މުސްތަގިއްލު މުއައްސަސާއެއްގެ ގޮތުގައި އެންވަޔަމަންޓަލް ޕްރޮޓެކްޝަން އެޖެންސީ (އީޕީއޭ) ހެދުމުގެ ވިސްނުމެއް މި ސަރުކާރުގައި ނެތް ކަމަށް ރައްޔިތުންގެ މަޖިލީހުގެ ރައީސް މުހައްމަދު ނަޝީދު ވިދާޅުވެއްޖެއެވެ.
ރައީސް ނަޝީދު މިހެން ވިދާޅުވީ، އީޕީއޭއަކީ މިނިވަން މުސްތަގިއްލު ތަނަކަށް ހެދުމަކީ ރައީސުލްޖުމްހޫރިއްޔާގެ ރިޔާސީ ވައުދުފުޅަކަށްވާއިރު އަދި ފުރަތަމަ 100 ދުވަސް ތެރޭގައި ކުރަން ކަނޑައެޅި ކަމަކަށްވާއިރު، އެ ވައުދު ނުފުއްދައި މިހާ ދިގުލަނީ ކީއްވެގެންތޯ މަޖިލީހުގެ މިއަދުގެ ޖަލްސާގައި އުނގޫފާރު ދާއިރާގެ މެމްބަރު މުހައްމަދު ވަހީދު، އެންވަޔަރަންމަންޓް މިނިސްޓަރު އައިމިނަތު ޝައުނާއާ ކުރެއްވި ސުވާލަށް މިނިސްޓަރު ދެއްވި ޖަވާބާ ގުޅިގެންނެވެ.
އެ ސުވާލާ ގުޅިގެން މިނިސްޓަރު ވިދާޅުވީ، އީއައިއޭ ފާސްކުރުމުގެ ބާރު އަލުން އީޕީއޭއަށް ދީ، ރައީސް އިބްރާހިމް މުހައްމަދު ޞާލިހު ވެވަޑައިގެންފައިވާ ވައުދު 2018 ވަނަ އަހަރު ފުއްދާފައިވާ ކަމަށެވެ.
ދުނިޔޭގެ ކުރިއަރާފައިވާ ބައެއް ގައުމުތަކުގައި އީޕީއޭ ހިންގަމުންގެންދާ ގޮތާބެހޭ މައުލޫމާތު މަޖިލީހާ ހިއްސާ ކުރައްވަމުން މިނިސްޓަރު ވިދާޅުވީ، ތިމާވެށީގެ ކަންކަން ރެގިއުލޭޓް ކުރުމުގެ މަސްއޫލިއްޔަތު އެ ގައުމެއްގެ އެގްޒެކްޓިވް ބާރާ ވަކިކޮށްފައިނުވާ ކަމަށާއި ތަރައްގީ ވެފައިވާ ގައުމުތަކުގައި އެކަން އޮންނަނީ، އެއިރެއްގައި އޮންނަ ސަރުކާރެއްގެ ސިޔާސަތުތަކާ އެއްގޮތަށް އެއިރެއްގައި ހުންނަ ރައީސެއްގެ ނުވަތަ ތިމާވެއްޓާ ބެހޭ ވަޒީރެއްގެ ދަށުން ހިންގާ ގޮތަށް ކަމަށެވެ.
"އެއީ ގައުމުގެ ތަރައްގީއާއި ތިމާވެއްޓާ ދޭއްޗަކީ ވަކި ނުކުރެވޭނެ ދޭއްޗަށްވުމުން، އެހެންކަމުން ވެރިކަން ހިންގާ ފަރާތުގެ ބާރު ނުހިނގާ ގޮތަށް މުޅިން މިނިވަން، މުސްތަގިއްލު ކޮމިޝަނަކުން ތިމާވެށީގެ ކަންކަން ރެގިއުލޭޓް ކުރުމަކީ ރާއްޖެ ފަދަ، ތަރައްގީވަމުން އަންނަ ގައުމަކަށް އެންމެ އެކަށީގެންވާ ނިޒާމު ނޫންކަން ގަބޫލުކުރަންޖެހޭ،" މިނިސްޓަރު ވިދާޅުވިއެވެ.
މިނިސްޓަރު ދެއްވި ޖަވާބާމެދު ހިތްހަމަޖެހިވަޑައިނުގެން، މަޖިލީހުގެ ރައީސަށް ތާއީދުކުރައްވާ މެންބަރުން ތަކުރާރުކޮށް އެ ސުވާލު ކުރެއްވިއެވެ. އެ ބޭފުޅުން ވިދާޅުވީ، އީޕީއޭއަކީ މިނިސްވަން މުސްތަގިއްލު ތަނެއްގެ ގޮތުގައި ހަދައިފިންތޯ ކުރެއްވި ސުވާލަށް މިނިސްޓަރު ސީދާ ޖަވާބު ނުދެއްވާ ކަމަށެވެ. އެހެންކަމުން އެ ސުވާލަށް އާއެކޭ ނުވަތަ ނޫނެކޭ މިނިސްޓަރު ވިދާޅުވާން ޖެހޭނެ ކަމަށްވެސް އެ މެންބަރުން ވިދާޅުވިއެވެ.
އެ މެންބަރުންގެ ޝަކުވާތަކާ ގުޅިގެން އެ ސުވާލަށް ސާފު ޖަވާބެއް ދެއްވުމަށް މަޖިލިސް ރައީސްވެސް މިނިސްޓަރުގެ ކިބައިން އެދިވަޑައިގެންނެވިއެވެ. ނަމަވެސް މިނިސްޓަރު ދެވަނަ ފަހަރަށްވެސް ވިދާޅުވީ، 100 ދުވަހުގެ ވައުދާ އެއްގޮތަށް އީޕީއޭ ބާރުވެރިކޮށް މިނިވަންކަމާ އެކު ހިންގޭނެ ގޮތް ހަދާފައިވާނެ ކަމަށެވެ.
"އެއްވެސް ސިޔާސީ އަދި ސިޔާސީ ނޫންވެސް ނުފޫޒެއް އީޕީއޭގެ މައްޗަށް މިހާރަކު ނުހިނގާ، އެތަނުގައި މިހާރު ތިބި މުވައްޒަފުންގެ އިންޓެގްރިޓިއާ މެދުވެސް އަޅުގަނޑުގެ ކޮންފިޑެންސް އެބަ އޮތް،" މިނިސްޓަރު ވިދާޅުވިއެވެ.
މިނިސްޓަރުގެ އެ ޖަވާބާ ގުޅިގެން ހިތްހަމަޖެހިވަޑައިނުގެން މަޖިލިސް ރައީސް ވިދާޅުވީ، "އަޅުގަނޑު މިހާރު މިތަނުން މި ބަލައިގަތީ މުސްތަގިއްލު މުއައްސަސާއެއްގެ ގޮތުގައި އީޕީއޭ ހެދުމުގެ ވިސްނުމެއް ސަރުކާރުގައި ނެތް ކަމަށް،" ކަމަށެވެ.
