ޙައްޖު މަހުގެ ފުރަތަމަ 10 ދުވަހަކީ ދުނިޔެއަށް އަންނަ އެންމެ މާތް ދުވަސްތައް ކަމަށާއި، އަދި އެދުވަސްތަކަކީ ހެޔޮ އަމަލުތައް ކުރުން މާތްﷲ އެންމެ ލޯބިވެ ވޮޑިގެންވާ ދުވަސްތައް ކަމުގައި މިއަދުގެ ހުކުރު ޚުޡުބާގައި ވިދާޅުވެއެއްޖެއެވެ.
"ޙައްޖުމަހުގެ ފުރަތަމަ 10 ދުވަސް" މިމައުޟޫއަށް ޚާއްސަ ކުރެވިގެންދިޔަ މިއަދުގެ ހުކުރު ޚުޡުބާގައި ވިދާޅުވި ގޮތުގައި، މާތްﷲގެ ހަޒުރަތުގައި އެންމެ ލޮބުވެތި ވެގެންވާ މައްސަރުތަކަކީ ޙުރުމަތްތެރި ވެގެންވާ މައްސަރުތައް ކަމުގައެވެ.
އެއީ ރަޖަބު މަހާއި، ޒުލްޤައިދާމަހާއި، ޒުލްޙިއްޖާމަހާއި، އަދި މުހައްމަރަމް މައްސަރުކަން ބަޔާން ކުރައްވަމުން މިއަދު ޚުޡުބާގައި ވިދާޅުވި ގޮތުގައި މީސްތަކުންގެ ކުރު ހަޔާތުގައި ހެޔޮކަމުގެ މާތް މޫސުންތައް، ގިނަގުނަ ދަރުމަޔާއި ސަވާބު ލިބޭގޮތުން، ތަކުރާރު ގޮތެއްގައި މާތްﷲ ލައްވަވާފައިވުމީ، އެކަލާނގެ އޯގާވަންތަކަމާއި ރަޙުމަތްވަންތަ ކަމުގެ ބޮޑުކަން ހާމަވެގެންދާ ކަމެއް ކަމުގައެވެ.
ބަރަކާތްތެރި ރަމަޟާންމަހުގެ ހަނދާންތައް ފިލައި ނުދަނީސް އަހަރެމެންނާއި ކުރިމަތިވަމުން މިއަންނަނީ ދުނިޔެއަށް އަންނާނޭ އެންމެ މާތް ދުވަސްތަކެވެ. ހެޔޮ ޢަމަލު ކުރުމަށް މާތް ﷲ އެންމެ ލޯބިވެވޮޑިގެންވާ ދުވަސްތަކެވެ.
މިއަދުގެ ހުކުރު ޚުޡުބާގައި ވިދާޅުވެފައި ވެއެވެ.
ހުކުރު ޚުޡުބާގައި އިތުރަށް ވިދާޅުވި ގޮތުގައި، މި ދުވަސްވަރަކީ ދުނިޔެއަށް އަންނަ އެންމެ ހެޔޮ ދުވަސްތަކަށް ވުމުގެ ސަބަބެއް ކަމުގައި ޢިލްމުވެރިން ބަޔާން ކުރައްވާފައިވަނީ އެންމެ މަތިވެރި ހެޔޮ ޢަމަލުތައް މި ދުވަސްތަކުގައި ޖަމާވެގެންދާތީ ކަމުގައެވެ. އެގޮތުން ނަމާދާއި، ރޯދައާއި، ޞަދަގާތާއި، ޙައްޖުގެ މަތިވެރި އަޅުކަން މިދުވަސްވަރު ޖަމާވެގެން އަންނާތީ މިދުވަސްތަކުގެ ބޭނުން ހެޔޮގޮތުގައި ހިފުމަށްޓަކާ ހެޔޮ އަމަލުތައް ކުރުމަށް އަވަސް ވެގަތުމަށް ޚުޡުބާގައި ގޮވާލައްވާފައި ވެއެވެ.
މުސްލިމް އަޚުންނޭވެ! އެންމެ ފުރަތަމަ ކަމަކަށް ތެދުވެރި އިޚްލާސްތެރި ތައުބާއަކުން ތައުބާވެ މިދުވަސްތައް ފަށާށެވެ! ތައުބާވާ އަޅުންދެކެ ﷲ ލޯބިވެ ވޮޑިގަންނަވައެވެ. އަދި ތައުބާވުމަކީ އެންމެ ގިނައިން ކީރިތި ޤުރުއާންގައި ގޮވާލައްވާގައިވާ އެއް ކަންކަތެކެވެ.
މިދުވަސްވަރު ހެޔޮ އަމަލުތައް ގިނަކޮށް، ކުރެވިފައިވާ ކުށްފާފަތަކަށް ތައުބާވުމަށް މިއަދުގެ ހުކުރު ޚުޡުބާގައި ނަސޭހަތްތެރި ވެފައި ވެއެވެ.
މިގޮތުން ޚުޡުބާގައި ވިދާޅުވި ގޮތުގައި މިދުވަސްވަރު ކުރެވޭނެ ހެޔޮ އަމަލުތަކުގެ ތެރޭގައި ތަކްބީރާއި ތަސްބީހަ ކިޔައި މާތްﷲގެ މަތިން ހަދުމަ ކުރުން ހިމެނެއެވެ.
