މި ހިނގާ 19ވަނަ މަޖިލިހުގެ ރިޔާސަތާއި އެމްޑީޕީގެ ރައީސް މުހައްމަދު ނަޝީދު ހަވާލުވެ ވަޑައިގެންނެވީ 2019ވަނަ އަހަރުގެ އެޕްރިލްމަހު ބޭއްވުނު މަޖިލިސް އިންތިޚާބުގައި އެމްޑީޕީއަށް ލިބުނު ސުޕަރ މެޖޯރިޓީ އާއެކުވެއެވެ.
އެ އިންތިޚާބުގައި އެމްޑީޕީން ހޯދި ބޮޑު ކާމިޔާބާއެކުވެސް، މަޖިލިސް ރައީސްކަމަށް ވަޑައިގަންނަވާނޭ ފަރާތަކާމެދު ރައީސް އިބުރާހިމް މުހައްމަދު ސަލިހާއި، އޭރުވެސް މިހާރުވެސް އެމްޑީޕީގެ ރައީސްކަމުގައި ހުންނެވި މުހައްމަދު ނަޝީދާ ދެބޭފުޅުންގެ މެދުގައި ޚިޔާލު ތަފާތުވުން އުފެދިގެން ދިޔައެވެ.
އަދި އެފަހަރުވެސް މަޖިލިސް ރައީސްކަމަށް ވަޑައިގަންނަވަން ބޭނުންފުޅު ނުވާކަމަށް ވިދާޅުވެ، މަޖިލިސް ރައީސްކަމަށް އައްޑޫ ހިތަދޫ އުތުރު ދާއިރާގެ މެމްބަރުން މުހައްމަދު އަސަލަމް ގެންނަވަން ނަޝީދު މަސައްކަތް ކުރެއްވިއިރު، ރައީސް ސާލިހު އޭރު މަޖިލިސް ރައީސްކަމަށް ގެންނަވަން މަސައްކަތް ކުރެއްވީ ވިލިފުށީ ދާއިރާގެ މެމްބަރު ހަސަން އަފީފެވެ.
އެހެންނަމަވެސް މި އުފެދު ޚިޔާލު ތާފާތުވުންތަކުގެ ތެރޭގައި، މަޖިލިސް ރައީސްކަމަށް ވަޑައިގަންނަވަން ބޭނުންފުޅު ނުވާކަމަށް ވިދާޅުވަމުން ގެންްދެވުމަށްފަހު، އެމްޑީޕީގެ ޕީޖީގައި ތިއްބެވި ގާތް ބޭފުޅުން މެދުވެރިކޮށް ލޮބީ ކުރައްވައިގެން މަޖިލިސް ރިޔާސަތަށް ވަޑައިގެންނެވީ ނަޝީދެވެ.
އަދި މަޖިލިސް ރިޔާސަތަށް ސީދާ ނަޝީދު ވަޑައިގެންނެވުމަށް ބޭނުންފުޅުވުމާއެކު، އެ ނިންމެވުމަށް ރައީސް ސާލިހުވެސް ރުހުން ދެއްވާ، އެންމެފަހުން ރައްޔިތުންގެ މަޖިލިހުގެ ރައީސްކަމުގެ މަގާމަށް ނަޝީދު ވަޑައިގެންނެވީ 2019ވަނަ އަހަރުގެ މޭމަހުއެވެ.
އެހެންނަމަވެސް، އެއަށްފަހު މަޖިލިހުގެ ރިޔާސަތުގައި އިންނަވައިގެން ނަޝީދުވަނީ ރައްޔިތުންގެ މަޖިލިހުގެ ރިޔާސަތުން އެތައް އަހަރެއްވަން ދަމަހައްޓަމުންދިޔަ އެތައް އުސޫލުތަކެއް މުގުރާލައްވާ، އެ މަޖިލިހުގެ ގަވާއިދާ ޚިލާފަށް، މެމްބަރުންގެ ޝަކުވާތަކަށް ފަރުވާލެއް ނުބަހައްޓަވާ އެތައް ކަމެއް ކުރައްވަމުން ގެންދަވާފައެވެ.
އޭގެ ތެރޭގައި ހިމެނޭ، އެންމެ ބޮޑަށް ފާހަގަވާންހުރި ކަންކަމުގެ ތެރޭގައި، މަޖިލިސް ރިޔާސަތުގައި އިންނަވައިގެން މަޖިލިސް ފްލޯގައި ހިނގާ ބަހުސްތަކުގައި ނަޝީދު ބައިވެރިވަމުން ދިއުމާއި، މީޑިއާ ހެޑްލައިންތައް ހެއްދެވުމަށް އަމިއްލަފުޅު ސްޓޭޓްމަންޓްތައް ނެރުއްވަމުން ގެންދިއުމުގެ އިތުރުން، މަޖިލިހަށް ޖަވާބުދާރީވުމަށް ވަޑައިގަންނަވާ ބޭފުޅުންނަށް އިންޒާރުދެއްވުން ފަދަ އެތައް ކަމެއް ހިމެނެއެވެ.
ކުޑަމިނުން، ރައްޔިތުންގެ މަޖިލިހުގެ މެމްބަރުން ވަޒީރުންނާ ކުރާ ސުވާލުތައް، ރިޔާސަތުގައި އިންނަވައިގެން ނަޝީދު ބޭނުންވާ ގޮތަކަށް ތަރުޖަމާ ކުރެއްވުން ފެށިގެން، ރިޔާސަތުގައި އިންނަވައިގެން ކޯފާ އިސްކުރައްވާ މެމްބަރުންނަށް އިންޒާރުވެސް އެތައްފަހަރެއްގެ މަތިން ދެއްވާފައި ވެއެވެ.
އެހެންނަމަވެސް ރައްޔިތުންގެ މަޖިލިސް ހިންގާންވީ ގޮތް ބަޔާންކުރާ ގަވާއިދުގައި ވާގޮތުން، މަޖިލިސް ރިޔާސަތުގައި އިންނަވާ ބޭފުޅަކަށް ތަޅުމުގައި ހިނގާ ބަހުސްތަކުގައި ބައިވެރިވެވަޑައެއް ނުގެންނެވޭނެއެވެ. އަދި އަމިއްލަފުޅު ޚިޔާލު ފާޅުކޮށް، ކަންކަމަށް ގޮތް ކިޔުއްވާ، މީޑިއާ ހެޑްލައިން ހެއްދެވުމަށް ސްޓޭޓްމަންތައް ނެރުއްވުން އެއީ ކަނޑައެޅިގެން މަޖިލިސް ގަވާއިދުން މަނާ ކޮށްފައިވާ ކަންކަމެވެ.
ހަމައެއާއެކު ރާއްޖޭގައި އުފެދިފައޮތް ހަލަބޮލި ސިޔާސީ މަސްރަހުގައި، ހަގީގަތުގައިވެސް ވަރަށްވެސް ކެތްތެރި، ހަމަ ހިފަހައްޓަވާ ބޭފުޅަކަށް މެނުވީ މަޖިލިސް ރިޔާސަތުގައި ހިފަހައްޓާ ނުލެވޭނެކަންވެސް އިސްވެދިޔަ ދައުރުތަކުގައިވެސް، އަދި މި ދައުރުގައިވެސް ކަން ހިންގަމުންދާ އުސޫލުތަކަށް ބަލާއިރު މިދަނީ ވަރައްވެސް ރަގަޅަށް ސާފުވެ ހާމަ ވަމުންނެވެ.
މަޖިލިސް ރައީސްކަންވެސް ކުރެއްވީ ވެރިކަންވެސް ކުރެއްވި ބީދައިން!
ނަޝީދު 2008 ވަނަ އަހަރު އޮތް ރިޔާސީ އިންތިޚާބު ކާމިޔާބު ކުރައްވައިގެން ރާއްޖޭގެ ވެރިކަމަށް ވަޑައިގެންނެވީ ޑިމޮކްރަސީގެ މެޑަލް ޖައްސަވައިގެންނެވެ. އެއަށްފަހު ވެރިކަމުގައި، އަމިއްލަަފުޅު ސަޕޯޓަރުން މެދުވެރިކޮށް އިސްތިހާރު ވެވަޑައިގަންނަވަމުން ގެންދެވީ ދެކުނު އޭޝިއާގެ މަންޑޭލާގެ ނަމުންނެވެ.
އެހެންނަމަވެސް ވެރިކަމުގެ ދެބައި ހަމަޔަށް ވަޑައި ނުގެންނެވެނީސް، ގާޒީއަކު ނިޒާމުން ގެއްލުވާލެއްވިއެވެ. ވެރިކަމަށް ވަޑައިގަންނަވަން ހެއްދެވި ކޯލިޝަން އަހަރުދުވަސް ނުވަނީސް ރޫޅާލައްވާ، ސިޔާސީ ވާދަވެރިން ހައްޔަރު ކުރައްވާން ފެއްޓެވީއެވެ. އަދި އެވަރުންނުވެ، އަމިއްލަފުޅު ކެބިނެޓް އުވާލައްވާ، ޗާޓުން ބޭރުން އެތައް ކަމެއް ކުރައްވާނެކަމަށް ވިދާޅުވެ، ތަންފީޒު ކުރެއްވި ހަރުކަށި ޚުދުމުޚްތާރު ސިޔާސަތުތަކާއެކު، ސިޔާސީ މަސްރަހަށް އައި ހަލަބޮލިކަމުގެ ތެރެއިން 2 އަހަރާއި ބައި ނުވަނީސް ވެރިކަން ވެއްޓުނީ، ނަޝީދު އަމިއްލަފުޅަށް ލައިވް ޓީވީގައި މަގާމުން އިސްތިއުފާ ދެއްވައިގެންނެވެ.
އެއަށްފަހުވެސް އަމިއްލަފުޅު ޕާޓީ އެމްޑީޕީ މުށުތެރެއަށް ލައްވައިގެން ނަޝީދު ސިޔާސީ މަސައްކަތް ކުރައްވަމުން ގެންދަވާފައިވަނީ ބަޔަކު މީހުންގެ ޖަޒުބާތާއި ކުޅެ، އެމްޑީޕީއަކީ އަމިއްލަފުޅު އެސެޓެއްގެ ގޮތުގައި ހައްދަވައިގެން ކަމުގައި ދެންނެވުމަކީ ދޮގަކަށް ނުވާނެއެވެ.
އެހެންނަމަވެސް އެ ހަގީގަތް އެގޮތުގައި ދެމި އޮވެފައިވަނީ ރައީސް ސާލިހު ރާއްޖޭގެ ވެރިކަމަށް ވަޑައިގެންނެވުމާއި ހަމަޔަށް ކަމުގައި ދެންނެވިދާނެއެވެ. މިގޮތުން ރައީސް ސާލިހުގެ ވެރިކަމުގެ މެދަކާއި ހަމަޔަށް ނުދަނީސް، ރާއްޖޭގެ ވެރިކަމުގެ ނިޒާމު ބަދަލު ކުރެއްވުމަށް ބޭނުންފުޅުވެ، ޕާޓީގެ އެތެރެ ގަޑުބަޑުކޮށް، އެންމެފަހުން ނަޝީދު މަޖިލިސް ރިޔާސަތު ހެއްދެވީ ސަރުކާރާ ދެކޮޅަށް ބޭނުން ބޭނުން ކުރައްވާން އޮތް ހަތިޔާރެއް ކަމުގައެވެ.
ޚުދުމުޚްތާރުކަމާއި ދެކޮޅަށް އެންމެފަހުން ތެދުވީ އަމިއްލަފުޅު ޕާޓީ!
ފާއިތުވެދިޔ 2 އަހަރެއްހާ ދުވަހު ނަޝީދު މަޖިލިސް ރިޔާސަތު ބޭނުން ކުރައްވާފައިވަނީ، އަމިއްލަފުޅު ސިޔާސީ އެޖެންޑާ ކުރިޔަށް ނެރުއްވުމުގެ އިތުރުން ރައީސް ސާލިހުގެ ސަރުކާރާ ދެކޮޅަށް ބޭނުން ކުރެއްވި ސިޔާސީ ހަތިޔާރެއްގެ ގޮތުގައިވެސް މެއެވެ.
ރިޔާސަތުގައި އިންނަވައިގެން ބޭނުންވާ ބިލްތައް ތާވަލު ނުކުރައްވާ، އިދިކޮޅު ފަރާތްތަކާއި ގުޅިގެން ސަރުކާރު ބަދުނާމުކުރުމަށް ގަރާރުތަކަށް ފުރުސަތު ދެއްވުމާއި، މަޖިލީހަށް ވަޑައިގަންނަވާ ވަޒީރުންނަށް އިންޒާރު ދެއްވުމާއި، ސަރުކާރަށް ޕްރެޝަރު ކުރެއްވުމަށް ރައްޔިތުންގެ މަޖިލީހުގެ ލިޔެކިޔުންތައް ނަޝީދު އަޑީގައި ހުންނަވައިގެން ލީކު ކުރެއްވުންފަދަ، އުސޫލާއި ޚިލާފު އެތައްކަމެއް މަޖިލިސް ރައީސްކަމުގައި ހުންނަވައިގެން ނަޝީދު ކުރައްވާފައިވާކަން ފާޅުކަން މިއީ ފާޅުކަންބޮޑު ގޮތެއްގައި އިއްޔެވެސް މިއަދުވެސް ފެންނާން ހުރި ހަގީގަތްތަކެވެ.
އޭގެ އިތުރުންވެސް، މަޖިލިހުގެ ރިޔާސަތުގައި އިންނަވައިގެން ކޯފާ އިސްކުރައްވާ، ދަައުލަތުގެ ތިންބާރުގެ ތެރެއިން އެއްބާރުގެ އެންމެ އިސްވެރިއެއްގެ މަގާމުގައި ހުންނަވައިގެން، އެކްޓިވިސްޓެއްގެ މޭރުމުން މެމްބަރުންނަށް އިންޒާރު ދެއްވާ، މަޖިލިސް ރައީސްކަން ކުރެއްވުމަށް ލިބިވަޑައިގެންނެވި ފުރުސަތުގައި ނަޝީދު އިންތިހާއަށް ޚުދުމުޚްތާރުކަން އިސްކުރައްވާފައިވާކަމީ އެއްވެސް އޮޅުމެއް އޮތްކަމެއް ނޫނެވެ.
އާ ގާނޫނުއަސާސީން ގެނެސްދިން، ދައުލަތުގެ 3 ބާރުގެ ތެރެއިން 2 ބާރެއްގެ އެންމެ އިސްވެރިޔާގެ މަގާމް ފުރުއްވަން ނަޝީދަށް ލިބިވަޑައިގެންނެވި ފުރުސަތުގައި އޭގެ އިންތިހާއަށް ޚުދުމުޚްތާރުކަން އިސްކޮށް، ނަޝީދު ތަމްސީލު ކުރައްވާފައިވަނީ އޭނާގެ އަސްލު ސިފަކަމުގައި އޭރުވެސް މިހާރުވެސް ގަބޫލުކުރާ އެތައް ބަޔަކު އެބަތިއްބެވެ.
އެހެންނަމަވެސް އެއް ތަފާތެއް އޮތްކަމުގައި މިއަދު މިވަނީ ގަބޫކުރާން މަޖުބޫރުވެފައެވެ. އެއީ އެ ޚުދުމުޚުތާރު ކަމާއި ބޭއިންސާފު ލޮލުންދެކި، އަތުން ހިފާ، އަދި އެކަން ހިތުގެ އަޑިން ގަބޫލުކުރަމުން މިއަދު އެދަނީ ކުރިން ނަޝީދަށް މަންޑޭލާގެ ލަގަބު އެރުއްވި ބޭފުޅުންނެވެ. ނަޝީދުގެ ޚުދުމުޚްތާރުކަމުން ދައުލަތުގެ އެެއްބާރު މިންޖުކުރުމަށް މިއަދު ފޫގަޅައިގެން ތިއްބެވީ ސިޔާސީ ގޮތުން އިނދިކޮޅު ފަރާތްތަކެއް ނޫނެވެ. އެއްކޮޅު ފަރާތަކެވެ. އަމިއްލަފުޅު ޕާޓީގެ މެމްބަރުންނެވެ.
އެއީ ފާއިތުވި 15 އަހަރުދުވަހު ނަޝީދު އެބަޔަކު އޮޅު ކޮށްގެން، އެ ބަޔަކު މެދުވެރިކޮށް އެހެން އެތައްބައެއްގެ އަބުރުކަތިލާ، ސިޔާސީ ހަޔާތް ފުނޑުފުނޑުކޮށް، ނާޖާއިޒު އެތަކެއް މަންފާއެއް ހާސިލް ކުރެއްވި ފަރާތްތަކެވެ.
ފެންނަމުންދަނީ އިޚްލާސްތެރިކަމެއް ނެތުމާއި ޚުދުމުޚްތާރުކަމުގެ ބަދަލު އަބަދުވެސް ދުނިޔެ މިބީދައިން ދައްކަމުން ދާ ތަނެވެ.
