ރައްޔިތުންގެ މަޖިލީހުގެ ރައީސް މުހައްމަދު ނަޝީދަށް ދިން ބޮމުގެ ހަމަލާއާ ގުޅުވައިގެން، ޓެރަރިޒަމްގެ ދައުވާ ދައުލަތުން ކުރާ އަލިމަނިކު ހުކުމެއް ތަންފީޒު ކުރަމުން ދަނިކޮށް ދޫކޮށްލި ސަބަބު މަޖިލީހަށް ސާފުކޮށްދޭން މަޖިލީހުގެ ރައީސް މުހައްމަދު ނަޝީދު ރައީސް ޞާލިހުގެ ކިބައިން އެދިވަޑައިގެންފިއެވެ.
މެއި، 2021 ގައި ނަޝީދަށް ދިން ހަމަލާއަށް ފަހު ހިންގި އޮޕަރޭޝަންގައި އަލިމަނިކު ހައްޔަރުކޮށް، އޭނާގެ މައްޗަށް ކުރަނީ ޓެރަރިސްޓް ޖަމާއަތަކަށް ތާއީދު ކުރުމުގެ ދައުވާއެވެ. ޓެރަރިޒަމްގެ އެހެން ކުށް ސާބިތުވެ، ހުކުމް ތަންފީޒު ކުރަމުން ދަނިކޮށް އަދަބު ލުއިކޮށްދީ އަލިމަނިކު ދޫކޮށްލީ 2019 ވަނަ އަހަރުއެވެ.
އެކަމާ ގުޅިގެން މަޖިލީހުގެ ރައީސް ނަޝީދަށް، ހެންވޭރު ހުޅަނގު ދާއިރާގެ މެމްބަރު ހަސަން ލަތީފް ފޮނުއްވި ސިޓީގައިވަނީ އަލިމަނިކު ދޫކޮށްލީ 2019 ވަނަ އަހަރު ކަމަށް ވިޔަސް، އެކަމާބެހޭ ރިޕޯޓް ކަރެކްޝަންސްއިން ހަދާފައިވަނީ ސެޕްޓެމްބަރު، 2021 ގައި ކަމަށެވެ. އަދި އެކަމާ ބެހޭ މައުލޫމާތު ހޯދަން މަޖިލީހުގެ ސަލާމަތީ ހިދުމަތްތަކާބެހޭ ކޮމެޓީން ދެ ފަހަރަށް ރައީސް އޮފީހުގައި އެދުމުން ވެސް ޖަވާބެއް ދީފައިނުވާ ކަމަށް އެ ސިޓީގައިވެއެވެ. އެހެންވެ، އެކަމުގައި ރައީސް އޮފީހުގެ ބަހެއް ލިބޭނެ ގޮތް ހަމަޖައްސަައިދޭން އެ ސިޓީގައި އެދިފައިވެއެވެ.
މެމްބަރުގެ ސިޓީއާއި ގުޅިގެން މަޖިލިސް ރައީސް މިއަދު ވިދާޅުވީ މިމައުލޫމާތު މަޖިލީހާއި ހިއްސާ ކުރެއްވުމަކީ މަޖިލީހުން ވަރަށް ބޮޑަށް އެދޭކަމެއްކަމަށެވެ. އަދި މިކަން ރައީސުލްޖުމްހޫރިއްޔާ ވަރަށް އަދަބުވެރިކަމާއިއެކު ކޮށްދެއްވުމަކީ ވަރަށް ބޮޑަށް އެދޭކަމެއްކަމަށް މަޖިލިސް ރައީސް ވިދާޅުވިއެވެ.
އަޅުގަނޑު އިއްޒަތްތެރި މެމްބަރު އަރިހު ދަންނަވަން އޮތީ އަޅުގަނޑަށް މިގޮނޑީގައި އިނދެގެން މިދެންނެވެނީ. މީގެ އިތުރަށް އަޅުގަނޑު ރައީސުލްޖުމްހޫރިއްޔާގެ އަރިހުގައި މިވާހަކަ ދަންނަވާނެ ގޮތެއް ހަމަ ހަގީގަތުގައިވެސް ނެތް. އަޅުގަނޑު ރައީސުލްޖުމްހޫރިއްޔާގެ އަރިހުން ވަރަށް އަދަބު އިހުތިރާމާއިއެކު އެދެން މިމައުލޫމާތު މިމަޖިލީހަށް މަނިކުފާނު ފޮނުވާ ދެއްވުމަށް.
– ރައީސް ނަޝީދު ވިދާޅުވިއެވެ.
އަލިމަނިކުގެ މައްޗަށް ކުރާ ދައުވާގެ ޝަރީއަތް ކްރިމިނަލް ކޯޓުގައި މިހާރު ކުރިއަށް ދާއިރު، އޭނާ އަދިވެސް ހުރީ ބަންދުގައެވެ.
