ޗާގޮސްއަކީ މޮރިޝަސްގެ ބައެއްކަމަށް އެންމެ ފުރަތަމަ ރާއްޖެއިން އެއްބަސްވެފައިވަނީ ނަޝީދުގެ ވެރިމަކަމުގައި، 2010ވަނަ އަހަރު ކަމަށް ކުރީގެ ބަންޑާރަނައިބު އާޒިމާ ޝަކޫރު ވިދާޅުވެއްޖެއެވެ.
މޮރިޝަސްއާއި ރާއްޖޭގެ ދެކުނުން ފުށުއަރާ ކަނޑުގެ ސަރަހައްދާއި ގުޅޭގޮތުން އިޓްލޮސްއިން ނިންމި ނިންމުމަަށްފަހު، ރާއްޖޭގެ ކަނޑުގެ ސަރަހައްދުން ބޮޑުބައެއް ގެއްލިގެން ގޮސްފައިވާކަމަށް ވިދާޅުވެ، އެ މައްސަލައާއި ގުޅޭގޮތުން، ކުރީގެ ބަންޑާރަނައިބުންނާއި އަދި ކުރީގެ ވަޒީރުންތަކެއް ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަވަމުން އާޒިމާ ޝަކޫރު ވިދާޅުވީ، މިމައްސަލާގައި ނަޝީދުގެ ވެރިކަމުގައި އޭރުގެ ފޮރިންގ މިނިސްޓަރު ޑރ. ޝަހީދު މޮރިޝަސްއާއި ވާހަކަ ދައްކަވަމުން، މޮރިޝަސްއައިން ޗާގޮސްއަށް ކުރާ ކްލެއިމް ރާއްޖެއިން ބަލައިގަންނަކަމަށް ވިދާޅުވެފައިވާ ކަމަށެވެ.
އެމައްސަލައިގެ ތެރެއަށް ވާހަކަ ދައްކަން 2010ވަނަ އަަހަރުގެ އޮކްޓޯބަރުކަމަހުގެ 21 ވަނަ ދުވަހު ރާއްޖޭގަ ބޭއްވި މީޓންއެއްގަ ދިވެހިރާއްޖޭގެ ޚާރިޖީވަޒީރު އެބައޮތް ރިކޮގްނައިޒް ކުރައްވާފަ (ބަލައިގެންފަ) މޮރިޝަސްގެ ކްލެއިމެއް މިކަމަށް އޮތް ކަމަށް. ޑރ. ޝަހީދު އޭރު ހުންނެވީ އިނގޭތޯ.. ޑރ. ޝަހީދު ހުންނެވީ.. ރިކޮގްނައިޒް ކުރައްވާފަ އެބައޮތް، މިނިޓްސްގަ އެބައޮތް، ޝަރީއަތަށް ހުށަހެޅުނު ލިޔުންތަކުން އަޅުގަޑު މީތި ނެގީ، އޭގަ އެބައިތް ވިދާޅުވެފަ ވަރަށް ރަގަޅަށް ތިމަންނަ ގަބޫލު ކުރަމޭ ދިވެހިރާއްޖޭގެ ކޮންޓިނެންޓަލް ޝެލްފްގެ ކްލެއިމް ހުށަހެޅީ މޮރިޝަސްގެ ކްލެއިމަށް ނުބަލާކަން. އެހެންވީމަ ތިމަންނަމެން ހުށަހެޅި ހުށަހެޅުން ތިމަންނަމެން ބަދަލު ކުރާނަމޭ… އެއީ ރާއްޖެއިން އެންމެ ފުރަތަމަ މޮރިޝަންގެ ކްލެއިމެއް، ލެޖިޓިމަސީއެއް އެތަނުގަ އޮތްކަމަށް ގަބޫލުކުރި ހިސާބަކީ.
މިއަދުގެ ޕްރެސް ކޮންފަރެންސްގައި ވާހަކަ ދައްކަވަމުން އާޒިމާ ވިދާޅުވިއެވެ.
އާޒިމާ ވިދާޅުވީ، އެހެނެންމަވެސް އޭނާ ފަހުން ބަންޑާރަ ނައިބަކަށް ވަޑައިގެން، 2012 އޮގަސްޓުމަހު ނޭޝަނަލް ސެކިއުރިޓީ ކައުންސިލަށް އެމައްސަލަ ހުށަހެޅިކަމަށާއި، އެގޮތަށް ޚާރިޖީ ވަޒީރަކަށް އެއްބަސްވެވަޑައި ނުގެންނެވޭނެކަމަށް ވިދާޅުވެފައިވާނެކަމަށްވެސް އާޒިމާ ވިދާޅުވިއެވެ. އަދި އާޒިމާ ވިދާޅުވީ އެހާތަނުން ރާއްޖެއިން މޮރިޝަސްއާއި ވާހަކަ ދެއްކުން ހުއްޓާލާފަވާކަމަށެވެ.
އާޒިމާ އިތުރަށް ވިދާޅުވީ ނަޝީދުގެ ވެރިކަމުގެ ކުރިން އައި އެއްވެސް ސަރުކާރަކުން ޗާގޮސްއަކީ މޮރިޝަސްގެ ބައެއްކަމަށް އެއްބަސްވެފައި ނުވާކަމަށެވެ.
ޗާގޮސްއަކީ މޮރިޝަސްގެ ބައެއްކަމަށް ނަޝީދުގެ ސަރުކާރުން ބަލައިގެންފައިވާކަމަށް އާޒިމާ ވިދާޅުވިއިރު، ނަޝީދުއަކީ ޗާގޮސްގެ މައްސަލާގައި ސަރުކާރަށް ފާޑު ވިދާޅުވެ، ޗާގޮސްއަކީ ރާއްޖޭގެ ބައެއްކަމަށް މިހާރު ވިދާޅުވަމުން ގެންދަވާ ބޭފުޅެކެވެ.
މިއަދު އޮތް ނޫސްވެރިންގެ ބައްދަލުވުމުގައި ޖުމުހޫރީ ޕާޓީންނާއި އެމްއެންޕީންނާއި ޕީޕީއެމް އަދި ޕީއެންސީންއާއި އެމްއާރުއެމްއިން ބައިވެރިވާއިރު، ނަޝީދުގެ ފަރާތުން މި ނޫސްވެރިންގެ ބައްދަލުވުމުގައި ބައިވެރި ވެފައިވަނީ، ނަޝީދުގެ ފިކުރެއްގެ ދިރުން ސިޔާސީ ހަރަކާތުގެ އިސް ފަރާތެއް ކަމުގައިވާ އެސްޓީއޯގެ ކުރީގެ އެމްޑީ ހުސެއިން އަމުރުއެވެ.
