އެއްވެސް ސަބަބަކާ ހުރެ، އަންނަ ރިޔާސީ އިންތިޚާބުގައި ވާދަކުރާނެ ރިޔާސީ ކެންޑިޑޭޓެއް އިދިކޮޅު ޕީޕީއެމްއިން ނުނެރެވިއްޖެނަމަ އެޕާޓީ އޮޔާ ދާނެކަމަށް ރައްޔިތުންގެ މަޖިލީހުގެ މަރަދޫ ދާއިރާގެ މެމްބަރު އިބްރާހީމް ޝަރީފް (މަވޯޓާ) ވިދާޅުވެއްޖެއެވެ.

އިދިކޮޅު ޕީޕީއެމްއަށް ފާޑުވިދާޅުވެ ކުރެއްވި ޓްވީޓެއްގައި މަވޯޓާ ވިދާޅުވީ، ޕީޕީއެމް އޮޔާ ދަނީތޯ ބައެއް މީހުން ސުވާލު އެބަ އުފައްދާކަމަށެވެ. އޭގެ މާނައަކީ އެއްވެސް ސަބަބަކާ ހުރެ އަންނަ ރިޔާސީ އިންތިޚާބުގައި ޕީޕީއެމްގެ ޓިކެޓުގައި ވާދަކުރާނެ ރިޔާސީ ކެންޑިޑޭޓަކު ނުދެއްކިއްޖެނަމަ ޕާޓީ އޮޔާ ދާނެވާހަކަކަމަށާ، އެއާ ގުޅިގެން ޕާޓީގެ ސައިޒް ދައްކަން ބާއްވާ ޖަލްސާއެއްގެ ބޭނުމެއް ނެތްކަމަށެވެ.

ޕީޕީއެމްގެ ރިޔާސީ ޓިކެޓު އެޕާޓީންވަނީ ޕާޓީގެ ރައީސް، ރައީސް ޔާމީނަށް އަރުވާފައެވެ. އެހެންނަމަވެސް އެމަނިކުފާނު މިވަގުތު ޖަލު ޙުކުމެއް ތަންފީޒުކުރައްވާތީ އިންތިޚާބުގައި ވާދަކުރުމުގެ ފުރުސަތުވަނީ ގެއްލިފައެވެ. މަތީކޯޓަކުން އެމަނިކުފާނުގެ ޖަލުޙުކުމް ބާޠިލްނުކުރާޙާ ހިނދަކު އެފުރުސަތެއް ނެެތެވެ. އެހެންނަމަވެސް ޕީޕީއެމްގެ ލިދަޝިޕުން ދެކެނީ ޖަލުން ސަލާމަތްވެ ރައީސް ޔާމީނަށް އިންތިޚާބުގައި ވާދަކުރުމުގެ ފުރުސަތު ލިބޭނެކަމަށެވެ.

Baeh faraaithakun @ProgressPartyMV oyaa dhaneethoa ebasuvaalu kurey.Mi dhannavanee evves sababakaa hure riyaasee candidate aku nunerevijje nama hama dhaanee oyaa kameh. Size dhakkan baavaa evves jalsaaegge beynumeh noannaane. MRM hen beyfulhehge fahathun ebre kuda partyakah vanee

— Ibrahim Shareef (@AdduShareef) April 24, 2023

މަވޯޓާގެ ޓްވީޓު އަމާޒުކުރައްވާފައިވަނީ "ކޮތަޅު"ގެ ނަމުގައި ހާއްސަ ޖަލްސާއެއް އަންނަ ހުކުރު ދުވަހު ޕީޕީއެމްއިން ބާއްވަން ނިންމުމުން އެކަމާ ރިޔާސީ ކެންޑިޑޭޓުގެ މައްސަލައާ ގުޅުވައެވެ.

އިދިކޮޅު ޕީއެންސީގެ ނައިބް ރައީސް އިބްރާހިމް ޝުޖާ ވިދާޅުވެފައިވަނީ ތަކެތީގެ އަގު އިންތިހާއަށް ބޮޑުވެ ރައްޔިތުން ނިކަމެތި ހާލެއްގައި ތިބި މިދަނޑިވަޅުގައި ސަރުކާރަށް އިތުރު ފައިސާ ހޯދުމަށް ރައްޔިތުން ގަންނަ ތަކެތި އަޅަން ގެންގުޅޭ ކޮތަޅުން ޓެކްސް ނެގުމަކީ ރައްޔިތުން އިތުރަށް ނިކަމެތި ކުރުންކަމަށެވެ.

މިކަމާއި ދެކޮޅު ހެދުމުގެ ގޮތުން ”ކޮތަޅު“ ނަމުގައި ޕީޕީއެމްގެ ފަރާތުން ބާއްވާ ޚާއްޞަ ޖަލްސާ 28 އެޕްރީލް 2023 ވާ ހުކުރު ދުވަހުގެރޭ 08:30ގައި އާރޓިފިޝަލް ބީޗްގައި އޮންނާނެ ކަމަށް ޝުޖާ ވިދާޅުވިއެވެ. މިސަރުކާރާ ދެކޮޅު ހުރިހާ ލޮބުވެތި ރައްޔިތުންނަށް ޝުޖާ ވަނީ ޖަލްސާއަށް ދައުވަތު ދީފައެވެ.