ ފޯމާއިއެކު އިލެކްޝަނަށް ހުށަހެޅީ މިމަހުގެ ފުރަތަމަ ދުވަހުއެެވެ. ދަ ޑިމޮކްރެޓްސް އުފެއްދުމަށް ހުއްދަ ދެއްވުމާއި ގުޅޭގޮތުން ބޭއްވި ޖަލްސާގައި ބައިވެރިިވި 4 މެމްބަރުންގެ ތެރެއިން 2 މެމްބަރުންނަށް ޕާޓީ އުފެއްދުމުގެ ހުއްދަ ދޭން ތާއީދު ކުރެވުނު ނަމަވެސް، 2 މެމްބަރަކު ބޭނުންވީ ފޯމުތައް އަދި ޗެކް ކުރުމަށް ކަމަށްވާތީ ހުއްދަ ދިނުން މަޑުޖައްސާލާފައެވެ.

ފުއާދު ރޭ ސީއެންއެމް ޓީވީގައި ވީދާޅުވީ ދަ ޑިމޮކްރެޓްސްއަށް ހުއްދަ ދިނުމަށް ކުރަންޖެހޭ އިދާރީ ހުރިހާކަމެއް ފުރިހަމަވެ ނިމިފައިވާތާ ދުވަސްތަކެއް ވެއްޖެ ކަމަށާއި ނަމަވެސް އެޕާޓީ އުފެއްދުމަށް ހުއްދަ ނުދެވެނީ އީސީގެ ބައެއް މެމްބަރުން ޖަލްސާއަށް ހާޒިރުވެވަޑައިގެންނެވުމަށް ދެކޮޅު ހައްދަވާތީ ކަމަށެވެ.

އާދީއްތަ ދުވަހާ ހަމައަށް ދިޔައިރު އޮތީ އަޅުގަނޑުމެން ޗެކް ކުރަންޖެހޭ ހުރިހާ ޗެކެއް ކުރެވި ނިމިފަ، އަދި އިތުރަށް އެކަމަކު އެހެން ބޭފުޅުން ބޭނުންފުޅުވީ، އިތުރު ޗެކެއް ކުރަން، އެޗެކްވެސްކޮށް މިހާރު ވަނީ ނިމިފަ، އެހެން ނަމަވެސް ޖަލްސާއަށް ބައެއް ބޭފުޅުން ވަޑައި ނުގަތުމުގެ ސަބަބުން މިދިޔަ ބުދަ ދުވަހުވެސް ޖަލްސާ ނުބޭއްވިފަ، އެހެންވީމަ އެޕާޓީއަށް ހުއްދަ ނުދެވިފަ އެހެންވީމަ އަޅުގަނޑު ދެކޭ ގޮތުގައި އެއީ އަޅުގަނޑުމެއްގެ ވަރަށް ބޮޑު ވެއްޓުމެއް، އިލެކްޝަންސް ކަމިޝަންގެ ވާޖިބު އަދާކުރުމަށް އަޅުގަނޑުމެން މިވަނީ ނުކުޅެދިފަ އެއީ އަޅުގަނޑަށްވެސް ލިބޭ ހުތުރެއް، އަނެއްކާ ކަމިޝަނުގެ ކޮންމެ މެމްބަރަކަށްވެސް ލިބޭ ހުތުރެއް.

– ފުއާދު ވިދާޅުވިއެވެ.

ދަ ޑިމޮކްރެޓްސްއަށް ހުއްދަ ދިނުމަށް އީސީގެ ދެ މެމްބަރަކު ސަރުކާރާއި ގުޅިގެން ހުރަސް އަޅަމުން ގެންދާކަމަށް ޑިމޮކްރެޓްސް އުފެއްދުމަށް އިސްކޮށް ހަރަކާތްތެރިވާ ބޭފުޅުން ގެންދަވަނީ ވިދާޅުވަމުންނެވެ. އަދި އެތުހުމަތު ކުރައްވަނީ އެކޮމިޝަނުގެ މެމްބަރު އަލީ ނަޝާތުއަށާއި މުހައްމަދު އާސިފް އަށެވެ. މިދެ މެމްބަރުން ވަނީ ޑިމޮކްރެޓްސް އުފެއްދުމަށް ދެކޮޅު ހައްދަވައި ޖަލްސާތަކަށް ވަޑައި ނުގެތް ކޯރަމް ގެއްލުވާލަމުންނެވެ.

ދަ ޑިމޮކްރެޓްސްގެ ނަމުގައި ސިޔާސީ ޕާޓީއެއް އުފެއްދުމުގެ މަސައްކަތް ކުރަމުންދާއިރު، އެޕާޓީއިން ވަނީ ކުރިއަށް އޮތް ރިޔާސީ އިންތިޚާބުގައި ކެނޑިޑޭޓަކު ނެރޭނެކަމަށް ވެސް ހާމަކޮށްފައެވެ. ނަމަވެސް އިލެކްޝަންގެ މިހާރުގެ ހާލަތު އޮތް ގޮތުން ކެނޑިޑޭޓަކު ނެރުމަކީ ދުރުކަމެކެވެ.