ކުރިއަށް އޮތް ރިޔާސީ އިންތިޚާބުގައި ވޯޓު ލެވޭ ހުރިހާ ފަރާތްތަކުންވެސް ވޯޓްލުމަށާއި ވޯޓް ލުމުގެ ހައްގުގެ ބޭނުން ކުރުމަށް ރައްޔިތުންގެ މަޖިލީހުގެ ނައިބު ރައީސް އީވާ އަބްދުﷲ އިލްތިމާސްކުރައްވައިފިއެވެ.
އީވާ މިހެން ވިދާޅުވީ "ޕްރެކްޓިސް ޕާލަމެންޓް ފޯ ޔޫތް 2023″ ގެ ނިންމުމުގެ ރަސްމިއްޔާތު ޝަރަފުވެރިކޮށްދެއްވާ ދެއްކެވި ވާހަކަފުޅުގަ އެވެ.
އީވާ ވިދާޅުވީ ވޯޓްދޭނެ މީހަކު ނެތް ކަމަށް ބުނެ އިންތިޚާބުތަކުގައި ބައިވެރިވާން ބޭނުން ނުވާ ކަމަށް ބައެއް ޒުވާނުން ބުނާ އަޑު އިވެމުންދާ ކަމަށާއި ނަމަވެސް އިލްތިމާސަކީ ވޯޓްގެ ހައްގު ދޫކޮށް ނުލެއްވުން ކަމަށެވެ. މިއީ ވޯޓު ލުމުގެ ހައްގު ލިބިފައިވާ އެހެން މީހުންނަށް ވެސް ދޭންޖެހޭ އިލްތިމާސެއް ކަމަށް އީވާ ވިދާޅުވި އެވެ.
"އަޅުގަނޑު މިއަދު ހުއްޓި މިހުރީ ވޯޓްލާންވީ ވަކި ބަޔަކަށް ބުނާކަށް ނޫން. އަޅުގަނޑު މިއަދު ހުއްޓި މިހުރީ ވޯޓްލައްޗޭ. ވޯޓްލެވޭ މީހާ ހެޔޮ ނުވާނޭ ވޯޓްލައްޗޭ. ވޯޓްލެވޭ ކުއްޖާ ވޯޓްލައްޗޭ. އަދި ވޯޓްލެވޭ އެހެން މީހުން ކައިރީ ވެސް ވޯޓްލާން ބުނައްޗޭ." އީވާ ވިދާޅުވި އެވެ.
އީވާ ވިދާޅުވީ ވޯޓުލައިގެން އެންމެ ބޭނުންވާ ގޮތް ފަހަރެއްގައި ނުވެދާނެ ކަމަށާއި ނަމަވެސް އެންމެ ބޭނުން ނުވާ ގޮތާ ދުރަށްދާން ވެސް ވޯޓު ލާން ވާނެ ކަމަށެވެ.
"ވޯޓު ނުލީމަ އޭގެ މާނަކީ، ޑިފެކްޓްކޮށް އަނެއް މީހާއަށޭ ތިޔަ ކުދިންގެ ވޯޓު އެ ލައިދޭނީ. އަނެއް މީހާ އަތަށް އެ ދޫކޮށްލެވެނީ، ފަސް އަހަރަށް ވަރަށް ބޮޑު ބާރެއް." އީވާ ވިދާޅުވި އެވެ.
މިހާރުގެ ޒުވާނުންނަށް ވުރެ ސިޔާސީ ގޮތުން ހަރަކާތްތެެރި ޒުވާނުންނެއް ނުފެންނަ ކަމަށާއި އެގޮތުން ސޯޝަލް މީޑިއާގެ ވަސީލަތްތައް މެދުވެރިކޮށް ސިޔާސީ ހުރިހާ ކަމަކަށް ވެސް ޒުވާނުން ފާޑުކިޔާ މަންޒަރު ފެންނަ ކަމަށްވެސް އީވާ ވިދާޅުވި އެވެ.
