ޗައިނާއަށް ދޭ ރައްދެއްގެ ގޮތުން، ލަދާޚްގެ ތަންތަނަށް އިންޑިއާއިން ރަސްމީކޮށް ނަން ދީފި

ޗައިނާގެ ބިމުގެ ދައުވާތަކަށް ސީދާ ޖަވާބެއްގެ ގޮތުން، ލަދާޚް ސަރަހައްދުގެ މުހިއްމު 28 ޖުޣުރާފީ ތަނަކަށް އިންޑިއާ ސަރުކާރުން ރަސްމީކޮށް ނަން ކިޔައިފިއެވެ.

މި ނަންތައް "ސާވޭ އޮފް އިންޑިއާ"ގެ ދާއިމީ ކަރުޓޭގެ ރެކޯޑުތަކުގައި ވަނީ ހިމަނާފައެވެ. އެގޮތުން، ޗައިނާގެ ކޮންޓްރޯލްގައިވާ އަކްސާއީ ޗިން އާއި 2020 ވަނަ އަހަރުގެ ހަމަނުޖެހުންތަކުގައި ކުރިމަތިލުންތައް ހިނގި ތަންތަން ހިމެނޭ ބޯޑަރު ސަރަހައްދުތަކުގެ މައްޗަށް އިންޑިއާގެ ޤާނޫނީ ދައުވާ ވަރުގަދަ ކުރުމަށް ސަރުކާރުން މަސައްކަތްކުރަމުން ދާކަން ފާހަގަ ކުރެވެއެވެ.

މި ފިޔަވަޅަކީ އިންޑިއާގެ ބޯޑަރު ސިޔާސަތުގައި އަންނަ ބަދަލެއް ކަމަށް ބެލެވެއެވެ.

އިންޑިއާގެ ހޯމް މިނިސްޓްރީން ވިދާޅުވީ، ޗައިނާގެ ކޮންޓްރޯލްގައިވާ ޓިބެޓާ ހަމައިން ހުރި ފަރުބަދަތަކާއި، ފަރުބަދަ މަގުތަކާއި، ގްލޭޝިއަރުތަކާއި، ފެންގަނޑުތަކާ ބެހޭ ގޮތުން ހުރި ނުސާފުކަންތައް ނަންތައް ހަމަޖެއްސުމުން ނައްތާލެވޭނެ ކަމަށެވެ. މި ފިޔަވަޅުގެ ސަބަބުން ސަރުކާރުގެ މުއައްސަސާތަކާއި، ދިރާސާވެރިންނާއި، އާންމުން ވެސް އެއް ބިމުގެ އުސޫލެއްގެ ދަށުން މަސައްކަތްކުރުން ކަށަވަރުވާނެ ކަމަށް ވެސް މިނިސްޓްރީން ވިދާޅުވިއެވެ.

މި ލިސްޓުގައި ހިމެނޭ ގޯގްރާ އާއި ހޮޓް ސްޕްރިންގްސް ފަދަ ތަންތަނަކީ 2020 ވަނަ އަހަރު ގަލްވާން ވެލީގައި ހިނގި  ކުރިމަތިލުމަށްފަހު، ފާހގަ ކޮށްލެވޭ ވަރަށް މުހިއްމު ތަންތަނެވެ. އޭގެފަހުން ހަމަޖެހުނު އެއްބަސްވުންތަކުގެ ދަށުން ބަފަރ ޒޯންތައް ޤާއިމުކޮށް ސިފައިންގެ ކުރިމަތިލުން މަދުކުރިނަމަވެސް، އެ ތަންތަނުގައި ގަވާއިދުން ޕެޓްރޯލް ނުކުރެވުމުން، ވަގުތު ދިޔަވަރަކަށް އިންޑިއާގެ ހާޒިރީ ބާރު ކުޑަވެދާނެކަމުގެ ކަންބޮޑުވުން އުފެދިފައިވެއެވެ.

މި ތަންތަނަށް ރަސްމީކޮށް ނަން ކިޔުމުން، ވަގުތީގޮތުން ޕެޓްރޯލްކުރުމަށް ހުރަސް އެޅިފައިވާ ތަންތަނުގައި ވެސް އިންޑިއާގެ އިދާރީ ދައުވާ ސަލާމަތްވާނެއެވެ. މިއީ އަރުނާޗަލް ޕްރަދޭޝްގެ ތަންތަނަށް އަލުން ނަން ކިޔައި، ތާރީޚީ ވާހަކަތައް އުފައްދާ ޗައިނާގެ ދިގު މުއްދަތެއްގެ އުސޫލަށް ދީފައިވާ ސީދާ ޖަވާބެކެވެ.

1950 ގެ އަހަރުތަކުން ފެށިގެން ޗައިނާގެ ކޮންޓްރޯލްގައިވާ އަކްސާއީ ޗިންގެ ތަންތަން ވެސް މި ލިސްޓުގައި ހިމެނުމުން ދައްކުވައިދެނީ، ބިމެއް ޖިސްމާނީ ގޮތުން ކޮންޓްރޯލްކުރުމަކީ އެ ބިމުގެ ވެރިކަން ޤަބޫލުކުރެވޭ ކަމެއް ނޫންކަމަށް އިންޑިއާ ދެކޭ ގޮތެވެ. އަދި އެއް ފަރާތުން ބިމުގައި ކުރާ ހަރަކާތްތަކުން ބޯޑަރު ބަދަލުނުކުރެވޭނެ ކަމުގެ އިންޑިއާގެ މަޤާމު މިއިން ވަރުގަދަވެއެވެ.