2021 ވަނަ އަހަރުގެ މޭ މަހުގެ 6 ވަނަ ދުވަހުގެރޭ ރައްޔިތުންގެ މަޖިލީހުގެ ރައީސް މުހައްމަދު ނަޝީދަށް އަމާޒުކޮށް ދެއްވި ހަމަލާއާއި ގުޅޭގޮތުން މަޖިލީހުގައި ހިމެނޭ އެމްޑީޕީގެ ފިކުރާ ދެކޮޅު ބޭފުޅުން ވާހަކަ ދައްކަވަމުން ދަނީ ހަމަލާގެ ސީރިއަސްކަން ކަނޑުވާލައި، ސިޔާސީ މަންފާއަކަށް ކަމުގައި ސަރުކާރުން ބުނެފިއެވެ.
ރައީސް އޮފީހުގައި ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަވަމުން ރައީސް އޮފީހުގެ ތަރުޖަމާނު މިއުވާން މުހައްމަދު ވިދާޅުވީ ރައަީސް ނަޝީދަށް ދިން ހަމައާއާއި ގުޅިގެން ރައްޔިތުންގެ މަޖިލީހުގައި އެކަމާއި ގުޅޭގޮތުން ވަރަށް ޒިންމާދާރުކަން ކުޑަ ވާހަތަކެއް ދައްކަވާފައިވާކަމަށެވެ.
މަޖިލީހުގެ މެމްބަރުން މަޖިލީހުގެ ތަޅުމުގައި އެފަދަ ވާހަކަ ދައްކަވަނީ ލިބިފައިވާ އިމްތިޒާޔުގެ ބޭނުން ނަހަމަ ގޮތުގައި ހިފައިގެންކަމަށް މިއުވާން ވިދާޅުވިއެވެ. އޭނާ ވިދާޅުވީ ސީދާ ރައީސްގެ އިތަށިފުޅުގައި މިހަމަލާއާއި ގުޅޭ ކަންކަން އަޅުވައި، ބޮޑެތި ތުހުމަތު ކުރައްވަނީ ސިޔާސީ މަންފާއެއް ހާސިލްކުރެއްވުމަށް ކަމަށެވެ. މިކަމުގައި އެއްވެސް އިހުލާސްތެރި ކަމެއް އޮތް މަންޒަރު ނުފެންނަ ކަމަށް މިއުވާން ވިދާޅުވިއެވެ.
ހަގީގަތުގައި މަޖިލީހުގެ ތަޅުގައި އިމްތިޔާޒުގެ ބޭނުން ނަހަމަ ގޮތުގައި ބޭނުންކޮށްގެން ދައްކާ ވާހަކައެއް އެދައްކަނީ. ރައީސްގެ އިތަށިފުޅުގައި އަޅުވައިގެން އެދައްކާ ވާހަކަތަކީ ދޮގުވާތަކެއް. މިވާހަތަކައް ދައްކަމުން މިދަނީ ހަމަލާގެ ސީރިއަސްކަން ކަނޑުވާލައި، ބައެއް ބޭފުޅުންގެ ސިޔާސީ މަންފާއަށް.
– މިއުވާން ވިދާޅުވިއެވެ.
ރައްޔިތުންގެ މަޖިލިހުގެ ރައީސް މުހައްމަދު ނަޝީދު އަވަހާރަކޮށްލަން ގ. ކެނެރީގޭ ކައިރީގައި އާއި މެރީ ބްރައުން އަދި ޔާގޫތުގޭ ކައިރީގައި ބޮން ގޮއްވާލަން އުޅޭ ކަން ރައީސް އިބްރާހިމް މުހައްމަދު ސޯލިހާއި ސަރުކާރަށް އެނގޭ ކަން ރައްޔިތުން މަޖިލީހުގެ ސަލާމަތީ ހިދުމަތްތަކާއި ބެހޭ ކޮމިޓީން (241 ކޮމިޓީ) އެކުލަވާލި ރިޕޯޓުން ހާމަވެފައިވާ ކަމަށް މަޖިލިހުގެ ބައެއް މެމްބަރުން އިއްޔެ ވަނީ ވިދާޅުވެފައެވެ.
241 ކޮމިޓީގެ ރިޕޯޓުގައި ވެސް ފާހަގަކޮށްފައިވާ ގޮތުގައި މިއީ އެނގި ހުރެގެން ހިނގާފައިވާ ކަމެކެވެ. މިކަން ކުރަން އުޅޭ ކަން ސިފައިންނަށް އެނގޭ ކަމާއި ފުލުހުންނަށް އެންގި ނަމަ، އެކަން ހުއްޓުވީސް ކަން ބުނެފައިވާ ކަމަށް އީވާ ވިދާޅުވިއެވެ. އަދި މިކަމުގެ މައުލޫމާތު ރައީސް ސޯލިހަށް ވެސް އެނގިވަޑައިގަންނަވާ ކަމުގައި އީވާ ވިދާޅުވިއެވެ.
އީވާ ވިދާޅުވީ ސިޔާސީ ހަސަދަވެރިކަމެއްގައި ސިޔާސީ ވާދަވެރިޔަކު ނުވަތަ ސިޔާސީ ދުޝްމަނަކު އަވަހާރަކޮށްލަން އުޅޭ އިރު، އެއީ ދިވެހި ގައުމަށް އޮތް ކިހާ ވަރެއްގެ ނުރައްކަލެއްތޯ ބަލަން ޖެހޭ ކަމަށެވެ.
ދެން ނީލޯފަރުމަގުގައި ބޮމެއް ގޮވާ އިރު، ނުވަތަ މާލެ މަޖީދީ މަގުގައި ނުވަތަ ރާއްޖޭގެ ކޮންމެވެސް އެހެން ރަށެއްގައި ރައީސް ނަޝީދަށް އޮންނަ ސިޔާސީ ހަސަދަވެރިކަމެއްގައި ބޮމެއް ނުވަތަ އެހެން ހަމަލާއެއް ދުއްވާލާ އިރު، ކޮލެޓްރަލްއަކީ އެ ތަނުގެ ކައިރީގައި ތިބޭނީ ކާކުގެ ދަރިއެއްތޯ؟ ކާކުގެ މަންމައެއްތޯ؟ ކާކުގެ ބައްޕައެއްތޯ؟ ކާކުގެ ރަހްމަތްތެރިއެއްތޯ؟ ކާކުގެ އަވަށްޓެރިއެއްތޯ ބަލާ ނުލާ ރައީސް ނަޝީދަށް އޮތް ސިޔާސީ ހަސަދަވެރިކަމެއްގައި މާލޭގައި، މަގު މެދުގައި، މަޖީދީ މަގުގައި ބޮމެއް ގޮވާތަން ބަލަން ބަލަހައްޓައިގެން އެތިބީ. އިބްރާހިމް މުހައްމަދު ސޯލިހަކީ ރާއްޖެއަށް އޮތް ބޮޑު ނުރައްކަލެއް. ހަމައެކަނި ތަންދޮރު ނޭނގެނީކީ ނޫން. ބިރުވެރި ވެސް ކަމެއް.
– އީވާ ވިދާޅުވިއެވެ.
ހަސަން ލަތީފް ވިދާޅުވީ ރާއްޖޭގެ ރައްޔިތުންގެ ސަލާމަތާއި ރައްކާތެރިކަމަށް އިންތިހާ އަށް ނުރައްކާތެރިވެފައިވާ ކަމަށެވެ. މާލޭގެ މަޖީދީ މަގުގައި ރަމަޟާން މަހެއްގެ ރޭގަނޑު 8:30 ހާއިރު ބޮމެއް ގޮވުމުގެ ކުރިން، އެ ބޮމުގެ މައުލޫމާތު ސީދާ ރައީސް ސޯލިހަށް ލިބިވަޑައިގެންފައިވާ ކަމަށް ވެސް ހަސަން ލަތީފް ވިދާޅުވިއެވެ.
ނަޝީދަށް ފާރަލަމުން އަންނަ ކަން ފާހަގަ ކުރެވިފައިވާތީ އެކަން ބަލައި ދިނުމަށް ފުލުހުންގެ ކިބައިން ނަޝީދު އެދިވަޑައިގެންފައި ވަނިކޮށް އާހިރު ނަތީޖާއަކަށްވީ ބޮމެއް ގޮއްވާލުން ކަމަށް އޭނާ ވިދާޅުވިއެވެ.
ނަޝީދަށް ހަމަލާދިން މައްސަަލައިގައި މިހާތަނަށް ނުވަ މީހެއްގެ މައްޗަށް މި ވަނީ ދައުވާ އުފުލައިފައެވެ. އޭގެ ތެރެއިން ވ. ތިނަދޫ ހިޔާ އަދުހަމް އަހުމަދު ރަޝީދުގެ މައްޗަށް ކުށް ސާބިތުވެ، 23 އަހަރަށް ޖަލަށް ލާން ވަނީ ހުކުމްކޮށްފައެވެ. އަދުހަމް ވަނީ ބޮމުގެ ހަމަލާ ދިން ކަމަށް ޝަރީއަތުގައި އެއްބަސްވެފައެވެ.
